YESAYA 41 - Allah Wene Fano Wene Hupla Inane

Allah nen Israel mene inendawimo eberogo anggoageluk hilingfisasikhe wene

¹ Allah nen ikhi logolik, ”Afuni o yi awi ti awi yat-yatkwe welagep mene andoma An nen hinomamet hinobagagin enggere, hinabolok lek a'luk An nane igin mene yi hinesanggo fanorogo holino o. Wene inoba figik, kotik agarek oba omanogo we'luk he hinawene helaluk wesugun mene andoma lakfei we'ni o. Ap sa weak hilingite sa weak hilingite lek iluk wene tegesuogen he, nit ninebe seberogo pilingisuogen we'ni o.

² Ap sa nen timur fikhit omame werek mene a'nogo abologet higik, hundik-hundik at enek omame aga logouwageluk hilingitik, ikherek nogo? Ap sa nen hilingituba aren it ekhe inunggulenu mene omanogo mabenet fisigik, nen it raja-raja omanogo at a'ma nek sebelogo pelak fisigik, ikherek nogo? At enggarok oba nen he, ap at aselei mene wul hakhogo wolelenggenhogo fisigik, Nen At andok oba nen he it inebe engga iringik mene sogoien funhugunem hilingiterek hak telfol isigik, ikherek.

³ Nen At ebe siakhogo menla'luk muginarek lagunem he at elokhoma kwe palagarek mondok lek, Kwe lagunem he eisok a'ne weak, kweangma sebelherek lek mene hangge lagarek.

⁴ Mondogat andoma re, sa nen hilingiterek nogo? Ap sa nen eroma nen hilinglarik wagaikhe mene andoma faget penogo fikherek nogo? An he Tuhan, Attak mene re Anat, netok mondok werek kwelek enek o wurep kobokhogo andoma ogore Anat logogin.

⁵ Afuni inawi ero yatkwe-yatkwe welagaikharek mene nen he An nen hilingiterek mene andoma ineil hagarek. It he youk laluk inailo nen inoak leigeti logolik inebe misik andoget fuluk wagaikharek.

⁶ It inebe mondogat he it ekhe nen ekhe lebethigik, ekhe nen ekhe endawinggen ago watfigik, agarek.

⁷ It e meneba wutu inelu mene nen he emas meneba wutu inelu mene inendawimo ago wat fisigik, nen martelo ba posiemanggen sagalharek mene nen he, ap eangge fuluk sagalharek mene omanogo fogerinafik, agarek. Iren ikhi logolik, ”Haren hilingiti lagen mene oma re mondok fano o,” iluk agarek. A'nogo hilingisogo fuluk he abolok inogoluk paku ba ninghogo wat fagarek.

⁸ Oba nen, Hat Israel he An namingmingengge mene o, nagainafuri An nen wenagaisogo fakhasigi mene, hat hebe re An nagailak, Abraham ambisangma mene welagen.

⁹ Hat hebe re An nen o kweang unggut-unggut andoma nen wokhafigi, An nen o mondok yat-patma andoma nen wolhafigi mene. An nen ikhi logolik, ”Hat he, An namingmingengge mene o, An nen wenakhigi mene ari nabit iluk filikhogo herakhobagagin lek mene o,” iluk isigi.

¹⁰ An ninom logogun enggere, hailo asu fugo, Hat heisena Allah re An nebeat andi nen he hendawinggen fisu fugo. Hat he An nen wuriget hafik lebethiigik ikhi logogin. An nenggi omameba wokharek laga logogin.

¹¹ Yethan, afuni hat hinom weim palek logolik wenakhetu werek mene andoma inebe mondogat he, inomame leget fisambik sebelogo fisamo inenggali asugun. Ap san nen iluk ogo hat hinom eilhabugun halok he ineiloak legasuogeluk hilingisugun.

¹² Haren he, ap hat hinom walhogoin iluk hilingiri'lagwi mene omanogo heraginabigin oba nen he, it inebe hinom ambi asugun lek. Ap hat hinom weim yabugun iluk mene re yogondak lek agaikhasik mondogat longgo aga.

¹³ An he hat heisena Tuhan Allah welagi o, henggi ebekwe fetharek welagi mene, An nen ikhi logolik, ”Hailosu fugo, An nen lebethiikhi logogin,” iluk isikhe.

¹⁴ Tuhan nen ikhi logolik, ”Israel ao, hat he hebe yenggerek logolik, homame lek welagen oba nen he, hailosu fugo. An heisena Tuhan nen hat lebethiikhi logogin o, Allah Israel mene ineisena Mondok Horek mene andi re, hat hagap telhafu mene werego.

