YESAYA 5 - Allah Wene Fano Wene Hupla Inane

Ap ekhe nen eabu anggur yabu inom agailak emberek hundik mene inom faget wuni isikhe mene.

¹ An nare ekhe eabu faget wuni felalogo igin mene andi hit ekhe hinesanggo holino. An nare ninom hundik mene at eabu re punu alilukwe kweang mondok heiselekwe werek.

² Aren eabu ebe wanhi logolik he helebenggen yogologo fanorogo pugunhogo wanhe, a'nogo wanhesik anggur ebe mene awi yatesik he kagalek werek oba faget he o ekhe uan mene legeisogo wute. Wutfikhesik anggur agai perelogo pelafuba faget kweang fate ekhe habulhesik he, aren enggen fano mene isigin iluk nenangot ikhi logolik welaga, oba nen he anggur a'nogo enggen he arik weak mene ite.

³ Andi nen he, yogondak an nare nen ikhi logolik, ”Hit afuni Yerusalem mene inom, Yehuda mene inom An nebe faget inom neabu anggur yabu andi faget inom wene higithogo palnesugun o.

⁴ An neabu andi faget ekhe hilingiti'legengge welagi nogo a? Anggur enggen ebe mene isigin iluk nenangotunemen andi re ninggi'nogoluk arik mene ite nogo?

⁵ Halok he an neabu anggur yabu andi faget he yi'nogo hilingisigin: Leget haningisogo waganek mene andi re mondok meisalogo pot fisamo re, wam maro eisogen altam-tamhogo weagerogo fagain.

⁶ Arigin foumo re yi engga ti engga weak mene sagarogo wulibigin. nen anggur ebe mene andi ogore enggi tegeti'lek herakfisamo re selegerati logogin lek. Arigin foumo re engga inom alok alogengge inom hokhorogo wilibimbik sebelek logouwageluk herakfisagain, nen ohena nen ogo at oba meiso pelabi wesinogo iluk nane waik paliginat,” iluk ikhe.

⁷ A'nogo hilingisigin andi re At Tuhan Omame Mondok Hokho mene a'nogo eabu anggur yabu andi re At againafuri Israel mene andiat. Nen At onggwaregen anggur awi yakhikhe mene andi re it afuni Yehuda mene inebeat. Ma re At Tuhan nen anggikhi logolik iren higithogo hilingiti logoilep anggikherek, oba nen kwanirogo nek hilingitu werek, wene higithogo hilingitarek awene andi nek omamet fouwageluk anggikherek oba nen, we afuni weagerogo fisugunem lebetninabuageluk hum-ngaiengge hilingitu werek mene andi nek esanggo holherek.

Afuni nen weak mene nek hilingitarek mene a'nogo

⁸ Hiren afuni inawi wurik mene omanogo onggo paligik, it ineabu omanogo hit akhouwogeluk mikhak kwigik, hilingiti lagep mene andoma re, alomat lakhouwogeluk welagep! Horok eil misik wela'luk afuni amu mene were'ma inobalik legasi lagunem o kweang andiba re hit hinamu nek logogun.

⁹ An nesanggo holhugunem en he Tuhan Omame Mondok Hokho mene a'nogo nen hombuk palhi logolik, ”O hokho mene wurik oma inom, fanorogo wurik mene oma mondogat inom he foluk arik lagain o.

¹⁰ Kweang oba nen enggen ugu palhu mene andoma ambisangma logogin lek, nen anggur yabu leget hokho mene uanhogo 10 hectar oba yago logogin oba nen, we iren enggen ugu re 10 liter enek keralhi logogun. Nen, enggen awi folhu mene re 100 liter meneba nen he anggur enggen we 10 liter enek palhi logogun o,” iluk ikhi laga.

¹¹ Hit o huberen ero ratungge o hub ari'lago huli andoma hineabu re i amusu omame mene ninggik, nen naluk lugulugwi palhik, hilingiti lagep mene oma re, hinebe alomat lakhogoin o.

¹² Hiren pesta hilingirikhi logolik, hinambinggong kecapi, gambus, rebana, suling, kongesugun mene nek hilingiti lagep. Nen hinagai re anggur agai inom ninggi lagep, oba nen hiren he At Tuhan yi mene ti mene elalhikhe mene inom, nen Aren hilingiterek mene inom omanogo faget futfikhi lagep lek.

¹³ A'nogo hilingiti lagep andiba re An Nagainafuri wonghogo werek mene andoma ap hele warinarek lagaikharek mene hakhogo woginarek logoin andi. Nen, it ap yagaisagarek mene inom, afuni we mene inom he, inamburu inom, inagai inom, nele nen wa'lasugun.

