YESAYA 43 - Allah Wene Fano Wene Hupla Inane

Allah nen fikhalogo hinobagagin iluk againafuri wene warisasikhe wene

¹ Israel, Tuhan nen he yi'nogo ikhe: An nenat hat hebe pugunhogo elalogo hobagasigimo re, telhabigin andi nen he, hailo agi'lek hendawinggen hambukhogo logoino. Hat henu pakhogo wolhiigirik hayonggo fesigimo re, hebe re An nonggwarek mene welagen o.

^2-3 An he hit afuni Israel mene hineisena Tuhan Allah tegelek mondok logolik, hinebe telhinafirek mene a'nogo nen hat hebe fetharek logogin andi nen he, hat hebe i obakhe tekhogo palhik, i som lagik, ugunem i nen wokhabigin legat. Nen, endu amulok anggelekwe lagain mene re, hebe endu nen nagain legat. Nen, yi wene ti wene enggin mene hoba asigin mene re, andi nen hebe weaget habigin legaro. Hat hebe hagap telogo re afuni Mesir mene fisigimo werek, nen afuni Sudan mene inom, Syeba mene inom he, hat hobali'mo inebe inoasuagaluk fisigimo werego.

⁴ Hat hebe An neilhanem he esin mene welagen ma re, agaukhogo nendawit hafirego. Andi nen he hat hebe hoasinogoluk hagap telogo it afuni inunggulenu ekhe mene inoasuagaluk hobali'mo fisigimo o.

⁵ An nen hat hebe fetharek mondok logogin andi nen he, hailo agi'lek hendawinggen hampukhogo logoino o. Haren tagomangge mene hombalak o mo kwikherek higiren inom, mo lagai wagarek higiren inom andogorogo hoba fisa wesigin o.

^6-7 Hat hombalak andi nen an legeisogo nobagakhi logouwagaluk elalinafigisik, it inebe mondogat An nenuba wolinafi andi nen he, it inebe i elesikwe fikhit werek mene inom, i ambutkwe fikhit werek mene inom andoma fikhalogo wulakfisa wesuageluk An nen yagaisagain o. A'nogo yagaisamo re hit hinagainafuri alage mene re yatkwe-yatkwe andoma nen inambotkwe lakfisa wesugun. Nen hinagainafuri helime yenggerugwi re o unggut-unggut welagaikharekwe omanogo nen sugulogo wesugun.

Tuhan awene palek a'nogo fakhogo yagaisoageluk Israel mene inoba fesikhe wene

⁸ Allah nen a'nogo isikhesik, ekhe mel isikhe: ”Nagainafuri hineilenggen fano meneat he, hineil mum hangge welagep andoma inom, inesanggo fano meneat he, tagum mene hangge welagep andoma inom hinom seberogo An nelokhoma andogosi wesuagaluk yagaisani o.

⁹ Afuni inunggulenu lombok inebe seberogo andogosi wesuakhogo yagaisani o, It inandugwi kembu fogeratarek mene andoma ekhe nen wene o yogondak hilinglari'lago mene oan hilinglagi'lek werek kwelek, attak agaikhe mene ekhe werek nogo? Iren nineisena, iluk agarek mene andi ekhe nen wene hobuk hilinglasigin mene faget, Yi'nogo hilinglasigin iluk higit yagaisogoin nogo? It a'nogo eberogoat ekhe agama halok, ugunem inesanggo holha mene nen he, It eberogoat aga mene o, iluk ugunem it ekhe inesanggo holugun mene nen he, Eberogoat ikhe o, iluk uagen he, wesuago.

¹⁰ Hit An nagainafuri mene yi sani, Hit enek he An nen hilingiti lagi mene hineilenggen higik, hinesanggo holhik, egep mene welagep. An nen hit wenakhinafigi andi re An namingmingengge mene logobagaik iluk wenakhinafigi o. Andiba re hiren An nebe hinelu a'luk hinendawinggen noba tibet figik, An nebe Allah welagi mene a'nogo hinelu agik, egep. An nebe re Allah nami-namu logolik netok mondok welagirek mene a'nogo, Attak An nebe le'ma andoma ap ekhe welagaukwa lek, nen hobuk An nombo'ne ogo ekhe logogun legat.

¹¹ Hineisena Tuhan he An nami-namuat welagi o, An nebe lek logoumo nen he, ap ekhe mene nen hinagap telhinabugun mondok elo'lego.

¹² An nenat, a'nogo hilingisigin iluk attagat yagahisasigisik telhinafirek andi. Nen, hit hinanggele'ma re, afuni inunggulenu hunogo mene nen, nineisena ebe yi aro, iluk fogeratarek mene andi nen, telhinabigin iluk yagahisasikhesik telhinaferek lego. we hineisena Allah Anat logolik a'nogo hilinghinafirek mene andi, hiren hinelu logolik it ekhe yagaisikhi logobagaigeluk yagahisigi o.

