YESAYA 9 - Allah Wene Fano Wene Hupla Inane

¹ A'nogo hilingisumo re afuni inunggulenu lombok o mum oba logogun mene andoma re, ombak-bagen selegeratunem hogoin o. Nen, it ekhe wa'lasugun oba horok asi lagaikhasik werek mene ogore selegabet fisamo re selek oba logogun aro.

² Tuhan neisena, Haren it inoba inagaiyek hokho mene hoageluk hilingfisikhi lagen, nen afuni nen enggen ugu palek mene kabogeti logolik inom, hugulengge suburikhi logolik inom, inagaiyek hagarek hak it wonoget fakhoageluk harenat hiling fisikhi lagen.

³ Harenat it inoba enggin mene waganogo figik, it inomoloba e ha'luk lagaikharek mene korogo figik, ikhi lagen. Haren o attak andoma ap tentara Midian mene mabenet fisasigin hak, it inunggulenu ekhe mene nen hat hagainafuri yi enggin ti enggin inoba fikhi logolik were'ma haren mabenet fisambik telinabigin o.

⁴ Sepatu ap tentara nen igisogo lagunem abolok folongum-folongum ikherek andi inom, it inasu mep labulik mene inom he endou nen mondok alkan kurogo nagain.

⁵ A'nogo andi re nit ninobaget omalik misik ekhe ta'laga. Nen Omalik andi ebere abat wo'nisikhe. Nit ninobaget ninoe kain he At amuat logogin. A'nogo were'ma At enu re mel ikhi logogun, ”Endawinggen wenggelek mene logolik, afuni komorinafu mene,” igik, ”Allah elalinhogo hilingiterek mene,” igik, ”Nineisena mondok-mondok logogin mene,” igik, ”Raja liolninafu mene,” igik, ikhi logogun.

⁶ At ebe re Daud en tagomangge mene ebe raja logolik ferinarek logogin. At omame mondok hokho logogin. Aren ferinarek logogin kwe andoma mondogat he liok-layokhogo nek were'ma mondok fanorogo logogun. O Aren ferinarek logogin oba andi re wene higithogo tegetu awene inom, wene melalek werek meneba inom higithogo hilingitu logolik yogondak huli nen hobuk huli andoma mondok-mondok logogin. Nineisena Tuhan Omame Mondok Hokho mene a'nogo nen andoma mondogat eberogo nek hilingisigin o,” isikhe.

Tuhan nen Israel mene wene inoba fagain isikhe wene

⁷ Tuhan nen afuni Israel mene weak mondok hilingitunem wene inoba mondogat fesikhe.

⁸ A'nogo fesikhe andiba re it inunggulenu Israel mene inom afuni Samaria mene inom he Tuhan nenat hilingite iluk inelurogo logogun. Yogondak he iren foget fakhaluk inendawimo leget fakhikhi logolik yi'nogo ili'lagwi:

⁹ ”O kweang tangge werago meneba wurik mene omanogo re mondogat lobakhogo pikhe, oba nen he niren helep meneba o ket mene wusugun. Nen e ara hokhorogo wilibik mene omanogo mondogat mutaba nen he, e laik fano mene o Libanon agayo omanogoba kigilogo obali'mo wusugun,” ili'lagwi.

¹⁰ Tuhan nen it inoasigiluk inaselei mene omanogo inendawimo hilingiri'lago.

¹¹ It inunggulenu Siria mene mo ero fikhit welagaikharek mene inom nen it inunggulenu Filistin mene mo ubuk ikherek fikhit welagaikharek mene inomen he Israel mene omanogo mondogat kululunghogo pilisogoin iluk hilingiri'lagwi. Oba nen he Tuhan a'mage it inoba fugu mondok were'ma re eberogo nenat he unggum inoba fagain.

¹² At Tuhan Omame Mondok Hokho mene a'nogo nen it Israel mene inoba unggum wogisikheba nen he, it inendawinggen warili'lagwi lek. Nen, iren inobabut agamhogo at oba weri'lagwi legat.

¹³ Andiba re linggene misik oba nek he Tuhan nen it Israel mene inogogwi ferinarek welagaikharek mene inom afuni holharek mene inom unggum wogisagain. Aren he inunggul inom, inagenggum inom tegethigik hugisagain.

¹⁴ Inunggul paligin andi re ap kaindek inomame werek inap omanogo, nen inagenggum he it nabi ineranhogo wene yagaisagarek mene omanogo.

¹⁵ Afuni andoma inogogwi ferinarek welagaikharek mene nen he, it inunggulenu andi mene inendawinggen nong-hong isigik wene weak mene yagaisigik, hilingiri'lagwi.

¹⁶ Ma re it inunggulenu andi mene re, mondogat Tuhan herakfuluk lagik, nonghong igik, hiling lagaikha, nen it inane ugu mene andoma mondogat he kwanirogo nek ili'lagwi. Andiba re, it ap souge mene inanggele'ma nen he, Tuhan en misik iluk ogo ekhe tindel fisagain mondok lek. Nen, aren he it hemi sogwe inom yenggerugwi suarek mene inom endawirinabigin legat. It he, At Tuhan a'mage lagagunem he eberogo nenat unggum inoba fagain aro.

¹⁷ It inunggulenu andi mene nen weak hilingitunem he engga alok-alogengge mene lei ninggi logolik supuk tololang eterek andi higit hilingiri'lagwi. Endu amulok he o engga lei nilik laga logolik so'le mone'luk lagaikharek hak hilingiri'lago.

¹⁸ Tuhan Omame Mondok Hokho mene a'nogo a'mage mondogat lagaikhemo re Aren unggum he: Afuni inunggulenu andi mene endu eilem warek mene hak hilingi'mo At anini a'nogo re endu amulok yelang-melang ninggerek andi hak lagagunem he, ap misigen ogo it andi nit ninagaila'lak mene iluk inendawirinabumo re elo'lego.

¹⁹ O kweang andiba mondogat andoma re afuni nen yi mene ti mene helaluk, nenggarek mene omanogo re iren nili'lagwiba nen he inoba homot fisili'lago lek. Ariginhi logolik he it inonggwarek inagaila'lak mene oba nen ogore nili'lagwiat.

²⁰ Ap Manasye mene inom, Efraim mene inom he inebe wat-wat laga logolik he, it inebe misik sebe'luk Yehuda mene inoasugun iluk hilingiri'lagwi. Oba nen he, Tuhan a'mage oan lagagun he eberogo nen unggum inoba fisagain aro,” iluk isikhe.