¹⁴ Afuni o Yerusalem oba inogogwi kaindek ferinarek mene inom, afuni we mene inom seberogo pesta hilingiti logolik inagaiyegetarek mene andoma pilisageluk wa'lagarikharek mene a'nogo re, alonggobak ele hurogo ambele anghogo weri'lago.

¹⁵ Afuni inebe lombok he inenggali warogo fisigik, wonoget fakhagarek mene re sebelogo fisigik, igin.

¹⁶ Oba nen Tuhan Omame Mondok Hokho mene andi re Aren eberogo hilingiterek mene a'nogo At ebe Omame hokho mene a'nogoba weinamet fagain. Nen, Aren yi afuni ti afuni At againafuri mene inawene katokhogo palinaferek andiba re At Mondok Amu enogo welagarek mene a'nogo inugisagain.

¹⁷ O kota meisale'ma olunkwe andoma kambing eagwi inom domba eagwi inom, engga inom seberogo ninggi logogun oba nen engga andoma legagi'legat logogin.

¹⁸ Hit afuni weak mondok hilingitu welagep mene andoma re alomat lakhogoin o!

¹⁹ Hiren ikhi logolik, ”It afuni Israel mene ineisena Tuhan Allah Horek Mondok welagarek mene andi nen weak weakhogo nek hilingisuak! Nen, Aren hilingisigin iluk wenggelhe mene andoma hilingitunem he niren nineil higik, ninelu agik, ugun o,” iluk ikhi lagep.

²⁰ Hit afuni wene eberogo mene inom kwanirek mene inom agam fagam isigik, mum mene inom, selek mene inom agametik, arik weak mene inom, enduk mitsek mene inom agametik, hilingiti lagep mene andoma re mondok alomat lakhouwogeluk welagep!

²¹ Nen, hit hinonggwaregen nit mondogat hebelek welago, nen mondogat ninelu nek anggikhi lagep mene andoma re alomat lakhouwogeluk welagep!

²² Hit i lugu-lugwi palharek mene a'nogo nouwogeluk ebet-ebet hilingiti lagep mene andoma alomat lakhouwogeluk welagep! Nen, i omame mene lugu-lugwi palharek mene andi ekhe mene-ekhe mene inom misikwe hinati lagep andi re mondok hailo legengge hinambong serogo hilingiti lagep.

²³ Oba nen he hit hinenggi a'makwe saburogo helogoin iluk ap weak hilingitu mene omanogo fikhalogo fisigik, nen ap weak hilingitu lek mene omanogo re it inawene higithogo palinafi'lek hilingiti lagep.

²⁴ Hit he hineisena Tuhan Omame Mondok Hokho mene a'nogo nen wene yagahisasikhe mene omanogo ninabit iluk herakfisikhi lagep, nen hiren afuni Israel mene ineisena Allah Mondok Horek mene a'nogo sebelogo fikhi lagep. Andiba re, lei engga inom engga puk mene inom endu nen libunghogo ninggerek andi hak he hirogo hinomanggen mondok fili agik, hinowil puk agik, sogoien mondogat furogo lakhinobagagik, igin o.

²⁵ Tuhan a'mage At againafuri mene inoba fikhesik werek andi nen he, it inoba unggum feigeluk fik foukhogo werek. Tom-tom andoma mondogat yelandi-kwelandirisagain, it inebe warek he engga fili filingge ebekhe kwe hugisugunem werek andi hakhogo warek enek pipou ugun. Oba nen he Tuhan a'mage legasigin lek andi nen he unggum inoba fagain.

²⁶ Tuhan nen ap inunggulenu yatma mene wolinabumo it inebe weak-weakhogo nek wesugun!

²⁷ It inebe re weim yabuogeluk inoba liklouksek logolik, inaberali agi'lek, nen nogo igi'lek, nogo ineilinafi'lek welagaikharek inap.

²⁸ Inandok he enggat mondok werelek kabuk hilingi'mo re inasikhe enggelaba kwelagaisogo fangsek logolik werek inap. Inanggo kuda eisok a'lip he helep ugu aik weak andi hangge hilingik, nen inangge kereta eisok he sogoi sielu nen fun-fanhikherek andi hak maseri'lago.

²⁹ It mene inagoromi tentara re mene singa nen at ninggeregengge ket senggelfakhaluk ane kouwaterek hak hilingiti logolik he mondok felelenghogo helaluk nanimuk ilagunem he aben ogo ekhe fakfou re elo'lek.

³⁰ Linggene andi sambul afuni Israel mene werekwe mondogat andoma re weim yabuogeluk hilingitunem iren hilingiri'lagwi mene andi re i laut eindep ane ikherek hak hilingik logogin. Yethani! O kweang andiba selek welaga mene a'nogo o mum en peterogo kuruak teng ikhe andi.