YESAYA 36 - Allah Wene Fano Wene Hupla Inane

Ap Asyur mene nen Yerusalem inoasugun iluk inabok palhukwa wene

¹ Hizkia afuni Yehuda mene faget raja menlagaikhesik werek kwelek tahun 14 meneba were'ma andem he, o Yehuda ba kota-kota pa'leget omamerogo waganek mene omanogo raja Senherib Asyur mene a'nogo nen pin kwi wagaikhesik sebelasikhe.

² Andi mondogat hilingfesikhesik at ebe o Lakhis logolik he ap sikhe fisogo inap perwira lego mene agoromi tentara esa hokhorogo inom o Lakhis nen o Yerusalem raja Hizkia an na'ma asuagen yagasi lani o iluk lakfisa wagaikhe. Lakfisa wagaikhesik he, it inebe o Penatu yabumo yo eil munenogo wulatarek oba i elesimo mogo yenggele'ma nen wulibisogo lagarek oba horokhogo andoma wagaukwa.

³ Wagaukwama re, at Hizkia a'ma yabu hilingitarek inap agoromi pegawai inebe henagan mene re ap Asyur mene sikhe fisogo inap aremnogo inambit lagaukwa. It ap pegawai inebe henagan andem he, Elyakim hun Hilkia amlogo raja ailoba yabu hilingitu mene faget kepala welagaikhe mene a'nogo ha re, Sebna negara andi faget lisu palhi lagaikhe mene a'nogo ha re, Yoah hun Asaf amlogo raja awiloba faget lisu palhi lagaikhe mene a'nogo ha lagaukwa.

⁴ Lagaukwama Asyur inap sikhe fisogo welagaukwa inap omanogo nen ikhi logolik mel isukwa, ”Ninoe raja Asyur mene nen hun Hizkia faget ikhe mene re yi'nogo yaga'no. Raja nen ikhi logolik he, ”Nenahalok haren anggikhi logolik an enek he nomame werek iluk legeisogo fakhiki lagen nogo?

⁵ Haren anggikhi logolik he inaneba ili'lagwi andem oba re ap tentara nen hilingisugun mene wenggel fuluk hilingiri'lagwi mene inom nen it tentara inomame werek andoma inom higitsek anggikhi lagen a? Hat he saba hendawinggen himbirik logolik raja Asyur mene ninom walhogoin iluk hilingiti lagen nogo?

⁶ Haren he Mesir en lebetneogoin iluk hendawinggen eberek logolik hilingiti lagen oba nen, andi re aben sige tomuk faget wa'lengge oak misik oba tomugetarek hago. Arigini'mo re tomuk a'nogo sombologo lagunem hat henggi folokhogo hoasu hagaro,” ikhe yaga'no, iluk yagaisasikhe.

⁷ A'nogo isukwasik Asyur mene sikhe fisogo inap omanogo nen nekhengge ikhi logolik, ”Athe haren heisena Tuhan Allah ba hendawinggen eberek logolik hilingiti lagen a? At Hizkia nen afuni Yehuda mene inom Yerusalem mene inom o Yerusalem mezbah elokhoma omanogo nen Tuhan obaget hilingisuageluk miminginafemo re, legaphogo faga mene re mezbah Tuhan amu obaget woge'luk fagarek oba a'nogo re lek nogo a?

⁸ Yogondak an nen raja Asyur mene enuba nailo legengge wal houwogelugat ikhi lagi o. Hit hinebe angge kuda dua ribu nen wokhisamo nen he ap hit mene hinebe andem higithogo kuda waluk lagu mene asumo re elo'lego.

⁹ Nen, ap perwira Asyur mene inom walhogoin iluk he it horok maben hak mene inom walhogoin meneba nen ogore hit hinom he higitsek legat. Ariginik meneat he iren he Mesir en kereta weim yafarek mene inom nen ap kuda ba lagaluk weim yafarek mene inom lakfei wesuageluk eberek logolik welagep andi ri!

