YESAYA 31 - Allah Wene Fano Wene Hupla Inane

Allah nen Yerusalem along palogo fisogo logogin isikhe wene

¹ Ap o Mesir mene nen lebetninabuageluk kinosi lagaikharek mene andi re alomat laga logouwak! It he Mesir mene inomame hokho mene inangge kuda hokhorogo werek andiba inom, ap tentara esa logalek meneba inom, kuda iren mene omame hokhore'ma inangge kereta ogo hokhorogo werek andi faget inom inendawinggen himbiret fagasik hilingiri'lagwi. Oba nen he Iren Tuhan Allah Israel mene Mondok amu tegelek welagarek mene a'nogoba tibet figi'legengge logolik lebetninabin iluk kino ili'lagwi lek.

² Tuhan he endawinggen hebelek logolik Aren ningginik mene hilingisigin iluk elu mondok werek. Aren he it ap ina'mage weak mene inom, ap ina'mage weak mene nen leberisagarek mene omanogo inom unggum inoba fugunem enggin-fenggin inoba agarek.

³ Afuni Mesir mene andi re Allah re fuk afuni mene werego, kuda iren fisogo mene andoma re ekhe hunik mene re, fuk welagarek mene nek werek. Arigini'mo re Tuhan nen enggin mene inoba fagain iluk hilingitunem andi re inunggulenu omame logogin mene inom inunggulenu lebelek mene omame mene nen leberisagarek mene omanogo inom pule pumo re it inebe pirenerat legasugun andi.

⁴ Tuhan nen an noba ikhi logolik he, ”Singa nen ninggerek engge sebelek logolik, it ap wam domba konharek mene esa logalek omanogo nen inane hokhorogo kwetu mene omanogo faget ailo agi'lek welagarek andi hakhogo re, An nen hobuk Punu Sion a'nogo faget weim yabimbik sebelogo fisogo logogin o.

⁵ Sue ekhe nen eak awi wuri'mo sebelek logolik ogolabi langhogo lambun-lambun hilingiterek hak, An Tuhan Nomame Mondok Hokho mene a'nogo nen o Yerusalem nawea'ma fisogo welagik, agap telogo figik, ebikhit agik igin o,” iluk yaganete.

⁶ Tuhan nen ikhi logolik, ”Hinunggulenu Israel mene hiren An nane sagal fuluk, An neilhanem weak hilingiti lagep. Oba nen yogondak hiren sugulogo An nambit we'ni o!

⁷ Hinenggi ekhe higit asi wesigin oba re hiren kembu ilirengge emas mene inom perak mene inom hit hinenggiba nen mondok weak mene hilingiti logolik pugunetep mene oma mondogat hugisogoin o.

⁸ Asyur he hobuk weim oba nen leget fisogoin, oba nen he andi afuni inomameba re fuk. Ap Asyur mene weim elema nen heise longgo imbik ap alegenek mene re afuni inamingmingengge mene asugun.

⁹ It inoe raja re ailo nen heise longgo igin, ap sikhe fisogo inap perwira aren mene omanogo re youk lambik, it inagoromi weim yafu mene faget bendera omanogo herak fisaluk longgo ugun,” iluk Tuhan o Yerusalem oba andoma nen At endawimo agaiyekhogo iluk wam warogo noletik, apne wanhik, fogeratik, agarek mene a'nogo nen mondogat ane ikhe.