YESAYA 53 - Allah Wene Fano Wene Hupla Inane

¹ A'nogo isukwama it inunggulenu a'nogo nen onggo ikhi logolik, ”Niren holugun mene andoma faget sa nen eberogo anggagain nogo? Ap sa nen Tuhan omame andi re weinamet fikhe nogo?

² Tuhan endawimo anggikhi logolik At amingmingengge andi re e kweang amusu le'ma nen fulelogo lagaikherek hak lagauwak anggikherek. Niren at he fano pugun se'ma hogoin oba ekhe werek lek, nen nit ninamolo a'luk ninendawinggen wanu mene ogo ekhe werek legat.

³ At andi re yi enggin ti enggin higik, heinet weakhogo wato welagik ugu were'ma, at ebe inendawimo seramet fisigik, agaiseratik, agarek. Ap misik iluk ogo ineilenggen at oba kwelakha inabit welagaikharek. Nen niren ogore at faget ninendawimo seramet fogoregat.

⁴ Ebe eberogo mene re, ou nit ninoba mene korogo wanhik, yi enggin ti enggin nit ha mene re at higik, ugu kwelegat he nit ninendawimo nen he, Allah nen unggum oba fikhemo, yi enggin ti enggin oba aga o, iluk anggogorek andi.

⁵ Oba nen he at agap oba oumo aga andoma re nit ninaweak oba, ebe libi'labakhogo wata andoma re nit ninaniniba hilingiti lagagu andi nen. Nit ninagap telasuageluk he at unggum wogota, at agap oumotekwe omanogo nen nit fanot ninabuageluk hilingite andi.

⁶ Nit ninebe mondogat he wam domba longgo ikherek andi hak nonghong isugusik welagagu, kwe inanggwe lombok lagaikharek andi hak ninobabut lombogen weak hilingiti logagu. Nit ninebe mondogaren weak hilingiti lagagu mene a'nogo Tuhan nen waganogo at oba fakhasikhe.

⁷ At oba wiik weakhogo hilingisogo fugu kwelek, afe morogo welaga. Wam domba wasuogeluk waluk lagu kwelek hea, athe domba isa mene esi palhu kwelek hea, ane legat welagarek andi hak, at ebe weak hilingisogo fugu kwelek meneat he ane igi'legat welaga andi.

⁸ At ebe hele warogo fagasik ayo wurogo ebe lisogo waluk laga logolik unggum wa'lagu mene oba faga. At ebe ninggi'nogo hilinglasigin iluk kumut haga mene ekhe werek lek, Nit ninunggulenu mene ninaweak faget at ebe wa'laga.

⁹ Aren kwanirek mene ekhe hilingite lek oba nen, ap inanini mondok weak mene inanggele'ma nen At ebe wa'laga, nen afuni weak hilingitarek mene inom misi'mo salinafa andi,” iluk isukwa.

¹⁰ Tuhan nen anggikhi logolik, at enggin-fenggin hoak iluk anggasikhe, nen nit ninebe mondogat ninaweak hosuageluk wam warogo nolharek hak At ebeat wasuak anggasikhe. A'nogo hilingite andiba at umur uanhogo logolik at ambisangma nen tago mene eilenggen isagain, at oba nen he Tuhan endawimo anggasikhe mene a'nogo mondogat higit aga.

¹¹ Andi faget he Tuhan nen ikhi logolik, ”Enggin-fenggin andoma mondogat heinet warogo hilingfembik, at agaiyekhogo oba liok igin o isikhe. An namingmingengge andi re An nendawimo anggigirek mene higithogo hilingite, afuni hokhorogo unggum hela mene re at amu nen wanhe. Nen at alisikhogo An nen it inaweak sebelogo leget fisikhi logogin.

¹² At onggwarek endawinggen nenat, nebe noasuak, iluk anggasikhesik, ebe afuni weak hilingitarek mene ninom misi'mo inenggi wena'ninabuak iluk anggikhe. Aren afuni hokhorogo inaweak hatesik, inaweak legetfisoageluk inobaget samban ili'logo. Andiba re aren hilingite onggo An nen yi afuni ti afuni hokhorogo at enggiba wogetik, at ebe ap kain enu werek hilingisogo figik, igin o,” iluk ikhe isikhe.