¹⁰ Hiren ebeti logolik niren hit hinanggweangma ari inoasi we'luk hinomame leget hinobagagun andi re Tuhan nen lebetnisagain he anggikhi lagep lega? Nit he Tuhan ebe nenat hit hinoasi kwi wesimbik mabenet hinobagauwageluk mimingninafemo hilingiti lago o,” iluk yagatikhemo welagaikhe.

¹¹ A'nogo isikhemo it Elyakim inom Sebna inom Yoah inom, aremnogo nen perwira Asyur mene a'nogoba ikhi logolik, ”Ninoe haren nit wene yaganisageluk he Aram inaneba yaganisan o, niren elok fut fogoin. Nen Ibrani inaneba ugunemen he afuni o kota leget pak waganek ambolkwe werek mene oma nen fut feinogo o,” iluk yagatukwa.

¹² A'nogo isukwama at perwira Asyur mene a'nogo nen ikhi logolik he, ”An noe nen la'nobagai waga andi re wene andoma mondogat he hit inom hit hinoe raja faget inom enek yagahisoageluk la'nobagai waga lego? Athe afuni o kota leget pak waganekwe hurek werek oma inom, hit hinom seberogo hinonggwarek hinal wurogo ninggik, hinamise wurogo ninggik, hilingisugun mene andi faget laknobagai wagama yagahisageluk ikhi lagi o,” iluk isikhe.

¹³ A'nogo isikhesik perwira lego mene a'nogo menlagaikhesik he Ibrani inaneba ane kweti logolik, ”Raja Asyur mene nen ikhe mene yi holini o,

¹⁴ Hit he Hizkia nen lalhinabigiluk hilingiri'lago mene andi faget ane holu fugo! Aren hit telhinabigin he elo'lek!

¹⁵ Hit he Tuhan oba hinendawinggen tibet fuluk logoni iluk hinendawimo kagali'lago mene andi faget ane holfuluk werek lego. Hiren he Tuhan nen nit telninafik, tentara Asyur mene nen nit hinawi kota sebeli kwi wesinogo iluk kwe palninafik igin hea, iluk hinendawimo ebesu fugo.

¹⁶ Hiren raja Hizkia ane holhu lek! An noe raja Asyur mene nen ikhi logoik he, hit hinawi kota hinebe welagep kwe andoma herakfisaluk an nawe a'ma asi we'ni o. Hit a'nogo hilingisugun halok he hobuk hiren hinagayo anggur enggen hinonggwarek hineabumo nen ninggik, nen e arah enggen hinonggwarek hinagayo enggen mene ninggik, hinagai mogo hinonggwarek hinagai meneat hinagaisogo ninggik, ikhi logolik werek kwelek enek he,

¹⁷ an nen hit hinanggweang he hiren mene omanogo inom higit meneba waganogo hinobagai lagain o. Andoma re anggur hit hinobaget itu mene inom, gandum yabumo nen hit hinobaget tepung weregeratunem hit elok ninggi logogun o.

¹⁸ Hiren Hizkia ane holhu lek! Aren he hit lalhinafi logolik he Tuhan nen nit telninabigin iluk yagahisili'logo andi. An nenggi a'ma nen he dewa inunggulenu amu mene nen it inoba telinafe mene ekhe werek nogo a?

¹⁹ Dewa o Hamat mene inom Arpad mene inom omanogo re koma werek? O Sefarwaim mene dewa omanogo koma werek? It andoma nen o Samaria agap teli wagaikha mene ekhe werek nogo a?

²⁰ An nenggi a'ma nen he dewa o ki mene nen it inawi inebe welagaikharek oba nen lologo wulabi waga mene ekhe werek nogo? Tuhan nen o Yerusalem telogo fagain iluga? Mondok elo'lego,” iluk yagaisasikhe.

²¹ A'nogo ugunem holhukwasik he afuni Yerusalem mene omanogo inoe raja Hizkia nen yagaisasikhe mene higithogo re, inane onggo igi'lek welagaukwa.

²² Andi nen he Elyakim inom, Sebna inom, Yoah inom aremnogo inendawinggen heiselhi logolik enegenggerogo iluk he inasu tilip talaphogo lak fesukwasik he, perwira Asyur mene nen isikhe mene omanogo raja oba yagasi lagaukwa.