¹³ An nebe munen agi'lek Allah netok mondok logogin o. It ekhe An nenggimo nen polokhogo wulibi lagik, An nen hilingisigiluk ebetirek mene andi leget fisigik, ugun mondok lego,” iluk ikhe.

Afuni Babel mene nen ferinarek were'ma telogo hinobagagin isikhe wene

¹⁴ Nit afuni Israel mene nineisena Tuhan Allah horek mondok logolik telninaferek mene a'nogo nen mel ikhe: ”Hit hinobaget he ap tentara inayonggo fuluk o Babel lakfisagain o. A'nogo lakfisugunem, o afuni hele warogo fisagarek oba, kwe yagarek mene houwak lambukhogo potfisugunem he, afuni Kasdim mene inendawimo inagaiyek hikhi logolik, ami'mit sup agarek mene andi hebekhogo re inendawimo weak a'luk le asuagaluk hilinginabigin o.

¹⁵ An he hit hineisena Tuhan Allah horek mondok logolik, hit Israel mene hinebe elalhinafigi mene a'nogo re An aro, hit hinobaget nebe Raja welagi o,” iluk ikhe.

¹⁶ At Tuhan nen kwe ekhe i laut yenggelek ebene yatikhe, i ha'labu hokhorogo hilingiterek kwe yatikhe.

¹⁷ A'nogo yatikhesik he, ap tentara inogogwi inom, inagoromi inom, weim yabuagaluk yagaisasikhemo, kuda nen lisogo waluk lagarek mene enu kereta oba lagasukwasik wagaukwa meneat he, inebe arat inoatikhemo hobuk ineluk asugun mondok lek. It inebe esage amulok lagaikherek mene nagulagarek andi hak wa'lagaukwa.

¹⁸ Tuhan nen mel ikhe: ”Wene endamat hilinglagaikhe mene ebeti lagep andoma re we tulemat alomarogo ebeti lagebo.

¹⁹ An nen yi wene ti wene ket mene melalogo fagain mene andi oba futfeino o. Hilingisigin mene andi yogondak ebe erorati, oba nen he hineilenggen hikhi lagep lega? An nen kwe o leimo afuni le'ma andoma yatik, i elesi-elesingge o leikwe andoma nen wulibisogo wulakfei wagik, igin o.

²⁰ An nen o leimo afuni le'ma andoma i hilingisogo figik, nagainafuri wenaginafigi mene inagai ninggi logouwagaluk elesi wulibisogo wulagisigik, igin andi nen he, wam maro mene nen inom mene olomene nen inom, sue hugubi nen inom, an nobaget fogetnabugun o.

²¹ It inunggulenu ari mene re iren An nobaget wuni fogetnafu awuni wati logolik fagerik laga logouwageluk An nonggwarek faget wenagaisogo fakhasigi o,” iluk ikhe.

Israel mene nen weak hilingitukwa mene sagalogo legetfisasikhe wene

²² Tuhan nen mel ikhe: ”A'nogo meneat he, hit he afuni Israel mene welagep oba nen, An fogetnafi'lek welagik, An nobaandogosi wagi'lek welagik, ikhi lagep.

²³ Hiren An nobaget wam warogo nolnesuogoluk waluk wagi'lek, nen An agaukhogo wam yi mene ti mene nobagauwogoluk waluk wagi'legat hilingiti lagep. Oba nen An nen he, Wam An faget warogo nobagai we'ni iluk yagahisigik, Amben fano mene kemenyan nobagai we'ni iluk yagahisigik, ikhi lagi lek oba nen.

²⁴ Hiren An nobaget amben fano mene dupa onggo palneti lagep legat, nen noba yamukhogo wam senggelogo nolhi logolik sei werek mene wo'neti lagep legaro. A'nogo wo'neti'lek logolik, noba enggin kwelagaisogo weak hilingitik, nendawimo mondok weak asuagaluk hilingnobagagik, ikhi lagep andi.

²⁵ A'nogo hilingiti lagep meneat he, An Allah nobabut he, hiren weak hilingiti lagep mene andoma sagalogo leget hinobagambik, hobuk nendawimo ebethikhi logogin mondok lego.

²⁶ Wene andi eberogo nen iluk ninelu asuogen he, o inanema wanigin oba lambik, Hit eberogoat egep, iluk enegat asuagen he, Yi'nogo isigin anggigi, iluk ebetneano o.

²⁷ Hit hinombalak attak weak hilingitik, hinogogwi nen, Hat hawe a'ma logogun ninabit, iluk wilifik,

²⁸ ap An eisewerek mene nen An nawi wuri'mo omanogo emerogo figik isukwa andi. Ma re, hit afuni Israel mene it ekhe nen inendawimo seramet hinobagauwagaluk inenggiba hinobagagik, hit Yakub en tagomangge mene yi hinebe mondok legethinabuageluk herakhinobagagik, igin andi o,” iluk ikhe.