¹⁵ Yethan, hat hebe re An nen e gandum enggen perelharek mene re, ebe ket mene enggat werelek kabuk hilingi'mo, aik pire erarek mene hangge hilinghobagaumo re, Haren he tom-tom andoma perelik laluk wolelenggen isikhi logogin o, punukwe andoma haren afulfulengge hakhogo furogo leget fisikhi logogin.

¹⁶ Haren he, it inebe gandum enggen hak eninafunem he, it inebe afulfulengge higit sogoien furogo woginarek lagik, sielu nen funhogo waluk lagik, hilingiti logogin. Hat he, An heisena Tuhan nobaget hagaiyek agik, An nebe afuni Israel mene ineisena Allah welagi andi nen wonoget fakhigik ikhi logogin.

¹⁷ O andem sambul he ap inenggi lek mene inom enggin-fenggin hagarek mene inom i herati logogun mene re, inelokhoma aga logogin le'ma re, inagai nele nen inamelinggen pukhogo logogun. Oba nen he iren An nenu hombuk palogo yaganetu halok he, An hineisenaTuhan nen inane onggo yagaisikhi logogin. An Israel mene ineisena Allah a'nogo nen he, nagainafuri herak fisaluk laga logogin mondok lek.

¹⁸ An nen punu esi mondok lek mene andomaba nen i waga logouwageluk hilingfigik, tonggo obabe le'ma tulem andoma nen i elesi fulogoumhogo wulibuageluk hilingfigik, ikhi logogin. Ilingage lei andoma re i mogo yenggelogo hilingfigik, kweang iringikwe nen he i elesi wulibisogo lakfei wagik igin.

¹⁹ O leikwe andoma An nen e weile awi inom, zaitun inom, e murad inom, akasia inom yasigin. Leik werek mene andoma re, An nen e eru inom, berangan inom, e laik inom ogoi hilingisogo fagain.

²⁰ A'nogo hilingfoumo re afuni mondogaren ineilenggen haluk he, ”At Tuhan nen hilingite o, iluk inelu aga logogun. Allah Israel mene ineisena Horek Mondok welagarek mene a'nogo nen hilingiteba hilinglaga o, iluk ineilenggen higik, futfigik, ikhi logogun o,” ikhe isikhe.

Tuhan nen tugwi kembu faget ane asegen wokhasikhe wene

²¹ Tuhan, afuni Israel mene ineisena raja a'nogo nen it tugwi kembu omanogo inoba ikhi logolik he, ”Hiren hinawene lakfei we'ni o, nen ti faget hilinglagama iluk fagesi we'ni!

²² Nit ambisangma asigin mene andoma ninelu asuageluk he hit wesimbik hobuk ti'nogo asigin iluk husumbi i we'ni. O andem oba agaikhe aple omanogo nit yaganisa we'ni. Nit fut fouwogen he andi ebe ti'nogo faget hilinglaga iluk fakhogo yaganisa we'ni.

²³ Hit he, allah elalin hilingitu hinap welagep iluk nit ninelu asuakhogo re, hobuk asigin aple yi'nogo asigin iluk ini. Nit ninoba fokhogo fogerati logogun nen he, ambisangma fano agu mene inom, weagerinafu mene inom, hilingi'ni o.

²⁴ Ebe eberogo mene re, hit hinebe inom, hiren hilingiti lagep mene inom, andoma mondogat he lek kwelek hilingiti lagebo, nen it afuni hit foget hinabi'lagwi mene andoma nen he ina'meilo mene hilingiri'lagwi.

²⁵ An nen he ap misik ekhe timur fikhiren lakfei wesigin, aren abel utara fikhiren weim kwi wesuageluk An nen ayonggo fagain. Ap inomame werek mene re fesi ineisogen sogoberisagarek hakhogo hilingfisigik, kweang tanggeba waruk hilingitarek mene nen hilingitarek hakhogo alperelogo fisigik hilingisigin.

²⁶ Hit inanggele'ma andoma nen ap sa nen hilinglasigin mene iluk wene husumbi ikhemo niren eberogo ikhe iluk ugun nogo? Oba nen he hit hinanggele'ma nen he a'nogo hilinglasigin iluk yagahisigik, nen hiren hinane ugunem aben ekhe holhik, aga legat.

²⁷ We An Tuhan nen enek he, attak-attak o Sion oba nen yagaisasigi. An nen he, ap fano wene waluk Yerusalem loageluk yonggo lakfisasigi.

²⁸ An tugwi kembu dewa omanogo anggele'ma nen heratigiba nen he, ti'nogo asigin iluk u mene misik ekhe welaga lek, nen onggo u mene ogo ekhe welaga legat.

²⁹ Ibi eberogo nen he tugwi kembu andoma re we alomarogo werek, ithe aben alik waganogo fugunem yi'nogo ti'nogo ekhe hilingisu lek hak, iren yi'nogo ti'nogo ekhe hilingisu re elo'lek welagaikharek,” iluk ikhe o, isikhe.