YESAYA 3 - Allah Wene Fano Wene Hupla Inane

O Yerusalem oba andoma obabut nonghong igin isikhe were

¹ Tuhan Omame Hokho mene a'nogo nen he o Yerusalem oba inom Yehuda oba inom inamburu nunggu mene inom inagai inom ibi-eberogo nen mondogat wanigin, meneat he a'nogo wanhi logolik it inogogwi kaindek inoba himbirik welagaikharek mene ogore lisogo woginabiginat.

² It inobaget hilingitunem inalong agaikharek mene inom, tentara inom, higithogo pilingitarek mene inom, nabi inom, hobuk wene yi'nogo hilinglasigin iluk agarek mene inom, ap harise mene inom wesagun mene inom,

³ sikhe fisogo welagaikharek mene inom, inogogwi ap perwira mene inom, ap kaindek mene inom, negara oba inenu lego werek mene inom, halinafarek mene inom, mondogat woginabigin enek.

⁴ A'nogo woginabimbik he afuni ferinarek logouwageluk Tuhan nen yenggerugwi ket sogwe mene menfisilik lamo re ferinarek logolik inendawimo nen anggaluk enek yagaisikhi logogun.

⁵ Iren he inenggi omameba ekhe sebelfisigik, nen ekhe weagetfisigik hilinginafi logogun. Ap souge mene nen he inaluendek mene sebelogo fisigik, nen ap sebelek mene nen he ap lego mene sebelogo fisigik hilinginafi logogun.

⁶ Andem sambul he afuni it mene misik ekhe wenagaisogo fisaluk iren ikhi logolik, ”We hat enek he hasu fanorogo laberek welagenma re, yogondak enggin-fenggin werek oba ya re haren nit fetninarek logoinogen menlame o,” iluk yagati logogun.

⁷ Oba nen he aren onggo ikhi logolik, ”An he hareise nagun fugo! An ogo namburu nunggu mene inom, nasu laberugu mene inom legat. Andi nen he an noba hat nit ninunggulenu yi mene fetninarek logoin iluk mimingnafu lego!” iluk ikhi logogin.

⁸ Ibi eberogo nen Yerusalem he mondogat nonghong igin! Nen, Yehuda re lobakhogo pigin. Andi re it inane agarek mene inom, inobabut hilingitarek mene inom he Tuhan ane sagalogo fuluk, At omame werek mene a'nogo inom eil eri'lagwi andi nen hilingisigin.

⁹ It inanini mondok weakhogo hilingitarek mene a'nogo re it inobabut winik wonok agarek andiba weinam agarek. Nen afuni o Sodom mene nen attak weak hilingiti lagaukwa hak iren weinam-weinamat weak hilingiri'lagwi andi. A'nogo hilingiri'lagwi andiba re it inonggwaregen weaget fakhugunem he inebe alomat lakhikhi logogun o.

¹⁰ Tuhan nen ikhi logolik he, ”Afuni An noba tiphogo hilingiri'lagwi mene andoma inoba re hinagap telhinabigin enggere hinagaiyekhogo logoni iluk yagaisikhi logoino. Nen, it he inangge yi mene ti mene likhak yugulogo yatarek mene andoma ninggi logogun.

¹¹ Oba nen ap inaniniba nek hilingiri'lagwi mene andoma re, iren afuni amu mene inoba hilingfisili'lagwi andi hakhogore it inoba ogo a'nogo hilingfisagain enggere inaplurogo logouwak.

¹² An nagainafuri andoma re it ap yi mene ti mene ekhe inom seberogo helagarek mene inom, ap inamep nenggarek mene inomen inenggi omameba perelisikhi logogun. An nagainafuri re it ap ferinarek logogun mene nen inendawinggen nonghong isugunem he kwe ki lou he inendawinggen nonghong leil wati logogun o,” iluk yagaisano.

Tuhan nen againafuri wene inoba figik kotik hilingisigin wene

¹³ Tuhan he, At againafuri omanogo inawene pilingisogo wene inoba figik kotik igiluk mendek logolik fik-foukhogo werek.

¹⁴ Nen At Tuhan he afuni At againafuri ferinarek welagaikharek mene inobaget inawene higithogo pilingitu mene hilinglasigin. A'nogo hilinglasimbik he Aren it inoba hikhip isagain mene re yi: ”Hirenat anggur yabumo enggen ugu mene omanogo re hugul engge nek helikhi lagep, ariginhi lagep andiba re, hit hinailoba re ap inenggi lek mene inangge helikhi lagep mene omanogo nen hoporek werek.

¹⁵ Nenahalok hiren An nagainafuri enggin-fenggin inoba figik, ap inenggi lek mene hinomameba inangge telogo heligik, hilingiti lagep nogo? iluk, An Tuhan Lego mondok logolik Nomame Hokho welagirek mene a'nogo nen nane mondogat igi o,” iluk ikhe.

O Yerusalem hemi futfouwageluk yagaisasikhe wene

¹⁶ Tuhan en ikhi logolik, ”Hani, hemi o Yerusalem mene yoma re mondogat winik-wonok ili'lagwingge andi! It he inobabut lagoksek logolik ineilhombut watik, kwe laga logolik winik-wonok enggerik lagik, hilingitarek. Ineisok he ineranhogo telim-telimenggerik laga logolik ineisok habip kwelabek mene omanogo abolok lelok lelogenggerik lagaikharek.

¹⁷ Andiba re An nen it unggum wogisagain, it inunggul ebene re inalulen inoumo nek sagarogo hilinglasimbik inunggul hogologo inagap enek hilinglasugun,” ikhe.

¹⁸ Huli andem oba re Tuhan en hemi Yerusalem mene inalilingge li'loukse'ma wonoget fakhagarek mene omanogo wanigin oba arat asi wesigin. It inalilingge andoma re: inunggulkwe puksek mene inom ineisok habik inom siong inom,

¹⁹ inenggi senggan inom inelokhe su salek mene inom,

²⁰ inunggul asu inom inendawinggen wanherek mene inenggiba pugetarek mene inom, inobakheba pugetarek mene inom,

²¹ senggan inenggi segelet kwe kwelabek mene inom, inambisangmangge inom,

²² pesta hilingiti logolik inasu fano mene labetarek mene inom su ebe mene endakwe labetarek mene inom, dombet uang kwalharek mene inom

²³ su linen eil seram mene inom, inalonggopma kelharek mene inom, kumesu hakhogo inalonggop kwe peisabirogo itarek mene inom, mondogat wanigin.

²⁴ Yogondak he, iren amben-amben engge yuguli'lagwi, nen hobuk he it inamben weak mene sang igin. It yogondak inalinggin eil sakhorek meneba puksek oba nen hobuk helep tambang hak mene hinggi weak meneba pugeti logogun. It inunggulmo inesi fanorogo wulibik mene andoma re herogo lamo inunggul oak enek asigin. It inasu fano mene andoma hobuk su mondok pulal mene labeti logogun. Yogondak he it ineil alili fanorek oba nen hobuk he it inebeba enegenggerogo cap taget fisugunem he inebeba mondogat nonghongsek mene hilinglasugun.

²⁵ Ap it inomame werek mene andoma re weim ambisangma nen wa'lasugun.

²⁶ O kota kwi lagaikharek oba kwe ambe hokho mene pale'ma andoma re afuni nen le yagaisogo fong wati logogun, nen inawi kota andi re hemi inalfulukwa kogouk hilingfisugunem kweangma hurek welagaikharek hak hilingik logogin.