YESAYA 6 - Allah Wene Fano Wene Hupla Inane

Allah nen Yesaya nabi logouwageluk ayonggo fesikhe wene

¹ Tahun hun raja Uzia ebe wa'lagaikhe andiba re, Tuhan ebe takhta mondok fano mene uanhogo wurogo liabek meneba hurek were'ma, asu jubah su a'nogo re o Tuhan Awi a'nogo abirengge salogo were'ma neilenggen higi.

² A'nogo were'ma era'lukwe haningisogo andoma re it ineluk welagaikharek mene it inebe re endu amulok hangge hilingi'mo re inebe lombok inagerabul falfaligen werek mene were'ma isigi. It inebe lombogen inagerabul pire re inelokhe salek welagaikha. Nen, pire ekhe re inebe salek welagaikha, nen pire ekhe re tarogo lagu mene faget langhogo welagaikha.

³ A'nogo logolik it-it inane mondok hokhorogo ikhi logolik he, ”Horek mene, Horek mene, Horek mene. Tuhan Mondok Homame Hokho mene. Kweangma yikwe tikwe mondogat he Hat Homameba nek sagarek welagen o,” iluk fogerati lagaikha.

⁴ A'nogo fogeratunem it inane nen he o Tuhan Awi hulu talek mene a'nogo leigeti laga. Nen, o andiba re endu so'le nen peterogo hilingik welaga.

⁵ A'nogo hilingigen he an nen ikhi logolik, ”Egi, an nambeba re weak mene nek ikhi lagi, nen nebe ogore afuni ineranen wene nek agarek mene omanogo inanggele'ma welagi hilingi'mo re, weaget nabiginat higi! iluk ebetirigen, ariginik welagiba nen At Tuhan Omame Mondok Hokho logolik, ebe Raja werek a'nogo an neilenggen nen tukhumhogo arat higi omare agwi,” iluk igi.

⁶ A'nogo igirik were'ma nen, it ineluk welagaikharek mene omanogo misik ekhe nen endu ambisang mezbah yi mene ti mene Tuhan obaget fuluk nolhuba omanogo nen faba hamborogo waluk tarogo an nambit waga.

⁷ Wagasik he endu ambisang a'nogo an nambeba taunget fikhesik yaganeti logolik mel ikhe, ”Kwelakhan, endu ambisang yi hat ambeba arat taunget hobagagi ari. Ma re yogondak he haren weak hilingiti lagen mene inom, kwanirogo hilingiti lagen mene inom omanogo re Tuhan nen arat leget hobagaikhe o,” iluk yaganete.

⁸ A'nogo yaganetunem Tuhan ane ugu mene an nen holhugunemen he, ”An nen ap sa ayonggo fembik lak fagain he. Nit ninane waluk lagu mene re ap sa asigin,” iluk ugunem an nesanggo holhirik an nen ikhi logolik, ”An nebe welagi yi o. Anat la'nobagain,” iluk igi.

⁹ A'nogo igimo nen aren he againafuri wene yi'nogo yagaisa lano iluk yaganete: ”Hiren An nane ugunem hinesanggo holhi logogun oba nen, futfikhi logogun lek. Nen, hineilenggen hikhi logogun oba nen he ebe yi'nogo asigin mene faget agama iluk futfigi'lek hinonggorat logogun o,” iluk yagaisoageluk yaganete.

¹⁰ A'nogo yaganetesik ekhe ikhi logolik he, ”A'nogo hilingitunem it ineilenggen higik, inesanggo holhik, futfigik, uluk it inobabut hebella'luk he An noba inambotkwe wagunem, An nen it inebe fano hilinginafi hanogore, inendawinggen helep hak harot fisigik, inesanggo tagumet fisigik, ineilenggen humun fisigik ino o,” iluk yaganete.

¹¹ A'nogo yaganetemo an nen he, ”A'nogo nek hilingik werek kwelek huli ki huliba nen iren futfogoin nogo?” iluk heinok wokhigi.

¹² A'nogo wokhigimo aren onggo ikhi logolik he, ”An nen it inawi kota andomaba nen mugusogo o yatma lakfisamo re it inawi eroma andoma re afuni inareng tiring tereng igin o.

¹³ It inebe 10 nen mene logogun oba nen ap misik ekhe o kweang andiba logogin halok he eiloak legasiginat. Oba nen he e wein mugusogo lakfugu mene andimiba nen asimit suphogo lagaikherek andi hak, afuni inunggulenu andi mene alinlan ekhe logogun mene re, hobuk An nagainafuri a'luk inebe horek mene logolik enogo logogun mene erorasugun aro,” iluk yaganete.