YESAYA 42 - Allah Wene Fano Wene Hupla Inane

Tuhan amingmingengge asugun wene

¹ Tuhan nen ikhi logolik, ”An namingmingengge wendeberogo fuluk ayonggo fesigi mene lebethugu kwelek nendawimo namolo mene hilingitunem noba liok ikherek mene ebe yi aro. Afuni inunggulenu lombok inawene higithogo halisikhi logouwagaluk An Nomame a'nogo At oba peterogo wogeti andi o.

² Ebekhalem afuni kwe laga logolik inesanggo holhi logouwagaluk, At ane hokhorogo kwe igik, ngai igik, ikhi logogin lek.

³ Findayo oak kwanirek mene halok Aren sombologo hugisagain lek, esage amulok endebat ibilik werek mene andi nagul figik igin mondok legaro. At obabut fano enago logolik, wene higithogo pilingisikhi logogin.

⁴ Kweangma yi awi ti awi wene inoba mene higithogo pilingerisagaluk logolik wenesugwi uan horok ebeti'lek endawimo nonghong igi'lek logogin. Aren yi'nogo hilingiti logoino, ti'nogo hilingiti logoino iluk komorinafikhe wene andoma re, afuni o yi awi ti awi yatkwe-yatkwe werek mene andoma nen inesanggo holugun inamolo logogun o,” iluk ikhe.

⁵ Nineisena Tuhan Allah nen pogot elalogo fesikhesik talogo figik, kweang ebe inom, yi mene ti mene oba fuleligin mene inom elalogo figik isikhe. Aren afuni inoba set inom ineluk logogun mene inom wogisasikhe, nen At amingmingengge mene oba re wene yi yagate:

⁶ ”An heisena Tuhan nen hat higithogo hilingiti logoinogeluk, wolhafirik heabu wokheti o. Afuni mondogat faget hat hebe wene warogo woginafi mene hangge hilinglagik, yi afuni ti afuni faget selegerinafi logogin mene hilinglagik, inogoluk An nen hebe setharek mondok logolik, lebethiikhi logogin o.

⁷ Afuni ekhe ineilenggen mum mene fenggenogo fanorinafik, it ekhe inebe mummo hele warogo ferinarek were'ma fikhalogo telinafik, igin o.

⁸ An nenu re, Tuhan andi aro. An fogetnafarek andi hak, it afuni ekhe fogerinabuageluk wogisagain lego. Nen, nenu o yi awi ti awi lagarek mene andi, tugwi kembu enggiba fagain legaro.

⁹ An nen, ”Yi'nogo hilinglasigin, iluk igi mene andi yogondak he enegat ari'lago. Wene ket mene yogondak hilinglari'logo mene ogo yagaheti lagi aro. Wene ebe oan hilinglagi'lek werek kwelek, attak he mondogat yagaheti o,” iluk ikhe.

Fogeratarek awuni

¹⁰ Wuni ket mene Tuhan faget felalogo ini o, Hit afuni kweangma welagep mene mondogaren he, Arenek fogera'ni o! I laut inom, elonggoma werek mene inom, yi awi ti awi yatkwe-yatkwe welagaikharek mene inom, inebe mondogat At faget fogerasuogeluk andogosi we'ni o!

¹¹ It o leikwe andoma nen inom, inawi kota-kota mondogaren inom, ineisena Tuhan fogerati logouwak. Nen it afuni Kedar mene nen he, Arenek fogerati logouwak. It afuni o kota Sela mene nen he, tom unggul oba lagaluk, inane a'mit suphogo wuni wati logouwak!

¹² O yi awi ti awi yatkwe-yatkwe andoma nen he, Tuhan enu nek seralik laga logouwak. Iren At legeisogo fikhi logogun andi re mondok fano.

¹³ At Tuhan he ap weim aninirogo yaferek mene hangge inom, tentara mene nen weim inomamerogo yafarek andi hangge inom, Aren weim a'nogoat yaferek. Aren weim yafi logolik he ami'mit suphogo At omame werek mene a'nogo it aselei mene omanogo inoba inugisikherek.

