YESAYA 8 - Allah Wene Fano Wene Hupla Inane

It inunggulenu andi mene fut fouwageluk enengge Yesaya omalik ta'lasigin iluk yagatikhe wene

¹ Tuhan nen an yaganeti logolik, ”Helep hokho mene lisu palogo fugu mene ekhe wanimbik he lisu obalik hokhorogo yi'nogo palfeino: ”Sorom weak-weak laluk he, yi mene ti mene weak-weak telhu mene,” iluk lisu palfeino o.

² A'nogo palfuluk he ap imam inebe pire mene ineilhanem palfoumo re inelu logouwageluk it inendawi werek mene hun Yeberekhya amlogo Zakharia inom Uria inom emberek andem inayonggo feino o, iluk yaganete.

³ A'nogo yaganetesik oba nen eil misik were'ma nen he an nagwe omalik a'ma agasik omalik ebe ta'lagama re, Tuhan en an noba ikhi logolik he, ”Omalik andi enu re Sorom weak-weak laluk he yi mene ti mene weak-weak telhu mene,” iluk salino.

⁴ Andi re omalik andi ebe oan alue a'luk ’Neisena’, ’Nagaisa’ igi'lek werek kwelek he afuni Damsyik mene inangge yi mene ti mene mondogat hugul helaluk raja Asyur mene wogosi logoin andi nen a'nogo hilingi'no o,” iluk yaganete.

Raja Asyur mene wagaikhe wene

⁵ Tuhan nen nekhengge an noba ikhi logolik,

⁶ ”Afuni yoma nen he i Syiloah aganhan mene ane legengge agum puakhogo lagarek agai a'nogo herakfisagasik he iren inoe raja Rezin inom raja Pekah inom faget inagaiyegeri'lagwi.

⁷ Andi nen he An Tuhan en raja Asyur mene inom, agoromi tentara inomen it afuni Yehuda mene hinoasuageluk inayonggo fisaluk lakfisa wesigin. It wesugun mene andi re i Efrat fu laga logolik i esanggokwe sengseng lagarek andi hakhogo hit hinebe sebelhinabi wesugun o.

⁸ It wesimbik he i fu hetok-hetok lagakhi logolik inalonggop huli lagaikherek hak yi mene ti mene mondogat sebeli wesugun, Nen it inebe seralogo mamingisi waga logolik o kweang hit hinawi hinebe welagep oba andoma fena minggilogo sebelhinabi wesugun o, iluk eberogonenat u hak he Imanuel igi andi.

^9-10 At Allah ebe nit ninom hundik logolik fetninarek andi nen he, hit afuni hinunggulenu lombok o unggut-unggut welagep mene andoma hinesanggo fanorogo holini o. Hiren ninoasugun iluk esa logalugun oba nen he hinailo agik, hinoak elekwe legetik, hilingiti logolik logogun o. Ninoasugun iluk hinasikhe lithaluk logoin oba nen he hinailo nen igik hilingisugun. Yi'nogo ti'nogo hilingisugun iluk wene ayo palimbik logoin oba nen he we sugwi nek asigin. Hiren hilingisugun iluk hinane katokhogo masugun oba nen he we tulemat hilingisugun o.

Tuhan nen Yesaya endawimo wenggelogo uluk yagatikhe wene

¹¹ Tuhan ane omamerogo an noba ikhi logolik he, afuni inunggulenu andi mene nen inobabut hilingiri'lagwi andi hak, an nen ogo it inobabut waganogo hilingiti hanogoluk nendawimo eberek logouwageluk,

¹² yi'nogo yaganete, ”It andi inebe misik sebe'luk inane masugun mene andi faget hiren eberogo iluk angga fugo. Nen, wene a'nogo agunem it inailo a'luk hilingiri'lagwi mene andi re haren hailo agik, hendawimo youk igik u fugaro.

¹³ An heisena Tuhan Nomame Hokho logolik Horek mondok welagirek mene a'nogo noba tiphogo logolik, we An Noba nek hailorogo logoino.

¹⁴ An nebe Mondok Horek welagimo re, An Nebe it Yehuda mene inom Israel mene inom ineisok tunghogo warikhi logouwageluk hilinglagagi andi, nen afuni Yerusalem mene re hele yepsek'ma ke'nok agarek a'nogo hak hilinglaga logouwageluk agagi.

¹⁵ Afuni inebe hokhorogo re ineisok tunghogo warigik, inebe inagambut palogo inoatik, nen yepse'ma ke'nok igik hilinglasugun o,” iluk yaganete.

Heinogengge anema wanhi logogun lek isikhe wene

¹⁶ Nagainafuri e, yanggulhinafi lagi mene andoma hinesanggo fanorogo holhi logoni. Nineisena Allah nen yi'nogo hilingi'no, ti'nogo hilingi'no iluk yaganisikhe mene andi ekhe pelakfigi'lek foukhogo fisogo logoino.

¹⁷ Tuhan ebe At againafuri Yakub en tagomangge mene inoba nen hina'lagaba nen he an nen hobuk fano asigin iluk At oba nendawinggen himbirik logolik mondok welagi o.

¹⁸ An nagainafuri ninom afuni Israel mene nen futninobagauwageluk enegenggere nineisena Tuhan Omame Mondok Hokho mene Andom Sion oba welagarek mene a'nogo nen ninayonggo fuluk la'ninobagai wagama welago ari o.

¹⁹ Oba nen afuni ekhe nen yi'nogo yagahisogoin, it heinogengge nen inambe lebetik, inane nguluk habuk igik agarek mene andoma inoba heinok woginabi lani. Ninebe nineluk welago mene faget heinogengge inoba laluk he ap warek mene heimenggeba inanema woginabi lamo higit nogo a,” iluk yagahisogoin o.

²⁰ A'nogo yagahisugu halok he, hiren onggo yi'nogo yagaisano, ”Tuhan nen wene yaganisikhe mene andi hinesanggo holini o! Ap ekhe wene yaganisasikhe mene andi higithogo agarek lek mene halok he, hobuk ninggi'nogo hilinglasigin iluk obakhe palegat werego,” iluk yagaisano.

Enggin-fenggin inoba asigin iluk isikhe wene

²¹ Afuni ekhe yi enggin ti enggin inoba agik, sumburu nele agik, hilingisugun mene andi re o kweang andomaba ya lagik ta lagik, hilingiti logolik logogun. It a'nogo hilingiti logolik inamburu nele nen ina'makwe het periluk he inoe raja oba inom it ineisena Allah oba inom homan fisikhi logogun. A'nogo hilingiti logolik he ineil nayo hayo yi kwe ti kwe kumuthigik,

²² pogot liakhigik kweangma pelakhigik hilingisugun oba nen he, amu mene ekhe hogoin lego, we yi enggin ti enggin inom sumburu ouwak agarek mene inom, o mum mene hilingi'mo inendawinggenmaet yegelik ikherek mene inom enek were'ma hikhi logogun o. A'nogo hikhi logolik were'ma hobuk it inebe o mumse'ma andoma hugisa lagain.

²³ Oba nen he afuni o andoma mene yi enggin ti enggin a'nogo nek hikhi logogun lego. Afuni inunggulenu Zebulon mene inom, Naftali mene inom werekwe yi awi ti awi andoma re attak nineisena Tuhan en sebelek hak werek iluk anggasikhe. Oba nen he, hobuk logogun oba andem he o Wilayah Laut Tengah andoma nen he mo liabi wagarek fikhit he i Yordan huli nen pikhit o Galilea afuni inunggulenu amu mene were'ma andoma huli re Aren enu werek hilingfagain o, iluk yagaisasikhe.