YESAYA 4 - Allah Wene Fano Wene Hupla Inane

¹ Andem oba re helime inebe 7 nen mene ap misik ekhe enggi fak fembik mel yagasugun, ”Nit ninaguni heligi'legengge logolik ninenggali hugu mondok logogun andi re fugo, we niren hat hebe ninagunap habugun enggere, haren fano in o. Ninangge nunggu mene inom ninasu laberugu mene inom ninonggwaregen halfakhikhi logogun,” iluk yagati logogun.

Yerusalem hobuk afe halogo fagain, iluk isikhe wene

² Linggene ekhe asi wesigin oba re Tuhan nen o kweang yiba yi mene ti mene yago mene fanot foumo re elokhe fano asigin. Linggene andi sambul he afuni Israel mene inagap telasigin mene re inagaiyek higik, inangge enggen ugu palugun mene faget wonoget fakhigik, ugun.

³ Afuni inebe lombok o Yerusalem andoma herakfisamo logogun mene re, Allah nen telinabigin iluk tegelogo fisamo logogun andi nen he, it andi faget horek mene ikhi logogun.

⁴ Tuhan nen At omameba againafuri inawene katokhogo palhik, afuni nen perak endumo weragaisogo ebe mene enogo fagarek hak hilinginafik igin. Aren he o kota Yerusalem oba andoma nen ap inoatukwama inamep pisikhe mene andoma sobaligin.

⁵ A'nogo hilingfuluk he tom Sion oba afuni mondogat andoma kabogesugun mene inom he Tuhan nen linggene re ohena hilingfigik, nen hubanggo re endu so'le inom ombak-bak eterek mene inom hilingfigik igin. Allah onggwarek ebe nenat o kota andi sebelogo logolik along palogo fisogo logogin.

⁶ Aren he o linggene mo aik oba sebelinarek welagik, nen meiso hokho mene inom sielu inom wagunem kuguba faget fougeratik igin.