YOHANES 7 - Allah Wene Fano Wene Hupla Inane

Yesus o Yerusalem seni isatunem kamo isikhesigen pisikhe wene

¹ Wene a'nogo arat yagaisasikhesik he, it ap kaindek Yahudi mene nen, Yesus ebe wasuogeluk weim abok ikhi lagaukwa andi nen he, at ebe o Yudea pimbik nikhi logou abiren he, o Galilea tonggwe andoma nikhi lagaikhe.

² A'nogo nikhi lagaikhe andem sambul he, it afuni Yahudi mene o endamat O Sabu Enggaba wutfuluk welagaukwa mene inendawimo eberogo seni isago nogoin oba arat horogasi wagaikhe.

^3-5 A'nogo horogasi wagaikhemo logolik, at Yesus onggwarek agaila'lak mene ogo re, inendawinggen at oba eberogoat himbiret figi'lek welagaukwa andi nen he, mel yagatukwa: ”Hat hagoromi hane wili'lagwi mene omanogo nen, hat hilingitendek mene hilingitunem ineilenggen heowagen, o yoma herakfuluk o Yudea pino. Ap inenu werek asuogeluk anggikhi logolik halok he, hinagaisogo hilingitarek lego. Halok he, hat hilingiti lagen andi, afuni kweangma mene inebe mondogat inelu asuageluk weinamhogo hilingisi pin o,” iluk yagatukwa.

⁶ A'nogo yagatukwama, at Yesus nen he, mel yagaisasikhe: ”O hundik-handik hiren hilingisu menere higit werek, menere an nen hilingisigin oba horogasi wagi'lek oan werego.

⁷ It afuni kweangma mene nen hit halok he, inabit mondok hilinginabi'lagwi lek meneat he, an nen, it hilingitarek andi weak mondok, iluk igirek andi nen he, anat inabit mondok hilingnabi'lagwi o,” iluk yagaisasikhesik,

⁸ ekhe mel yagaisasikhe: ”An hilingisigin oba oan werek andi nen he, seni isasugun andi isatunem yogondak yaat pigin lego. We, hit enek pini o,”

⁹ iluk yagaisasikhesik, at o Galilea andoma kamo isikhe.

Yesus seni O Sabu wurogo isatunem pisikhesik hilingitikhe wene

¹⁰ A'nogo kamo isikhemo, at agaila'lak omanogo nek seni a'nogo isatunem arat pisukwama nen, at Yesus hobuk afuni inonggot werek kwelek hinagaisogo pisikhe.

¹¹ Andoma pisikhesik werek kwelek, it ap kaindek Yahudi mene seni isatunem logolik Yesus ebe herasuogeluk heinok wanhi logolik he, ”At ebe koma werek?” iluk isukwama,

¹² it afuni hokhorogo omanogo inesanggo holhukwasik he, inane samik-samok ikhi logolik, it ekhe nen he, ”Athe fano,” ugunem it ekhe nen he, ”Lego. Athe weak. Afuni lalinabi'logo,” iluk isukwa.

¹³ A'nogo isukwa meneat he, it ap kaindek Yahudi mene inailo nen he, inane weinamhogo Yesus abok igi'lek, we nguluk habuk enek isukwa andi.

¹⁴ Seni a'nogo ninggi logolik heire'ma Yesus Allah awi wuri'mo kwisikhesik, wene yagaisikhi lagaikhe.

¹⁵ Yagaisugunem he, it ap kaindek Yahudi mene nen he, mel isukwa: ”Egi! Nailo e. Ap yi sekolah hilingiti'lek meneat he, yi wene ti wene yoma ninggi'nogo nen elu aga anggegep,” iluk isukwama,

¹⁶ at Yesus nen he, mel yagaisasikhe: ”An nen wene yagaisikhi lagi andi, an nendawimo nen kagalogo yagaisikhi lagi lego, meneat he, at an laknobagai wagaikhe mene a'nogo nen yaganetu kwelek yagahisikhi lagi o.

