YESAYA 44 - Allah Wene Fano Wene Hupla Inane

”Hineisena Tuhan Allah nebe nami-namuat welagirego,” iluk isikhe wene

¹ Tuhan nen ikhi logolik, ”Hit nagainafuri Israel wenakhinafigi mene namingmingengge Yakub en tagongge mene yi, wene yagahisagain mene andi hinesanggo fanorogo holino o.

² An Tuhan nenat hat hebe elalogo hobagasigi o, hat hagaisa alabutmo nen An nen pugunhogo hobagasigisik, lebetheasigi. Hat Yakub en tagongge mene yi, An nen wenakhafigisik namingming engge hilingharek welaginggere hailo asu fuk.

³ An nen kweang iringikwe andoma i wulagaisogo lakfei wagik, nen kweang agai nele pelerogo werekwe andoma meiso sogenggen mene oba sakhoratik, igin o. Nen An Nomame re haren tagongge mene inoba wogisigik, hombawi hobuk ta'lasugun mene inoba fanoet fisigik, igin o.

⁴ It inebe re engga i elesimo muli fanorogo wuliferek andi hak sik-pik ikhi logogun, e wilo i esanggoma wilibik mene hak asugun.

⁵ Ap inebe misik-misigen nit At mene welago iluk inaneba fakhogo ugun, nen it inebe wesimbik he at Yakub ombawi inom misi'mo sebesi wesugun. It inebe lombok inenggiba re: Tuhan mene iluk palek logogin, Nen inonggwaregen ikhi logolik, nit he Allah againafuri welago ikhi logogun o,” iluk ikhe isikhe.

⁶ Tuhan Omame Mondok Hokho mene, Raja Israel mene inagap telogo ferinarek welagarek mene a'nogo nen ikhe mene re yi: ”An hineisena Allah re nami-namuat welagi o, eroma nen pikhit erumbul oba we An namuat welagi.

⁷ An higit he sa nogo? At aneba, an a'nogo welagi o, iluk uakhogo re yagane'ni! Aren yaganetik enek engge An noba inuk niigik uago! Hobuk hilingisigin he yi'nogo iluk eroma erotikhe huli nen wurep kobokhogo huli andoma faget he sa nen ikhe nogo?

⁸ Hit An nunggulenu mene re hinailotik, youk lagik, u fugo, attagen engge yogondak huli nen An nen yi'nogo hilinglasigin iluk nane isigi lek nogo? Isigi aro. A'nogo isigi mene andi faget nane ugunem neasigip mene hit hinebe welagep andi. Hit hinebe hinagap telogo ale'ma hinobagaluk fethinarek werek mene re amu mene ekhe mondok lek, nen ap ebe ti iluk An nonggoraro.” iluk ikhe isikhe.

It afuni nen tugwi kembu ilirenggerogo fuluk fogeratarek mene andi re mondok nabit mene hilingiri'lagwi o isikhe wene

⁹ It afuni kembu ilirenggerogo wuri'agwi mene andoma re ebe lek meneat he we alomarogo hilingiri'lagwi, nen kembu dewa iren legeisogo fili'lagwi mene andoma re eluk werek lek mene faget hilingiri'lagwi. Afuni nen kembu ilirengget fuluk fogerari'lagwi andoma re yi'nogo ti'nogo inonggorengge nen ineilenggen humunik logolik, hilingiri'lagwi o. Andiba re it hobuk inenggali asugun o.

¹⁰ It ilirenggerogo wutfuluk fogeratarek mene andoma re we alomarogo hilingiri'lagwi o.

¹¹ Ibi-eberogo nen he, afuni alik wokfuluk fogerari'lagwi mene andoma inenggali asugun. Ap alik waganogo hilingiri'lagwi mene andoma re afuni we mene nen hilingiri'lagwi hilingi'mo re, it inebe misik seberogo weinama asi wesuageluk yagaisani o, iren inailo asimbik inenggali asugun werego.

¹² It ap besi wutarek inap omanogo nen logam misik ekhe waluk endumo weragaisogo ebe hilingfuluk martelo oba sagalogo aren omame at oba werek a'nogoba yabu ninghogo hilingitu kwelek, at agai nele agik, amburu nele agik, ebe omame lek agaikhe ikherek.

¹³ E ba wutu aple elu mene nen he ilirengget haluk, e ilirengget hikherek mene a'nogo timeng oba obalik hilingfuluk, hesesengge wanharek meneba waganogo afuni inebe higit ilirenggerogo fikherek, a'nogo hilingisogo fuluk he aren wokhigik he ailoba fei wagarek.

¹⁴ E ap andi nen ilirenggerogo hilingiterek mene andi re e weile ba hea, e laik oba hea, athe e wenggiba hea enggama musi lagaresik hilingiterek. Nen ekhere e ibin aren awi yak fikheresik nenangothugu were'ma nen meiso nen hokhot fugunemen hilingitarek.

