YESAYA 7 - Allah Wene Fano Wene Hupla Inane

Wene misik raja Ahas faget isikhe wene

¹ Raja Ahas hun Yotam amlogo Uzia omba andi re afuni Yehuda mene faget raja logolik ferinarek were'ma nen weim kagal agaikhe. Raja Siria mene Rezin andi inom raja Israel mene hun Remalya amlogo Pekah andi inom, misi'mo sebetukwasik Yerusalem mene inoasugun iluk weim kwi wagaukwa, oba nen he iren o kota a'nogo sebeli ku elo'lek agaikhe.

² Afuni nen ikhi logolik, ”Ap Siria mene esa fologo afuni Israel mene were'ma kwi wagaikhasik inom mangotha ugunem raja Ahas inom, afuni mondogat omanogo inom inesanggo holhukwasik inailo hokho mene agaikhemo re e wilibik mene sogoien funhugunem leigeterek hak inoak leigeti lagaukwa.

³ A'nogo hilingitukwama Tuhan nen Yesaya ba ikhi logolik, ”Hat hebe inom, hamlogo Syear Yasyub inom he raja Ahas ebe ebekwe i mogo yenggelek oba angwe halogo kwelabe'ma nen ambol fikhit su eil munenhigik kwaterek oba andem werek a'naga hinom ambiasubagaigen lan o.

⁴ Lambik yagati logolik he, ”Hendawinggen hambukhogo logolik hafe hebelogo logoino. Hailo a'luk ninggi'nogo hilingisigin iluk nonghongge hilingisu fuk. Raja Pekah inom, Resin inom, it inagoromi tentara o Siria mene andoma re we elo'lek hangge, endu aro pire meneba nen amulok legengge so'le nek irop arophogo lagaikherek andi hak werek.

⁵ Ap Siria inap andi nen he it Israel mene inom inoe raja inom mangotasik hit weaget hinabugun iluk hilingiri'lagwi.

⁶ Iren he o Yehuda ba andoma weim kwi lamo re afuni o andoma werek mene inailo asimbik it inebe nit ninebikhit asi wagunem he hun Tabeel amlogo andi raja logouwageluk menfogoin iluk hilingiri'lagwi andi o.

⁷ Oba nen he An hineisena Tuhan nen yi'nogo yagahisak, ”Iren yi'nogo ti'nogo hilingisugun iluk wene ayo palogo fili'lagwi mene andoma re ebe asigin lego.

⁸ A'nogo andi re o Aram mene ibu kota re o Damsyik andi at logogin, nen o Damsyik andi mene inoe raja re Rezin menlasigin. Nen aren ferinarek logogin kwe andoma re ekhe inom higilha wulibigin lek. Inenggi we 65 tahun wela'luk he it Efraim mene ogo inebe lalfal isaluk weagerinabumo re, it inunggulenu andi mene ekhe werek ikhi logogun lego.

⁹ Afuni Efraim mene inawi kota eroma re o Samaria, nen hun Pekah re Samaria mene faget inoe raja werek andi nen he, hiren An noba tiphogo logogun lek halok eberogo nen he hambukhogo logogun lego iluk ikhe, iluk yaga'no,” isikhe.

Fut fouwageluk enegenggere Imanuel ta'lasigin iluk yagatikhe wene

¹⁰ Tuhan nen Ahas oba wene ekhe yi yagatikhe:

¹¹ ”An heisena Tuhan Allah nen he haren eberek logoinogeluk enegengge, o afuni wa'la'luk lagaikharek oba andoma nen hea athe pogoroba nen hea ekhe hilingisigin nen he kino yaganom o,” iluk yagatikhe.

¹² A'nogo yagatikhemo at Ahas nen onggo yi'nogo isikhe, ”An nen neisena Tuhan hobabut paligin he nabiro, nen enegengge ekhe hilingnobagain iluk yagahesigin legaro,” iluk isikhe.

¹³ A'nogo isikhemo re at Yesaya nen ikhi logolik, ”Ariginik halok he, hun raja Daud omba yi, wene yi hesanggo fanorogo holin o. Haren he afuni inoba lombukhogo were'ma nen inobabut palogo inendawinggen kagalhunem inabit ari'logo andi elok anggikhi logolik, an neisena Tuhan ferekhogo hilingiterek lek mene a'nogo obabut palhunem abit asuageluk hilingiti lagen a?

¹⁴ Haren a'nogo egen oba nen he yogondak Tuhan amu nen hiren futfouwageluk enegengge ekhe hilingisigin werego. Hele silerik mene ekhe omalik a'ma lasimbik omalik abengge takhagain o. Takhamo re enu Imanuel salugun.

^15-16 Omalik andi ebe alue agik, endawinggen wurik agik, At amu nen wene tegeti'lek werek kwelek andem o kweang andomaba re yi mene ti mene sik pikhogo logogin. Oba nen he a'nogo logogin oba andi oan asi wagi'lek werek kwelek, ap raja pire hailorinafi lagen mene andem o iren ferinarek oba andoma oboget isaluk wilibumo re, inareng mondogat legasugun o.

¹⁷ Oba nen he, Tuhan nen raja Asyur mene ayonggo fuluk inoba lakfei wagunem he, hat hebe inom, hagainafuri ferinarek welagen mene andoma inom, hat heisok erokwe mene inom hinebe mondogat yi enggin ti enggin hinoba fugunem hogoin. Attak nit afuni Israel faget raja misi'mo logolik welagaukwaba nen, hobuk he, Israel mene inale'ma, Yehuda mene inale'ma, minggilagaikha andi huli nen yogondak huli enggin-fenggin a'nogo ekhe hogorek lek mene hogoin o.

^18-19 A'nogo hilinginabugun sambul andem he Tuhan en tentara Mesir mene inom Asyur mene inom inayonggo fuluk inoba lakfei wesumo re, sobon inom kin inom mondok hokhorogo elang paluk o tonggokwe inom, helep elekwe inom eiseli lagarek andi hak it inebe wesimbik he, alok alogengge wilibikwe inom, somun kwe inom mondogat sebelogo fisa wesugun.

²⁰ Tuhan nen raja Asyur mene ayonggo foumo re, aren he ap inesi inom inomboro inom, inomosi inebene inom hogologo palogo hugisagarek andi hak hit Israel mene ogo a'nogo weaget hinabuageluk hilingisigin o.

²¹ Andem sambul he, afuni ekhe inanggo sapi ket kotorek mene misik ekhe inom nen kambing pire inom, takhugu halok he,

²² eilak amusu re afuni fena o andoma logogun mene inebe higithogo ninggi logolik logogun. It andi re eberogo eilak amusu inom kin amusu inom ninggi logolik logogun.

²³ O andoma afuni inebe lombok ineabumo anggur ero 1.000 nen uang perak mene 1.000 nenat oba onggo palogo yata mene werek oba nen he hobuk engga alok alogengge wilibimbik mondogat sebelogo fagain.

²⁴ A'nogo hilinglasigin andi nen afuni ekhe o andoma louwogeluk halok he inasikhe inandok herap palogo helaluk laga logogun.

²⁵ Nen, o tomkwe mondogat andoma re yabu wanhik, yi mene ti mene awi yatik, agarekwe omanogoba nen he engga alok alogengge mene hokhorogo wilibimbik mondogat sebelogo fagain. A'nogo hilingfoumo it afuni re inailo nen o andoma waga logogun mondok lego. O andoma wam sapi inom, domba inomen engga ninggi logolik logogun,” iluk isikhe.