YOEL 1 - Allah Wene Fano Wene Hupla Inane

¹ Tuhan nen wene ap Petuel amlogo Yoel a'nogo nen yagaisoagaluk oba fesikhe mene re yi.

Afuni Israel mene ineabukwe yi mene ti mene yago omanogo pulue nen nasikhemo inendawimo weak agaikhe wene

² Hit afuni inogogwi kaindek welagep mene yi hinesanggo fanorogo holini o. Nen hit afuni o Yehuda welagep mene hinebe mondogaren futfikhi logoni. Hit welagep oba re yi'nogo hilinglaga mene ekhe werek nogo? At he, hit hinambu hinombalak welagaukwa andem oba a'nogo hilinglagaikhe mene ekhe werek nogo?

³ Wene hilinglaga mene andi faget, hit hinagainafuri inoba pilingisogo yagaisani o, Nen iren ogo it inagainafuri taginabugun mene inoba pilingisogo yagaisikhi logogunat. A'nogo yagaisugunem inelu logolik, iren hobuk inagainafuri ta'larik laga logogun mene wene andi yagaisilik mondok laga logogun aro.

⁴ Pulue esa inenggi wenasu mondok elo'lek mene yonggo palek logalfuluk yabukwe yi mene ti mene yago meneba labogilik laluk, nilik laga-laga andi. It pulue esa attak mene andi nen ando fugu mene re, pulue esa logalek ekhe hobuk waga logolik ninggik, it andi nen ando fugu mene re hobuk ekhe waga logolik ninggik, hilingirik-hilingirik mondok felelenghogo nengga andi.

⁵ Halok he anggur enggen ket mene re hit hinambema nen telogo helaga andi nen he, ”Hit afuni lugulugwi mondok palhi lagep mene yi sani, hineluk a'ni o. Nen i lugulugwi palhu mene nek nunggu welagep mene yi sani, le aga logoni.

⁶ Nen pulue re, ap tentara esa logalfuluk inoasuogoluk wagaikharek hak, ninaiba weaget fouwogeluk arat logalogo wagaikha andi. It inebe mondok hokhorogo, inenggi wenasu re mondok elo'lek mene, inomame mondok hokhoat mene. It inaik enggat he mene singa he mene aik hakhogo enggat mondok werelek kabuk mene.

⁷ It pulue andi nen he, nit mene anggur ero mondok legetfisigik, e ara ero andimi nek hilingfigik, agasik he, enggisok mondogat agap ibilhigik nenggama re, ebe nek kut weak hilinglaga andi.

⁸ Andi nen he, hele tugum mene nen agun helagain iluk endawinggen hundik logolik wenago mene wa'lagunem endawimo weak a'luk, le yagaisogo werek hak, le aga logoni o.

⁹ Gandum inom, anggur inom, nineisena Tuhan awi wuri'mo fisugu mene mondogat leg aga. Andi nen he it ap Allah eisewerek logolik, At faget hilingiri'lagwi mene omanogo le yagaisogo werek.

¹⁰ Gandum ero mondogat weak agik, anggur enggen puk agik, zaitun amusu lek agik, ikhe andi nen he, yabukwe mondogat weak agama kweang endawimo weak agasik afuni wa'lagunem fong watarek andi hak, le ari'lago andi.

¹¹ Gandum inom, jelai inom, yabukwe yago mene enggen palu mene mondogat lek aga andi nen he, hit afuni yabu wanhi lagep mene inom, anggur yabukwe helengga wanhi lagep mene inom he le aga logoni o.

¹² Nit mene anggur ero inom, e ara inom, delima inom, kurma inom, apel inom, yabukwe yago mene ero mondok sawet agik, puk agik ikhemo re, afuni mondogat inendawimo inagaiyekhogo welagi'lek, mondok inabit aga andi.

¹³ Hit ap Allah eisewerek logolik mezbah oba omanogo yabu hilingiti lagep mene yi sani, hinasu karung mene sambuneraluk he le yakhikhi logoni o. Hit hineisena Allah obaget fugu mene anggur inom, gandum inom fuluk wogotu mene mondogat lek aga andi nen he, o hup inukhogo andoma le agu mondok logobagaigen he o Tuhan awi wuri'mo andoma kwikhi logoni o.

¹⁴ Afuni mondogat yagaisaluk he inambe heang logouwageluk yagaisano, It afuni kaindek welagaikharek mene inom inogogwi inaluendek mene inom, it afuni Yehuda mene inebe mondogat inom, o Allah awi wuri'mo we'luk Aren lebethisoageluk ayonggo fikhi logoino o.

¹⁵ O Tuhan awi mondok inali'liphogo hilingisigin oba a'nogo horogasi waga, At Omame Mondok Hokho mene a'nogo nen legetfisagain oba horogat asi waga.

¹⁶ Nit ninamburu nunggu mene ninelokhoma nen lek agik, Nit nineisena Tuhan Allah awi wuri'mo nen ninagaiyekhogo ninanggilugetu mene lek agik igin o.

¹⁷ Yi mene ti mene enggen feik lakfugu mene kweang iringigen he wa'lagik, gandum palogo fuguba omanogo obalik enek hilinglagik, ugunem he obalikwe omanogo mondogat weagarik lagain.

¹⁸ Yi wam, ti wam endawimo mondok weak logolik inane kweti logogun, O leikwe engga na mene mondogat legasumo re domba esa logalek omanogo re elo'lekhogo logogun o,” iluk yagaisasikhe

¹⁹ A'nogo yagaisasikhesik Tuhan oba ikhi logolik he: ”Tuhan neisena. Lei nen nunggunem engga mondogat lek agarek andi hak, o leikwe engga mondok puk agik, yi agayo ti agayo endu nen ninggerek hak mondogat puga'luk wa'lagik, ikhe andi nen he, lebetnisan o, iluk nane hokhorogo nelagaik naneba yagaheti o, neisena.

²⁰ Nen, wam maro inom, paik inom, mene olomene inom, enggama welagarek mene ogo re, Haren leberisoageluk hayonggo fili'lagwi aro, neisena. I mondogat firok igik, o leikwe engga mondok puk agik, ikhe andi nen he, hayonggo fili'lagwi andi o,” iluk ayonggo figi.