YESAYA 51 - Allah Wene Fano Wene Hupla Inane

Yerusalem faget konogo isikhe wene

¹ Tuhan nen yi'nogo ikhe, ”Hit An nen telninaplep iluk anggikhi lagep mene inom lebetninabuageluk kino yaganeti lagep mene inom he, An nane ikhi lagi mene yi holini o. Hiren helep tom koma meneba nen serelhigik wokhinafa nogo, nen helep he koma meneba habulogo wokhinafa nogo, andoma ebe'ni o.

² Hinambu-hinomba Abraham inom Sara inom hit takhinafa mene aremnogo inoba ebethani o, An nen Abraham ayonggo fesigiba andem he at omalik ekhe welagaikhe lek anggigi, ariginik welagaikhemo re An nen at fanot fesigisik at ambisangma mene hokho-pokhorogo hilingisogo fisasigi.

³ Yerusalem, An nen hat konhobagakhi logogin, meisalhigik pikhe kwe welagep mene andoma mondogat konhinafi logogin o. Lei pirimsekwe andoma re an neabu Eden yabumo mondok fano heiselek welagaikhe a'nogo hak hilingisogo fagain o. Andoma ap inagaiyekhogo logolik inanggilukhogo hilingiti logogun, wuni wulagaisogo hai warogo hilingiti logogun.

⁴ Yago, hit An nunggulenu mene yi sani, An nane futfikhi logoni o, Hit An nagainafuri mene yi sani, An nen ikhi lagi mene andoma furogo holhi logoni. An nen yi afuni-ti afuni inunggulenu lombok inoba yanggulinafi lagi, An nawene melalek werek mene andoma nen it selegerinafi logogin.

⁵ An nen inagap teligin oba a'nogo arat horok asi waga, An nalong asigin sambul a'nogo horogabesi waga. An namu nenat it inunggulenu ekhe mene-ekhe mene andoma melalinafi logogin. O sili yat-yatkwe werek mene andoma re An nenangotnafik, An nen mondok elalinhogo hilingiti lagi mene omanogo faget inendawinggen eberek welagik, hilingitu werek.

⁶ Pogot liakhaluk he kweangma hineilenggen lourogo pelakhani, Pogot he so'le higit mondogat legasigin, nen kweang he su tiliphogo lagarek hak legasigin, afuni elonggoma logogun mene mondogat he kolum wa'lagarek andi hak wa'lasugun. Oba nen he An nen woghisagain mene andi re hinagap telek mondok-mondok logogin mene, nen An nomame asigin mene andi re lek asigin lek mene wokhisagain o.

⁷ Yago, hit An nunggulenu mene oma re, An nane ikhi lagi mene andi holini o, hit he eberogo mene re ninggi'nogo iluk he hinelu welagebo. An nen wene yagahisikhi lagi mene re hit hinendawimo fisogo welagebaro. Afuni nen puliat hinafu halok he hinailosu fugo, iren li'not hinafu halok he hinoba sinurogo logou fuk.

⁸ It mondogat he su eluk- elugengge nen palherek andi hak, kain domba esi mene pel-pel en palhunem hangge mondogat legasugun o. Oba nen he, inagap telhu mene An nen wogisagain mene andi re mondok-mondok logogin, nen An nen inalonget fisagain mene andi re hinerembul oba andoma mondok-mondogat logogin o,” iluk ikhe.

Inunggulenu Israel mene nen Tuhan nen lebetninabuageluk kinotukwa wene

⁹ Tuhan neisena, hebe heluk a'luk he nit lebetninabin o, Hat homameba ninili wo'ninabin. O attak Haren Rahab al perelogo fesigin sambul a'nogo inom, nen kisu naga laut i agumo welagarek mene talogo watigin sambul a'nogo inom, hilingitigin hakhogo hebe siakhogo menlame o.

¹⁰ Harenat i laut agum mondok uan yenggelek mene firokhogo hilingfesigin, it hagainafuri inagap telogo fisasigin mene omanogo palogo wilibuageluk he, i andi bene Haren ebekwe yak fesigin.

