YESAYA 59 - Allah Wene Fano Wene Hupla Inane

Inunggulenu andi mene inaweak omanogo nabi nen homan ikfisasikhe wene

¹ Hiren anggikhi logolik, Tuhan nen nit telninabu mene re omame lek angga fugo, athe woletunem hinane holu esanggo tagum angga fugat.

² Hit hinonggwarek hinanini mondok weak hilingik welagep andiba re, hiren samban ikhi lagep mene re Aren esanggo holi'lago lek andi. Hit hinaweagenat hinebe Allah hinom eil uanhogo welagep.

³ Hiren hineranhogo wene igik, henarogo lalinafik, hinomameba weak mene inoba hilingfisigik, ap pinggi inoatik, hilingiti lagep mene andi re mondok weak mene hilingiti lagebo.

⁴ Hiren wene ero lek kwelek hinane hokho a'luk katokhogo hilingiti'legengge aiyo wurogo eneti lagep. Hiren he, hineranhogo wene ikhi logolik, ebe lek mene omanogoba himbirik welagep, hiren ap amu mene alomarogo fisogoin iluk wenggelogo figik, hinaniniba nek hilingitik, hilingitu welagep.

^5-6 Hiren hinanini inoba fogoin iluk wenggelogo fikhi lagep andiba wa'lagaikharek mene lisogo kwelabi wagalagep mene andi re kisu aik palinaferek mene enggen tagoma hak hilingik welagep. Enggen andi sokhugunem he kisu ebe wulibi wagarek. Hiren hilingisugun iluk ikhi lagepkwe andoma re yaningh haning hilingi'mo re ap kwe andiba lagaikharek mene re fanorogo laga logogun lek.

⁷ Hiren hundik-hundik kwanirogo hilingitarek mene nek wenggelhi logolik he hilingisugun iluk weak-weak hilingiti lagep. Hinendawinggen misik a'luk hiren ap weak hilingitu lek mene inoati lagep. Hiren laga lagep kwe omanogo re weaget figik, meisalogo figik, hilingisugun mene a'nogo nek eilem-eilem hilingiti lagep.

⁸ Hiren hinebe misik sebe uluk werek mene faget hilingiti lagep lek, hiren hilingiti lagep mene andoma mondogat he katokhogo hilingiti lagep lek. Hinanggwe laga lagepkwe andoma re yaning haning hilingi'mo re ap kwe andiba lagaikharek mene re fanorogo laga logogun lek.

Inunggulenu a'nogo nen inaweak fagetukwa wene

⁹ Inunggulenu a'nogo nen Allah ba ikhi logolik, ”Afuni nen nit sebelogo ninobagagunem Haren nenahalok ninagap telninafigin lek, iluk ebeti lagagu a'nogo re, yogondak nit ninelu ari'logo o. Niren he selek asuageluk nenangot ikhi lagoba nen, we mum enek hilingik werek.

¹⁰ Nit he, ap ineilenggen humunik mene nen hakhogo yafak-tafak hilingitu welago, o lingge tulem hilingik kwelek oba nen he, hup tulem hakhogo niren tung-tungengge hilingiti lago, afuni ineluk mene inanggele'ma nen nit he warek higit welago.

¹¹ Nit he ninailo nek a'luk ninendawimo heiselhunem welago o, niren higithogo hilingitarek mene herati lagoba nen were'ma hikhi lago lek, ninagap telhu mene faget eberek welagoba nen we tulemat hilingiti lago.

¹² Nit ninaniniba hilingiti lago mene andoma re eberogo nen he Hat helokhoma hokho-pokhorogo werek, nit ninaweagen ninonggwarek weaget fakhikhi logo. Niren he, ninaniniba hilingiti lago mene andoma faget eberogo aro iluk futfikhi lago, nen ninonggwaregen weak hilingiti lago mene omanogo re eberogat ninelu ari'lago.

¹³ Nit he taganhogo hilingiti logolik Tuhan hane oak sagalogo fuluk hilingiti lagoma re, nit nineisena Allah a'nogo hombo'ne waga lago lek andi o. Niren he ap amu mene sebelogo fisikhi logolik lalfalhogo hilinginafi lago, niren wenggelhi lago mene andoma re nonghongsek mene nek wenggelhik, ninane ogore lalinafu mene nek igik, ikhi lago.

¹⁴ Wene melalek katokhogo hilingitu awene omanogo esanggoma higilogo figik, nen elalhigin mene omanogo filikhogo yatma lakfigik, ogo. Afuni hokhorogo inanggele'ma nen he, higithogo hilingitarek mene omanogo seramet figik, ninendawinggen sakhorek oba hilingitu aple omanogo re esanggoma higil figik, ogo.

¹⁵ Ap higithogo hilingitu mene re ekhe werek lek, nen ap sa nen inanini mene nek hilingisugun mene faget melalhu werek mene andi re, at onggwarek aniniba hilingitarek mene omanogo elema kwalasi kwili'logo o,” iluk fakhogo samban isikhe. Tuhan nen eilenggen hikhe re, katokhogo hilingitu mene a'nogo le'ma hikhesik At mondogat abit anggikhe.

Tuhan nen againafuri inagap teligiluk fik-foukhogo werek isikhe wene

¹⁶ It ekhe nen menlasi we'luk inebikhit agaikharek mene a'nogo, ekhe werek le'ma hikhesik he Tuhan oba fogikhe. Andiba re At onggwarek omameba re it inagap telinafik, inalonget fisigik, ikhe.

¹⁷ Aren he katokhogo hilingitu mene inom, inagap telhu mene inom a'nogo re, su posiemanggen mene hangge hilingisogo figik, nen, unggul topi re baja mene hangge hilingisogo figik, ikhe. Aren he, it inebe hilingik mene andoma halfisigik, katokhogo hilingitu lek mene andoma unggum wogisigik, hilingisigin iluk wenggelhe.

¹⁸ Aren aselei mene omanogo iren hilingitarek mene andoma higithogo unggum wogisagain. Nen, inunggulenu mene i alonggen kwe yatkwe welagaikharek mene ogore Aren unggum wogisagain mene andiba nen wulibugun mene ekhe werek lek.

¹⁹ At omame werek aple inom, esinet fagarek mene inom he, afuni mondogaren mo eroma nen he, erumbul fikhit andoma huli inailoti logogun. At ebe wagunem he, i eil omamerogo wagarek hak, athe sogoi omame nen i agum foinak lenggak hikherek hak hilingirik wesigin.

²⁰ Tuhan nen againafuri inoba ikhi logolik, ”An nen hit hinebe mondogat hinaweak oba nen hinobabut hebelugun mene o Sion oba andoma hinagap telogo hinobagaigiluk wesigin o.

²¹ An nen hit ninom wene wasimbik, hit hinoba re An nomame inom, Nawene melalek yagahisikhi lagi mene andoma inom mondok-mondok faget wokhisagain o. Hiren he, hinagainafuri inoba yagaisikhi logoino, nen, iren ogore it inagainafuri tagomangge mene inoba mondok-mondok andoma yagaisilik laga logogun aro,” ikhe iluk yagaisano isikhe.