¹⁷ Ap sa nen Allah endawimo anggikherek mene higithogo hilingisu amolo halok an nen wene yagaisikhi lagi andi, Allah nen yagatu kwelek ili'lago, igik, onggwarek endawimo nen kagalogo ili'logo igik, enegat hambik elu asigin aro.

¹⁸ Halok he, ap sa nen wene onggwarek endawimo nen kagalogo ikherek mene andi re afuni fogerasuageluk ikherego. Meneat he ap sa nen at lakfei wagaikhe mene fogerasuageluk ikherek halok he, eranen ikherek mondok lego. We, eberogoat ikherek.

¹⁹ Nen, wene Allah nen komotninafikhe wene andi, Musa nen lisu palogo wokhisasikhe lek nogo? Arenat wokhisasikhe anggigi. Meneat he, ap hit mene ekhe nen, wene andi higithogo hilingiti'lek logolik an noasuageluk weim abok ikhi lagep andi nenahalok?” iluk yagaisasikhemo,

²⁰ it afuni hokhorogo omanogo nen he, mel yagatukwa, ”Hat he, munggwarengge obabut weak mene hendwimo kwikhesik lugulugwi palhik agendik ikhi lagen a? Sa nen hilingisigeluk ili'logo nen ikhi lagen,” iluk isukwama,

²¹ at Yesus nen mel yagaisasikhe: ”An nen he, ninenggi sabit oba Allah faget weat logolik elalin hilingisu lek mene misigam hilingiti mene re, hit mondogaren he, eige! iluk hinailo agep andi.

²² Mene re, hit hinagainafuri inenggalimo mene inagap palinafi lagep andi re, ero at Musa fuk. Lego. Ero Musa ebe oan ta'lagi'lek werek kwelek ninombalagen palinafi lagaukwa mene aro. Andi nen, at Musa nen a'nogo palinafi logogun iluk yagahisasikhemo, hinenggi sabit oba Allah faget weat logolik palinafi lagep andi o.

²³ Nen, wene Allah nen komotninafikhe wene at Musa nen wokhisasikhe andi sagalinogo iluk, inenggi sabit oba Allah faget weat logolik ap inenggalimo mene inap palinafep meneat he, an nen ninenggi sabit oba Allah faget weat logolik, ap ekhe ebe mondok fano hilingiti meneat he, hiren nenahalok wena'neti lagep?

²⁴ Wene ebe furogo hinonggot meneat he, we wene weinam mene nek hinelu logolik, afuni ekhe wene inoba fogoin lego. Wene furogo hinelu a'lugen, weak hilingitarek hgithogoat wene inoba fikhi logoino o,” iluk yagaisasikhe.

”At Yesus ebe koma mene?” iluk isukwa wene

²⁵ At Yesus nen wene a'nogo yagaisugu were'ma, it afuni o Yerusalem mene inebe fena nen mel ikhi lagaukwa: ”Ap wasugun iluk abok pali'lagwi a'nogo, ebe ari lek nogo? Ebe ari aro.

²⁶ Meneat he, ebe yethani! Nailo e. Ailo legat logolik, wene yaganisugunem iren wene onggo yagati'legat kamo ili'lagwi yi. It ap ninogogwi kaindek yoma inendawimo nen he, Kristus nit afuni telninabuageluk Allah nen lakfei wesigin iluk isikhe a'nogo ebe ariat, iluk inendawimo anggagasigen hilingiri'lagwi he a?

²⁷ A'nogo meneat he, nit afuni telninabuageluk Allah nen lakfei wesigin isikhe a'nogo ebe waga halok, ero ka nen waga he, afuni mondogat inonggot logogun meneat he, ap yi nek he, ebe ap ero andoma mene, iluk nineluaro,” iluk ikhi lagaukwa.

²⁸ A'nogo ikhi lagaukwama, at Yesus Allah awi wuri'mo wene ane hokhorogo yagaisikhi logolik, mel yagaisasikhe: ”An nebe inom, nebe o andoma nen waga iluk inom, hit hinelu nogo? An wagagi andi re, an nendawimo nen anggaluk wagi lego. We, At ane eberogoat mene nek ikherek mene a'nogo nenat laknobagai waga meneat he, At ebe hit hinonggoro.