¹¹ Andiba afuni Tuhan nen fikhalogo fisagain mene re sugulogo we'luk, it o Yerusalem kwi waga logolik inagaiyegen ngai-wai liafi logogun, a'nogo hilingitunem inagaiyek hokhorogo hilingiti logolik inoba mondok heanerogo nek logogun. Fong watu mene inom, enggin-fenggin hugu mene inom omanogore mondogat legasumo re iren inagaiyegetik, inanggilugetik, hilingitu mondok logogun.

¹² Tuhan nen ikhi logolik yi'nogo ikhe. ”An nenat hat konhabigin o. Nenahalok haren afuni legasugun mene andoma inoba inom, afuni engga hakhogo hugisogoin mene andoma inoba inom, hailorinafi lagen nogo?

¹³ Haren he Tuhan elalogo hobagaikhe mene oba inom, pogot tiaganet figik, kweang ubule warogo figik isikhe mene a'nogo oba inom honggoragendik hilingiti lagen nogo? Nenahalok hat he lingge inukhogo hoak leigeti logolik afuni inoba weak beakhogo hilingfisigik, inaniniba weagerinafik agarek mene omanogo inoba hailorinafi lagen nogo? Ibi-eberogo nen he iren ina'mage lagaluk hit hinoba hilingisugun mene andi re omame werek lego.

¹⁴ Hele warek werek mene weak-weagat fikhalogo wulak fisagain o, nen it nunggu mene re inelagaikhogo logogun lek, wa'lasumo ekhe salinabugun legat.

¹⁵ An he hit hineisena Tuhan Allah at hilingik welagimo re, An nenat i laut enden-fenden isugunem esinggen founyak lenggak hikherek, An nenu re Nomame Mondok hokho mene andi aro.

¹⁶ An nenat pogot tiaganet figirik, kweang ero inom talogo fesigi. An nen Sion oba ikhi logolik, hit he An nagainafuri o, An nen hit hinoba wene yagahisikhi logogin, An nomameba re hit nawea'ma fethinarek logogin o,” iluk ikhe isikhe.

Yerusalem oba enggin-fenggin hikhi logogin mene a'nogo wurep kobok igin isikhe wene

¹⁷ Yerusalem yei, helugame o! Helugame o! Tuhan anini nen unggum hokho mene hoba pelabi wagama hikhi logolik welagen mene a'nogo mondogat lek aga o.

¹⁸ Afuni hat heisok erokwe mene nen ferinarek logogun mene ekhe werek lek, afuni haren tagomangge mene nen hat kwe lagunem fagaisogo wokharek lagu mene ekhe logogun legat.

¹⁹ Hat he unggum ero pire mene hoba wesigin: Weim yafi logolik he hawi sili lilibukhogo leget fogoin, nen hagainafuri holhu mene re sumburu ouwagen mondogat wa'lasugun. Aben hat helagaik were'ma lebethafik, hendawinggen ago watfigik, hilingitu mene ekhe logogun lek.

²⁰ Kwelugunkwe andoma re, afuni hat mene inomame lega'luk no rusa su ugu elema kwalasi kwikherek hak, wa'larik laga logogun. It he Tuhan anini inoba figik, Allah a'mageba weagerinafik igin.

²¹ Afuni sebelinarek logolik i naluk lugu-lugwi palharek hak talo-talongge hilingi lagep mene yoma sani, hinesanggo holini o!

²² Hineisena Tuhan nen he yi'nogo ili'logo. Hit hineisena Tuhan Allah hit hinili wokhinaferek mene a'nogo nen he mel ikhe, ”An na'mage nen enggin-fenggin hinoba fikhi lagi mene andi re hobuk hit hinoba nen An nen lisogo wanigin o. Nen An nanini hinoba fikhi logogin mene a'nogo legarik lagunem he hit hinoba enggin-fenggin ekhe hogoin mondok lego.

²³ Enggin fenggin andi re, An nen it afuni hit sebelogo hinobagakhi logolik, kweangma weingla'ni o, iluk hit hinebe afuni kwe lagukwe hakhogo hilinghinobagaluk sibil-sebel hisikhi lagaukwa mene omanogo inoba fagain o,” iluk ikhe isikhe.