YESAYA 54 - Allah Wene Fano Wene Hupla Inane

Allah nen Israel mene inoba endawi hundik hilinginafikhe wene

¹ Yerusalem, attak hat he hemi abili mene hangge logolik, omalik taginabu re elo'lek hilingik welagagin. Oba nen yogondak he hagainafuri hokho-pokhorogo were'ma, hemi inaguni nen herakfisugu mene inagainafuri inebe oan yenggerek werek kwelek, hat hagainafuri nek he hokho-pokhorogo hilingik andi nen he, hanggilugeti logolik, hagaiyekhogo wuni wati logoin o!

² Hat hebe welagen oba andoma elonggo wogolha wulipluk he hawi tenda wurilogo salino o, hele homatu mene re uanhogo lisago homakfuluk pebuk he omamerogo telogo pelabino!

³ Hat hebe re sagarogo wialarik laga logolik pikhit kwe wialagik, harekwe wialagik, igin o. Afuni hat mene re it inunggulenu amu mene inanggweangma andoma logogun, nen o kota-kota yogondak ap werek lekwe andoma re irenek sebelek logogun.

⁴ Hat henggalirogo hilinghobagagun lek enggere hailo su fugo, nen inane aik weak wenakhetik, yinggilogo hilinglagik igin mondok lego. Hat hebe sougwe logolik tiphogo hilingiti lagagin lek mene omanogoba honggoragik, nen hane tingi tongorogo welagagin mene a'nogo oba ekhe ebet higi'lek welagik, igin o.

⁵ Hebe elalhafe mene andi re hagun higit asigin, Israel ineisena Allah amu horek mene andi re hagap telhafu mene asigin. Tuhan Omame Mondok Hokho mene iluk enure andi, At he Allah o kweangma yoma mondogat Enupogot welagarek mene.

⁶ Israel, hat he aben agwe ket tugum engge herakfisugunem, endawinggen warikhi logolik hilingiterek a'nogo hak hilingik welagen o. Oba nen he Allah nen hat nekhengge wolhafi logolik, ane yi'nogo ili'logo,

⁷ ”We eil misik ya faget An nen hat hobagaluk welagi o, nendawinggen mondok hundik oba An nen hat nekhengge wokhabigin o.

⁸ An na'mage hat hoba figirik, we elama faget hebe obokhogo hobagagi o. Oba nen An nendawi hundik mondok hilinginafirek mene a'nogoba nendawi hundik hilinghafi lagi o,” iluk Allah hit hinagap telhinaferek mene a'nogo nen ikhe.

⁹ Ane ekhe inom ikhi logolik, ”Nuh welagaikheba aremnogo An nen wene wati logolik, hobuk ekhe i fu waga logolik kweangma yenggeli wesigin lego isigi hak, yogondak ogo An nen nanini hit hinoba figik, inoasigin iluk hinanggomo palhik, igin mondok lego.

¹⁰ Tom-tom andoma inom punu-punukwe andoma inom leigesigin oba nen he, An nen hit nendawi hundik hilinghinafu aple andi palfagain mondok lego. Hinendawimo serogo hilinghinobagagin o, iluk wene isigi mene andi re An nen obokhigi'lek fago mondok logogin o,” iluk Tuhan hat hebe endawi hundik hilinghabi'lago mene a'nogo nen ikhe.

Yerusalem ket mene wesigin isikhe wene

¹¹ Tuhan nen ikhi logolik, ”Hat Yerusalem kota sebelek mene hak logolik, afuni hendawimo konhabu mene legen hafe kulakhogo welagen mene yi. Hat hubule re An nen helep onggo hokho meneba nek nekhengge tik warogo wuthobagagin o.

¹² Leget pa'leget omame mene re helep enu delima meneba wusigin, kwe hokho ambe palekwe nen kugukwe re helep permata ba wusigin, pa'leget haren mene andoma re helep enu mutu matikam ratna ba wusigin.

¹³ Afuni o andoma werek mene inebe mondogat he An nen yanggulinafu mene asugun, It he inangge yi mene ti mene weregenek logolik mondok fanorogo logogun.

¹⁴ Hat he katokhogo hilingitu mene amboloba wurogo hobagagin, hamel-mel mene inom sebelogo ferinarek werek mene inom andomaba nen eil uanhogo hilinghobagagin.

¹⁵ Afuni ekhe nen pin talogo hoasi kwi wagu halok andi re, An nen yagaisamo re fuk, we ap sa nen hinoasi kwi wesugun iluk wesugun mene re inomame lek enek aga logogun.

¹⁶ Nen it ap senjata wusugun iluk endumo werati logolik, endu fisari'lagwi mene andoma An nenat elalinafigi. Ap senjata ba inoasugun iluk sikhe senek inap andoma re An nen enek hilingfisasigi.

¹⁷ Oba nen he sikhe andoma mondogat hat hoatu mene faget wusugun meneba nen ambisangma yalok ikhi logogin lek. Nen, wene katokhogo tegetarek aiba nen hoba hikhip heogoin mene re haren an weak hilingiti lek iluk fakhogo nek ikhi logogin. An namingmingengge mene re inomame aga logolik welagaikharek mene onggo wogisagain o,” iluk Tuhan nen a'nogo ikhe, isikhe.