²⁹ A'nogo meneat he, an enek he, arenat laknobagai wagaikhemo, o at were'ma andoma nenat wagagi andi nen he, an at ebe nelu o,” iluk a'nogo yagaisikhi lagaikhemo,

³⁰ iren Yesus ebe fakfouwogeluk isukwa meneat he, at ebe fakfogoin oba higit asi wagi'lek andi nen he, ebe inenggi fak figi'lek kamo isukwa.

³¹ It ekhe nen fakfouwogeluk ikhi lagaukwa meneat he, it afuni hokhorogo omanogo inebe fena hokhorogoat inendawinggen Yesus oba eberogoat himbiret fesukwasik mel isukwa: ”Ap ari elalin mene hilingite andi re, elo'lek anggegep? Nen, afuni telninabuageluk Allah nen lakfei wesigin isikhe a'nogo wesimbik he, ebe futfouwageluk elalin mene hokhorogoat hilingisigin nogo? Lego,” iluk isukwa.

Yesus ebe fakfouwogeluk isukwa wene

³² A'nogo ikhi logolik, it afuni hokhorogo omanogo inane samik-samok Yesus abok ugunem it ap Farisi mene inesanggo holhukwa. Holukwasik it ap Allah eisewerek inogogwi kaindek inomen, ap Allah awi wurik kwalogo welagaikharek mene ekhe Yesus ebe fakfouwageluk wene warisasukwa.

³³ A'nogo ugu kwelegat, at Yesus nen he, mel yagaisasikhe: ”An we, elama faget nenggi endebat ninom logombik he, At laknobagai wagaikhe mene a'nogo oba nambotkwe arat lagain o.

³⁴ An o andoma lambik were'ma, hiren an hera'nabik nikhi logogun meneat he, hit o an logogin oba andoma wesugun mondok elo'lek andi nen, an ninom ambi asugun lego,” iluk yagaisikhi lagaikhemo,

³⁵ it ap inogogwi kaindek omanogo nen, it-it ikhi logolik he, mel isukwa: ”At yi o koma lambik were'ma, nit at herarik lambik ninom ambi asugun legen yaganisikhe anggegep. Ap nit mene o pugulogo afuni Yunani mene were'ma inoba lagaukwasik were'ma inoba lambik, afuni Yunani mene wene yagaisikhi logouwageluk ikhe anggegeba?

³⁶ Aren yaganisikhi logolik, hit an nebe hera'nabik nikhi logogun meneat he, an ninom ambi asugun lego. Nen, hit o an logogin oba andoma wesugun mondok elok'lego, iluk yaganisikhe andi re, at endawimo ninggi'nogo anggikhesigen yaganisikhe anggegep,” iluk ikhi lagaukwa.

Yesus nen afuni inelugerinaferek mene faget yagaisasikhe wene.

³⁷ Wene a'nogo isukwasik oba nen, seni a'nogo wurep kobokhogo nunggunem, Yesus ebe menlagaikhesik, ane hokhorogo mel yagaisasikhe: ”Ap sa nen i nele halok, an noba na wesuago.

³⁸ Nen, ap sa nen endawinggen an noba eberogoat himbiret fikhe halok he i inelugerinaferek mene at endawimo nen elesi fuluk-fuluk palogo wulifi logogin o, iluk Allah ane lisu palek oba isukwa hagat hilinglasigin o.”

³⁹ Iluk, wene a'nogo yagaisasikhe andi re, afuni inendawinggen at oba eberogoat himbiret fagarek mene nek inebe lombok Allah Areagun wogisagain, iluk abok isikhe meneat he, andem sambul at Yesus ebe fogeratu kwelek lagagin a'nogo oan lagagi'lek andi nen he, Allah Areagun oan pelabi wagi'lek werek kwelek isikhe.

