YOEL 2 - Allah Wene Fano Wene Hupla Inane

Nineisena Tuhan awi wei igin mene andi faget eberek logouwageluk yagaisasikhe wene

¹ ”Nineisena Tuhan awi wei igin a'nogo horogat asi wagama arat wei igiluk werek andi nen he, tom Sion fano hore'ma nineisena Allah ebe welagarek oba andoma nen pinggong hokho mene anet feni o. A'nogo anet fugunem, hit afuni o Yehuda welagep mene hinoagelekwe abolok igin.

² Linggene andiba re, mondok mum hikhaksek mene wei imbik, mumeak meneba sebelinarek logogin. Tentara pulue esa logalogo re o hena tomkwe sebelik lagarek andi hak sebelinabigin. Wene a'nogo hilinglasigin andi hangge ekhe hilinglagunem hogorek mondok lek mene. Nen, hobuk ekhe hilinglagunem hikhi logogun mondok legat mene hilinglasigin andi.

³ O kweang andoma elokhe kwe re lei en ninggerek hak yi engga ti engga mondogat yago mene leget figik, attak he o andoma nineisena Tuhan eabumo Eden hangge welagaikhe mene a'nogo hobuk pulue nen weaget fembik oba nen he, o leimo kweang amusu le'ma welagarek andi hak hilinglasigin. Afuni poloksek ekhe wulifi'lek felelenghogo inoatarek andi hak, iren yi mene ti mene yago mene ekhe herakfigi'lek mondogat weaget fisogoin.

⁴ It inebe re, wam kuda hangge mene re, uarek funget hugunem he wam kuda weim yabuogeluk funget hugunem hangge lagaikharek.

⁵ It inebe tomkwe andoma telim erik lagunem ineisok abolok he, no kereta weim yabuogeluk lagunem eisok abolok ikherek hangge inom, nen lei ninggi logolik endu amulok ane mimi ikherek hangge inom, hilingiterek. It inebe eratunem he, ap tentara inanini mene nen weim yabuogoluk sinelogo kwagarek andi hangge hilingik.

⁶ It inebe afuni inoba higit wagunem he, it mondogat inoak lei'leik ikheresik, ina'manggen laluk inelokhe heiselharek.

⁷ Iren ap tentara inagoromi kabelek mene nen weim yabuogoluk humusek lagaikharek andi hak lagik, iren tentara inebe leget pa'leget esia'leba harogo lagaluk hukhogo kwagarek andi hak kwigik, ikhi logolik inebe erarogo lakfuluk inelokhoma higit laga logolik, inafe kwani igik, inebe higilagik, agarek mondok lek.

⁸ It kwe louwogeluk laga logolik he, weak-weak lou iluk set kwil-kwalhogo yagaisigi'lek, inanggwe lombok logoinkwe higit-higit lagaikharek. Iren anggilukhogo logalogo laga logolik, leget pa'leget afuni inaselei mene nen inoasi kwi wesinogo iluk kagalek welagaikharek oba a'nogo fikhirat monhilik kugunem, it inanggwe palu re, mondok elo'lek.

⁹ It inebe o kota heimhogo kwi lagaikharesik, leget pa'leget wurik oba esia'le bene lagaikharek. Laluk he, inebe o hobat ma'mu-ma'mu lagaluk, afuni yogot wanuogoluk jendela ambe palekwe nen kwi lagaikharek andi hak kwagarek.

¹⁰ Nen it inebe kwi lagunem he, kweang abolok igik, pogot abolok igik, ikherek. A'nogo ugunem, mo inom tugwi inom mum agik, hesagal yati'lek kamo igik, ikherek.

¹¹ Nen at agoromi tentara omanogo inendawi wenggelogo iluk enegengge re Tuhan ane unggunggu ane hangge supuk ikherek. At agoromi ane hologo weim yafarek mene re inomame mondok hokho mene logolik, inebe esare inenggi wenasu mondok elo'lek. O Tuhan onggwarek awi wei igin andi re, mondok elalin wesa polan awi wei igin. Inenggi andi sambul andi re afuni nen inailo lekhogo hambuget haluk logou re elo'lek asigin o,” iluk yagaisasigi.