Allah nen againafuri leberisagaluk wene warisasikhe wene

¹⁴ Allah nen he mel isikhe: ”An endamengge nafe wonghogo nane legat welagarik yogondak An wesigin oba arat asi wagama re, hemi ineagwi taginabuogeluk inane kwetarek hak, nane kwesigiluk welagi o.

¹⁵ Tom unggul andoma inom, punukwe inom An nen esi lek hilingisogo figik, yi mene ti mene engga fulelek mene saweret figik, igin o. O tonggokwe i fano werekwe omanogo re An nen hebekhogo re puk halongorogo hilingisogo figik, i mogo hokho yenggelek omanogo re firitokhogo leget figik, igin.

¹⁶ An nagainafuri ineilenggen mum mene andoma re, kwe it inonggot kwe iren lagaikharek lekwe woginarek lagain, O mum mene andi inelokhoma liaratik, kwe sirek harek mene andi enagaisogo higirabetik, igin o. An nen it faget hilingisigin igi mene andi re, eberogo hilingisigilugat igi o,” isikhe.

¹⁷ It afuni ekhe nen, Tugwi kembu andi re, nit ninawesa o, oba himbirik welago mene, iluk inendawinggen oba himbirik welagaikharek mene andi hobuk inenggali hambik he, nong asugun o,” iluk ikhe.

Israel mene inobabut he, ”Afuni ekhe nen komotninabugun he, ninabit,” iluk anggagarek wene

¹⁸ Tuhan nen ikhi logolik, ”Yago hit hinesanggo tagum mene andoma re, nane hinesanggo holini o. Nen, hineilenggen mum mene andoma re, hineilenggen yethani o.

¹⁹ Hit afuni An namingmingengge Israel mene hineilenggen mum welagep andi hak, it ekhe ineilenggen mondogat mum mene re sani nogo? Nen, hit ap an nen hinayonggo fuluk lakhinobagagirek mene hinesanggo mondok tagum welagep andi hak, it ekhe andi hangge werek nogo?

²⁰ Hit afuni Israel mene yi, yi wene ti wene hilinglagunem hineilenggen hokhorogoat hikhi lagep meneat he, fanorogo futfikhi lagep lego. Nen, hinesanggo hologo welagep meneat he, furogo holhi lagep mondok legaro,” iluk ikhe.

²¹ Tuhan nen he telinabigin iluk agaiyek werek, wene Aren komotninafikhe wene andi, esinetfigik, agaugwetfigik, ikhi logoilep anggikherek.

²² Meneat he, it afuni inunggulenu andi mene re, it ekhe nen hinagaisogo we'luk weagerinafi logolik, inebe ekhe kweang habuli'mo fisigik, it ekhe inenggi hele warogo o wuri'mo fisigik, ugunem welagaikharek. A'nogo were'ma andoma re, it inebe hele fikhalogo leberisogoin mene ekhe werek lego.

²³ Afuni hit hinanggele'ma mene ekhe sa hagen wene a'nogo hilinglagarek mene andi, hinesanggo holhik, hobuk faget futfigik, ugun mene ekhe welagep nogo?

²⁴ It Israel mene andi it ekhe inenggiba asuageluk sa nen wogisikherek nogo? At Tuhan amu nen he lek nogo a? Nit he Aren wene yaganisikherek mene omanogo furogo hilingiti'lek welagik, nen Aren yi'nogo hilingiti logoino, ti'nogo hilingiti logoino iluk komotninafikhe wene omanogo higithogo hilingiti'lek welagorek andi nen he, At elokhoma niren weak hilingisogo fogorek andi o.

²⁵ Andiba re At a'mage mondok hokhorogo ninoba figik, weim mondok inailo mene yafi logolik, ninoatunem heinet watik, ogorek mene andi re, futfouwagaluk hilingninaferego. Yi mene ti mene endu nen ninggerek andi hak, Allah a'mage nit afuni Israel mene ninoba fikherek andi. A'nogo meneat he, niren wene a'nogo hilingninaferek mene andi re, fanorogo futfigik, yanggulhik, ogorek mondok lego.