^15-17 E andi mene fena re oloma endu nolfuluk sogoi sakhugu mene faget inom, nen roti weratu mene faget inom, eino iringitu mene faget inom fuluk enek he at oba hambukhogo werek. A'nogo logolik he, o huk, endu yi re mondok fano ninoba yanggothikhe o! Ibi-eberogo endu yi nen ninoba enggaret ninobagaikhe iluk agarek. Nen, e a'nogo tindelek fenaba re kembu alik hilingitarek. Hilingfuluk he aren elokhe pelabek kweangma sagaum ikheresik fogeratik, oba samban igik, hilingiti logolik yi'nogo ikherek, ”Hat he an neisena o, haren an nagap telnabin!” iluk ikherek.

¹⁸ Ibi-eberogo nen ap ariginik mene andoma re mondogat morue! It ineilenggen humunik logolik inendawinggen kwe yagarek were'ma re iren fut fili'lagwi lek.

¹⁹ Ap alik wokhigik hilingiterek mene a'nogo nen he e yi fena re e wurogo nolhik, nen endu enggen oba re roti weratik, eino an nunggu mene iringitik, igi. Andi nen fena re an nen kembu ilirengge hilingiti yi. Arigini'mo re yogondak an nen hilingiti lagi mene omare we yugunat nobakhe palek hilingitik, obaget apne waganogo fogeratik hilingiti lagimo higi, iluk mel wenggeli'lago lek.

²⁰ A'nogo hilingiri'lago mene andi re wul age nenggarek andi hakhogo hilingiri'lago. Ap andi re onggwarek weakhogo wenggeli'lago andiba lalfakhugunem he at oba lebetha lekhak ari'lago. Aren he e alik waganogo enggiba werek mene andi re lalnabi'lagongge werek iluk he fut fili'lago lek.

Tuhan andi re Elalhik, Telinafik ikherek mene o, iluk isikhe wane

²¹ Tuhan nen ikhi logolik, ”Israel yei, hat he An namingmingengge mene hilingik welagenma re, mondogat andoma ebeti logoin o. Hat An namingmingengge logoinogeluk elalogo hobagasigi, Israel ao, hat he hoba nonggorasigin lego!

²² Haren weak hilingiti lagen mene re An nen ohena hakhogo palogo lakfigik, Nen haweak hilingiti lagen mene re An nen ohena hikweak meneba nen hakhogo kwe palfigik igirek, An nen mondogat fikhalogo leget figi hilingi'mo re, hambotkwe sugulogo An noba eme o,” iluk ikhe isikhe.

²³ Hat pogot yi re, hagaiyegeti logoin, nen hit fena kweang elonggoma welagep mene nen ogore hinagaiyegeti logoni, Israel At againafuri a'nogo onggo palinafe andiba re, Tuhan omame hokho mene a'nogo inugisikhe. Andiba re, hit tom-tom andoma nen hinagaiyegetik, o engga ogoi andoma nen inom, nen e ebe lombok anggelekwe andoma mondogaren inom ogore inagaiyegesuagat!

²⁴ Tuhan hinagap telhinaferek mene, hagaisa alabutmo oan werek kwelek pugun hafe mene a'nogo nen ikhi logolik, ”An hineisena Tuhan Allah nen yi mene ti mene andoma mondogat elalogo fesigi, An namu nenat pogot tiaganet figik, nen it ekhe nen lebetniigi'lek kwelek, kweang elalogo figik, isigi.

²⁵ It ap hobuk yi'nogo hilinglasigin iluk agarek mene nen husumbi agarek mene re An nenat sugwiabetirek, hareise higirinafarek mene omanogo An nenat nalek-falek isikhi lagagi. Ap inendawinggen wenggelek mene nen agarek mene omanogo re An nen inane oak sagal fisikhi lagagi, it hebelek mene omanogo re an nenat kembut fisikhi lagagi.

²⁶ An nenat, An namingmingengge mene nen wene ili lagwi mene andoma omamet figik, hilingitu mene iluk werek mene omanogo An nayonggo mene nen inamolo anggagarek mene omanogo hilingitik, ikhi lagagi. An nen ikhi logolik, o Yerusalem hobuk ambotkwe afuni logogun o, nen o Yehuda ba kota-kota andoma re An nen ambotkwe wusigin, meisalhigik laga mene andoma hobuk obalikwe menegeisogo wurik lagain.

²⁷ An nenat i laut elonggoma fem eroma ma'linogoba ikhi logolik: Iring lame o! ikhi lagi. Nen An nenat hat hagai omanogo firitok uageluk anggugunem firitok ikheregat.

²⁸ An nane Kores oba ikhi logolik, ”Haren An nagainafuri yi ferinarek welagik, An nendawimo anggikhi lagi mene andoma hilingitu welagik, ikhi logoin o. O Yerusalem nekhengge wusuakhogo iluk yagaisigik, nen o Tuhan Awi a'nogo ubule fouwageluk melalinafik, hilingisin o,” iluk yagatigi andi isikhe.