Inobabut hebelasuageluk yagaisasikhe wene

¹² A'nogo yagaisasigimo, Tuhan nen ekhe mel isikhe: ”Andiba nen, yogondak he hinendawinggen oba nenat hinambotkwe noba we'ni o. A'nogo wesimbik sumburu ninggi'lek logolik, samban igik, le agik, ikhi logoni o.

¹³ Hiren he, ”Nit weak hilingito iluk hinasu tilibesu fugo, oba nen he hinendawimo warano,” iluk yagaisasikhe. A'nogo yagaisasikhemo, an nen he, mel yagaisigi: ”Hineisena Tuhan Allah andi re obabut sakhorek logolik endawirinafik, a'mage weak-weak lagagi'lek welagik, wene weak mene inoba figi'lek weak hilingitarek mene sagalogo herakfisigik, ikherek andi nen he, hinendawimo waraluk, hinebe hinelokhe hebelogo At woge'luk logoni o.

¹⁴ Hineisena Tuhan Allah nen he, wene hinoba feigeluk endawimo ebete mene andi sebelogo fuluk, hobuk endawimo hunogoat mene ebesimbik, hokhorogo fanothinabigin logou hago. A'nogo fanothinafe halok, hiren anggur inom, gandum inom, hineisena Tuhan Allah faget elok fisikhi logogun aro.

¹⁵ Hinebe misi'mo andoget fuluk, sumburu ninggi'lek logolik, Allah ayonggo fikhi logobagaigen he, tom Sion Allah andom oba andoma nen pinggong ane hokho mene anethambik inayonggo feni o.

¹⁶ Afuni mondogat andogerinapluk he, tegelogo fisani. Ap inaluendek mene inom, yenggerugwi magendek mene inom, omalik eilak oba mene inom, nen it tugum souge ket lambulinafa mene inom ogore, it inebe nogoli'lagwi kwe andoma herak fisaluk wesuak enego.

¹⁷ Nen it ap Allah eisewerek logolik, At faget hilingiri'lagwi mene andoma re, mezbah honggolek, solombon elokhoma mene honggolek tulem andoma nen le asuak. A'nogo le aga logolik, mel uak: Allah henupogot mene, neisena. Hagainafuri hendawirinabin o. Hat honggwarek hangge mene andoma afuni nen weagerinafunem he, it inunggulenu amu mene nen inane asegen wogisikhi logolik, It ineisena Allah re ebe koma werek? iluk ikhi logoinogo,” iluk ayonggo fouwagaluk yagaisasigi.

Allah anggweang ambotkwe fano muli mene hilingfesikhe wene

¹⁸ A'nogo yagaisasigisik were'ma re, At Tuhan nen anggweang andoma endawiratikhesik kweang andoma fanot figik, nen At againafuri endawirinafik hilingisigin anggasikhe.

¹⁹ A'nogo anggasikhesik Aren mel yagaisasikhe: ”Yogondak An nen hit hinalabut ninghogo ninggi logobagaigeluk, gandum inom, anggur inom, e zaitun amusu inom, wokhisagain o. A'nogo wokhisambik, afuni inunggulenu hunogo mene nen inendawimo seramet hinobagali'lagwi mene andi inom, endo yakhinabi'lagwi mene andi inom, arigin hinafi logouwageluk herak hinobagagin lego.

²⁰ Nen, pulue esa abel utara fikhiren elang paluk weri'lago mene andoma hit hinoba nen silogo lakfisagain o. A'nogo lakfisikhi logolik, fena re o Bini leikwe andoma silogo lakfisigik, nen esa attak mene re, i Laut Mati yenggelek higit andoma loageluk miminginafik, esa logalek hobuk mene re, i Laut Tengah andoma tamakhogo lakfisigik, igin o. Iren hit mondok weagethinafa andi nen he, An nen it inebe mondok a'nogo lakfisamo, wa'lasimbik amben mondok weak mene sang igin,” iluk yagaisasikhe.

