YESAYA 39 - Allah Wene Fano Wene Hupla Inane

Afuni o Babel mene yonggo lakfisa wagaukwa wene

¹ Inenggi andem oba re raja Babel mene Merodakh Baladan hun Baladan amlogo a'nogo holhunemen he, raja Hizkia yogondak ou wanhi laga mene a'nogo mondogat fano aga ugunem holhikhe. Holhikhesik aren he hai warogo iluk inom lisu palek inom wogosi loageluk ap ekhe ayonggo fesikhesik lakfesikhemo waluk Hizkia ambit wogosi wagaikhe.

² Wagaikhemo re Hizkia nen endawi fanoba ap wagaukwa mene omanogo woginafikhesik at angge enggi werek hilingik welagaikhe mene emas, perak inom, amben-amben engge inom, amusu amben fano mene inom, agoromi sikhe fisogo mene nen weim yafafarek mene omanogo mondogat inom, yi mene yi mene o at raja ebe were'ma inom, o kweang aren ferinarek oba andi inom welagaikhe mene omanogo ekhe herakfigi'lek mondogat inugisasikhe.

³ A'nogo hilingitukwasik were'ma nen nabi Yesaya wagaikhesik raja Hizkia oba heinok wogisikhi logolik he, ”Ap andoma re koma nen wagaikha? Nen, iren he ninggi'nogo aga?” iluk heinok wokhasikhemo re, Hizkia nen onggo ikhi logolik, ”It he o Babel mondok yatma andoma nen wagaikha o,” iluk yagatikhe.

⁴ Andi nen Yesaya nen ekhe inom heinok wokhikhi logolik, ”Neisena hat hebe welagen oba oma mene iren he nenamene ekhe ineil haga?” iluk heinok wokhasikhemo re, Hizkia nen ikhi logolik, ”Mondogat ineilenggen haga nego, an nawi welagiba yoma yi mene ti mene fisogo welagi mene omanogo haga lek mene ekhe werek lego, mondogat he ineil aga nego,” iluk yagatikhe.

⁵ Andi isikhemo Yesaya nen raja ba onggo yagati logolik, ”Tuhan Omame Mondok Hokho mene a'nogo nen ikhi logolik he,

⁶ lingge ekhe asi wesigin oba re hat hebe logolik yi mene ti mene henggi werek welagen engge it hori-hagaila'lak inom hombawi inomen kabogetukwa huli nen yogondak huli kabogeti lagen mene andoma ekhe herak figi'lek mondogat felelenghogo o Babel helaluk logoin o.

⁷ Nen hat againafuri tagomangge mene re raja Babel mene nen woginabimbik amingmingengge sida-sida hilingfisambik yabu at awi istana ba andoma lebethikhi logouwageluk woginabigin o,” iluk yagatikhe.

⁸ Andi isikhemo re raja Hizkia nen onggo ikhi logolik, ”Tuhan nen yaga'no ikhe mene haren yaganesi wagen andi re mondok fano,” iluk isikhe. Aren a'nogo isikhe andi re, ”An neluk welagiba re o kerajaan an nen ferinarek welagi yiba re fano liokhogo inailo mel legengge logogun,” iluk anggikhi logolik isikhe.