YOEL 3 - Allah Wene Fano Wene Hupla Inane

Allah nen afuni inunggulenu lombok wene inoba figik, kotik, igin wene

¹ Tuhan nen a'nogo isikhesik ekhe mel isikhe, ”O andem sambul, afuni Yerusalem mene inom, Yehuda mene inom, attak fani fanorogo welagaukwa andi hak, hobuk fano hilinginabumo logouwagen hilinginabigin o.

² A'nogo hilinginafi logolik, afuni inunggulenu lombok inebe mondogat An nen andogorogo fisambik he, o tonggo fanoma wene inoba figik kotik igin oba andoma woginarek lagain o. A'nogo woginarek lambik he, iren An nagainafuri inoba weagerogo fisasukwasik it Israel mene inanggweang omanogo sumburogo helikhi logolik, An nagainafuri o ekhema-ekhema pugulogo wulaginafukwa andi nen he, o andoma An nen woginarek lambik wene inoba fagain o.

³ A'nogo hilingiti logolik, iren inamingming engge asuogeluk, An nagainafuri fakfisaluk he, sa asigin iluk, oagengge walhigik, inamingmingengge hilingfisigik, nen onggo it ekhe inoba paligik, uang andi re hemi hesangge hilinginafu mene faget fikhi logogun iluk heligik, ina'logomi tugum mene ogo inamlogomi souge mene ogo onggo paligik, nen uang a'nogoba re iren anggur agai faget onggo hunisugun igik, hilingiti lagaukwa. A'nogo hilingiti lagaukwa mene andi faget he wene inoba fagain o.

⁴ Hit afuni Tirus mene inom, Sidon mene inom, afuni o Filistin mene ekhema-ekhema welagep mene mondogaren he, An ninggi'nogo hilingnobagauwogeluk hilingiti lagep nogo? An nen weagethinafi lagagi mene andoma eberek logolik wene onggo noba fouwogoluga? Halok he An nen hit hinonggwarek hinobabut oba wene hinoba fembik onggo lagokhogo weak-weagat weagethinabigin werego.

⁵ Hiren An mene emas inom, perak inom, yi mene ti mene onggo hokho mene inom, hinenggiabusak helaluk lagagipsik hinandugwi kembu awi wuri'mo at faget hilingiti lagep oba andoma fakha lagagip.

⁶ Nen afuni Yehuda mene inom, Yerusalem mene inom he, it inaiba herakfisaluk yatmaat laluk logouwagaluk anggasigipsik he, afuni inunggunelu Yunani mene inoba onggo helasigip andi.

⁷ Yogondak he An nen it inebe hiren onggo palinafigipmo welagaikharekwe andoma nen andogerinabimbik, hiren hinobabut mondok weak oba hilinginafigip mene andi onggo lagokhogo re hinonggwarek weagethinabigin o.

⁸ An nen hit hinagainafuri ap mene inom, helime mene inom afuni Yehuda mene inoba onggo palogo helagain o. A'nogo onggo palinabumo, iren he afuni o Syeba yatma andoma mene inoba onggo paluageluk yagaisamo hunisugunat, iluk An Tuhan nen nane mondogat igi o,” isikhe.

⁹ Wene yi, afuni inunggulenu lombok yagaisikhi logolik he, mel ino: Weim yabuogoluk fik fougetik, ap tentara inobabut mondok weak mene andogorogo fisigik, inagoromi inobabut mondok hibilik hebelek mene mondogat wesuageluk inayonggo figik, imbik he, weim sineli we'ni o.

¹⁰ Yabu sige wanhi lagep mene andi re karok weim yafu mene hilingisogo figik, pisok yi mene ti mene palhi lagep mene andi re, afuni talinafu mene hilingisogo figik, ino o! Nen, it ap inomame lek mene nen he, An ogo it tentara nen hilingitarek higit hilingisiginat, iluk ikhi logouwak aro.

¹¹ Yago, hit ap tentara hinunggulenu lombok o yi awi ti awi unggut-unggut esanggo-esanggo welagep mene re, weim yabuogoluk o mondok tonggoma andoma weak-weagat andogosi we'ni o, iluk yagaisano,” ikhe. A'nogo ikhemo, it yagaisasikhe mene andi inebe wagunem an nen he, ”Tuhan neisena haren mene tentara andoma nen weim yabuageluk lakfisa lan o,” iluk igi.

¹² Tuhan nen hobuk ekhe inomat ikhi logolik he, ”An nebe hurek logolik, afuni inunggulenu lombok An nagainafuri mene inera'lukwe o yi awi ti awi unggum inoba feigiluk welagi andi nen he inebe fik foukhogo hilingfuluk o tonggo Penghakiman wene inoba figik kotik igin oba andoma wesuago.

¹³ It afuni andoma inobabut weak mondok hokhorogo hilingiri'lagwi andi nen he, awi yago mene enggen arat wurik agunem palharek andi hak, karok waluk lambik inoasi lan o. Nen, anggur enggen sagalharek oba sagalhunem, amusu keralogo ambem hetok ikherek andi hak, inebe wulil tagalogo inoa'no o.

¹⁴ An Tuhan nawi tegelinabigin oba a'nogo weak-weagat asigiluk werek andi nen he, afuni inebe mondok hokhorogo inenggi wenasu elo'lek mene o wene inoba figik, kotik igin oba werego.

¹⁵ Mo inom, tugi inom, mum agik, hesagal yati'lek kamo igik, igin o,” iluk isikhe.

Allah nen againafuri fanorinabigin wene

¹⁶ Tuhan ebe andom Sion oba logolik, ane kwe igik, o Yerusalem logolik, ane unggunggu ane hangge pak igik, igin o. At ebe nen hilingitunem pogot kweang abolok igin. A'nogo abolok igin meneat he, nineisena Tuhan ebere At againafuri Israel mene inebikhit agik, awe a'ma fisaluk ferinarek welagik, igin.

¹⁷ Andi faget he Aren ikhi logolik, ”Yago, hit Israel mene yi. Hiren he, An nebe hineisena Tuhan Allah welagirek mene a'nogo hinelu asugun o. An nebe re Nandom Sion mondok horek mene a'nogoba logogin, Nen, o Yerusalem ogore An nonggwarek nawi kota fano horek awiat hilingisogo fagain o. A'nogo hilingfugunem, hobuk afuni pok mene o andoma kwikhi logogun mondok lego.

¹⁸ O andem sambul tomkwe andoma mondogat he, anggur enggen amusu hokhorogo hilinglagik, Inanggo takhikhi logogun mene re punukwe engga muli fano mene andoma ninggi logogun. I afuni Yehuda mene werekwe lagarek mene andoma re firitok ikhi logogin mondok lek. Nen, i elesi ekhe Tuhan awi wuri'mo nen wulibisogo o Akasia tonggokwe andoma laga logolik kweang fano sakhorarik laga logogin.

¹⁹ Meneat he, it Mesir mene nen inom, Edom mene nen inom, afuni Yehuda mene weak hilingiti'le'maat, inaiba andoma were'ma inamep wulagaisogo inoatukwa andi nen he, o Mesir he lei kweang amusu mondok iringi'mo hilinglagik, O Edom he esilek lei mondok pirim-pirim uguba hilinglasumo re, afuni inebe andoma ekhe logogun mondok lego.

^20-21 It inamep faget he An nen unggulmo fagain. Nen An nagainafuri inebe inoata mene andoma re An nenat inoasumo wa'lasugun. Oba nen he Yehuda ba inom Yerusalem oba inom andoma re afuni werek enek logogun, nen Tom Sion oba andoma re An nebe femhogo logogin,” iluk ikhe.