⁴⁰ Wene a'nogo yagaisugunem, afuni hokhorogo omanogo inesanggo holhukwasik, it ekhe nen he, mel isukwa: ”Ap yi re, ap ekhe Allah ane yaganisa wesigin en, yerogo welagorek a'nogo aro,” iluk ugunem he,

⁴¹ it ekhe nen he, ”Lego. At Mesias, afuni telninabuageluk Allah nen lakfei wesigin isikhe a'nogo aro,” iluk isukwa meneat he, it ekhe nen he, mel isukwa: ”Mesias, afuni telninabuageluk Allah nen lakfei wesigin isikhe a'nogo o Galilea nen elok wesigin nogo? Elo'lego.

⁴² At Mesias Allah nen lakfei wesigin isikhe mene andi re, ap Daud en tagongge mene, at Daud onggwarek awi eroma welagaikheba o Betlehem andoma ta'lasigin, iluk Allah aneba lisu palogo fesukwama a'nogo lek nogo?”

⁴³ Iluk, a'nogo ilik laga lagaukwasik, wurep oba re, afuni hokhorogo omanogo Yesus faget inane sagalogo inebe minggilhukwa.

⁴⁴ A'nogo minggilhukwasik, it ekhe nen Yesus ebe fakfouwogeluk isukwa meneat he, inenggi fakfigi'lek kamo isukwa.

Ap Yahudi mene inogogwi kaindek inendawinggen Yesus oba himbiret figi'lek hilingitukwa wene

⁴⁵ A'nogo kamo isukwasik werek kwelek, it ap Allah awi wuri'mo kwalogo welagaukwa mene nen Yesus ebe fakfouwageluk wene warisasukwa mene omanogo inambotkwe it ap Allah eisewerek mene inogogwi kaindek inom, Farisi mene inom, inoba wagaukwama re, wene mel yagaisasukwa: ”Ap a'nogo ebe fakfuluk ninoba waluk wagi'lek andi, nenahalok halogen kamo egep?” iluk yagaisasukwama,

⁴⁶ iren he, mel yagaisasukwa: ”Eige! Wene aren ili'logo andi hak he, it ap ekhe nen wene a'nogo ugunem isogorek lek meneat he, aren wene hunogoat ili'logo andi nen ebe herakfogo o,” iluk, yagaisasukwama re,

⁴⁷ it ap Farisi mene omanogo nen he, mel yagaisasukwa: ”Hit ogo re, aren lalhinafemo nen ikhi lagep nogo?

⁴⁸ Nit ap Yahudi mene hinogogwi kaindek ekhe nen inendawinggen at oba himbiret figik, nit ap Farisi mene ekhe nen inendawinggen at oba himbiret figik, ugunem ekhe isikhi lageba? Mondok lego.

⁴⁹ Mondok lek meneat he, it afuni hokhorogo yoma wene Allah nen komotninafikhe wene a'nogo inonggot logolik ili'lagwi andi, Allah nen homan inoba ikfisikhemo werego,” iluk yagaisasukwa.

⁵⁰ A'nogo yagaisasukwama, ap it mene ekhe enu re, Nikodemus, attagat o hubanggo Yesus oba wagaikhe mene a'nogo it yagaisikhi logolik he, mel yagaisasikhe:

⁵¹ ”Ap yi sani. Wene Allah nen komotninafikhe wene andiba re, ap ekhe ane inesanggo holhi'legat, nen, at hilingite mene wene ero tukhumhogo inonggot logoligat he, wene tak pikhit oba fogoin, iluk isikhe nogo? Lego,” iluk yagaisasikhemo,

⁵² iren at mel yagatukwa: ”Hat ogo re, hawiba o Galilea mene nogo? Ap Allah ane yagaisagarek mene ekhe o Galilea nen wesigin iluk Allah aneba lisu palek were'ma heilenggen hagain mondok lek a'naga re, heilenggen fanorogo hikhi logoino o,”

⁵³ iluk ikhi lagaukwasik he, afuni omanogo inawilokwe lombok pugulogo lagaukwa.