²¹ Hat kweang yi hailo agi'lek hendawimo hai hikhi logoin o. Hat hobaget Tuhan nen alonghogo hilingite mene andoma ebethikhi logoin.

²² Nen, hit yi mene ti mene lebeti lagep mene andoma re, yogondak yi engga ti engga mondogat sabeli'lago andi nen he hinoba sinurogo logogubo. Nen, e hokhorogo re enggen hokhorogo irik lagik, e anggur enggen inom, e ara inom he sik-pik igik igin andi nen he, hinendawinggen serogo logoino o.

²³ Hit afuni o Sion mene yi, An hineisena Tuhan Allah nobabut fano nen fanothinafi andi nen he, hinendawimo hinagaiyegetik, fogerakhigik, ikhi logoni o. O engga lologo pikherek meneba asi wagunem andem he meiso higithogo wokhisigik. O sogoi lagagu meneba asi wagunem andem he An nen meiso higithogo pelakhisa wagik. Nen, enggen itu sambul meneba asi wagunem he attak wokhisikhi lagagi hakhogo wogisigik, ikhi logogin o.

²⁴ Hobuk gandum enggen keralharek oba hetokhogo kwalogo fogoin. Nen, anggur enggen inom, zaitun enggen inom, sagalogo amusu keralharek oba keralimbik ambem hetokhogo hilinglasigin aro.

²⁵ An nen it pulue esa hokhorogo andi inayonggo figirik lakfisa wagimo re, iren yi tahun ti tahun hinangge yi mene ti mene yago mene enggen weaget faga mene andi, obali'mo wokhisamo fano ninggi logogun o.

²⁶ Hit hobuk he hinamburu oba heilarogo hinalabut ninghogo ninggi logogun. An hineisena Tuhan Allah nen hit faget elalin mene hokhorogo hilingisigin andi nen he An fogetnafi logogun. Afuni ekhe nen nagainafuri inane asegen waganogo hina'malolo kwelakhinafi lagaikha a'nogo re, hobuk andi higit ekhe yagahisikhi logogun mondok lego.

²⁷ A'nogo hilinghinafunem he, hit afuni Israel mene nen An hit hinanggele'ma welagirek mene inom, nen, An nebe hit hineisena Tuhan Allah welagirek mene inom a'nogo furogo hinelu asugun o. Allah amu mene re ekhe werek lek, we An namunek Nebe Allah welagi. Nen, it An nagainafuri mene andoma inenggali asugun lego!” iluk yagaisasikhe.

Tuhan awi wei igin wene

²⁸ A'nogo yagaisasikhesik ekhe mel isikhe: ”A'nogo hilinglasimbik oba nen An nawi andi wei ugunem he, Nareagun hokhorogo afuni mondogat inoba pelagisa wesigin o. A'nogo pelagisa wesumo re inagainafuri ap inom, helime yenggerugwi inom, inomen an nane yagaisikhi logogun. Nen, inaluendek hinanggelekwe logogun mene andoma inabi higik, ap souge inom, helime silerik inom inabikanggoba yagaisigik, ikhi logogun aro.

²⁹ O andem sambul he, An namingmingengge mene ap inom, hemi inom, An Nareagun hokhorogo inoba pelagisa wesigin.

³⁰ O pogoroba inom, kweangma inom, An nen elalin mene hokhorogo hilingisigin. A'nogo hilingitunem, mep eil enek hilinglagik, endu amulok inom, so'le inom foinaluk lagagik, igin.

³¹ O mo mum agik, tugi elokhonggen mep hangge hilinglagik, igin. A'nogo mondogat hilinglasigin andi re, An hineisena nawi esin inailo mene wei igin andi re, oan wei igi'lek werek kwelek attak-attak hilinglasigin.

³² A'nogo meneat he, ap sa nen An hineisena Tuhan nen lebetninabuageluk yaganesugun mene halok enek he An nen mondogat telinabigin. An Tuhan nen ikhi logolik he, An nagainafuri o Yerusalem oba andoma nen wolinafigi mene nek he inagap telinabigin o,” iluk ikhe isikhe.