YESAYA 25 - Allah Wene Fano Wene Hupla Inane

Wuniba fogeratarek awuni

¹ Tuhan Hat he an neisena Allah welagen, an nen Hat legeisogo hobagakhi logolik, Hat henu fogethafi lagi. Haren hilingiti lagen mene andoma mondogat he elalin mene nek hilingiti lagen, Andiba re Haren o attak andoma nen wene melalogo fesigindik tiphogo nek hilingiti logolik welagen.

² Kota a'nogo re Haren mondok lilibukhogo fegen, nen o kota omame werek awi a'nogore Haren langguk-langgakhogo fegen. O istana raja ebe werek oba ap pok mene nen wuta mene a'nogo re mondogat lobakhogo pikhe, nen hobuk wuti'legat mondok-mondok logogin.

³ Inunggulenu ekhe mene-ekhe mene inomame werek mene omanogo nen he fogethafi logogun, kota-kota inunggulenu lombok inanini weak mene werekwe omanogo nen he inailothafi logogun.

⁴ Andi re Hat hebe afuni inomame lek mene hoba wagik, inenggi lek mene inom, inelagaikhogo welagaikharek mene inom, inailo legengge hoba wagik, ikhi logouwageluk hilinglagagin andiba. Hat he sogoi sielu wagunem hina'laguba faget inom, nen mo aigen kuna'ma kuguba faget inom higit welagen. Andi re ap inobaharo weak mene nen he o salim oba sielu nen hilingiterek hak inoasi wagik,

⁵ o kweang iring-paringse'ma sogoi aganhan mene waga logolik inoasi wagik, hilingiterek andiba o. Oba nen he Haren nit ninaselei mene omanogo inambe to'mot fisikhi lagen, anggulogen mo aik nagulherek a'nogo hak, ap inobaharo mene nen ngai wai liafarek mene omanogo inane palfisikhi lagen.

Allah Aseni hilingisigiluk fouget fikhesik werek isikhe wene

⁶ Punu Sion oba andoma Tuhan Omame mondok Hokho mene a'nogo nen yi afuni ti afuni inunggulenu lombok o kweangma welagaikharek mene mondogat inobaget fougesigin. Aren he nunggungge enduk fano mene inom, anggur agai mondok fano mene inom fougesigin.

⁷ Punu andiba nen he yi afuni ti afuni inunggulenu lombok inendawimo heiselhunem sebelinarek werek mene a'nogo ohena hakhogo waganogo lakfisagain.

⁸ Tuhan Omame Mondok Hokho mene a'nogo nen he wa'lagaikharek mene a'nogo mondok-mondogat lek hilingisogo fagain! Aren he afuni inelokhe lombok it ineil amusu mondogat terinabigin. Nen, At againafuri o kweangma yoma nen sebelogo fisugunem welagaikharek mene omanogo inoba nen waganogo lakfisagain. Tuhan nen hilingisigin iluk ane mondogat ikhe mene andi re eberogo nenat hilingisigin.

⁹ Andi sambul afuni nen ikhi logolik, ”Nit ninagap telninabuageluk nenangot hikhi lago mene a'nogo Arenek he eberogo nenat Allah nit nineisena o. Eberogo Tuhan ebe yi aro, At andi niren nenangot hikhi logolik welago mene. Aren nit mondogat ninagap telogo ninobagaikhemo re yogondak niren ninagaiyegeti lago o,” iluk ikhi logogun.

Allah nen Moab unggum wogosigin wene

¹⁰ Tuhan enggi Punu Sion oba sebelek logogin, oba nen Moab he gandum enggen ineisogen perelharek hak alperelogo fogoin.

¹¹ Afuni andoma mene re inenggi langhogo aben i kume louwogeluk hilingitarek hak hilingisugun. Oba nen he Tuhan nen it wonoget fakhagarek mene andi inoba nen sebel fisamo re iren hilingisu elo'lek enek asigin.

¹² Ap Moap inaben pa' leget mene helep oba omamerogo legeisogo fei lagasukwama uan awanhogo waganek mene andoma re Tuhan nen langgukhogo kweangma lobaget fisamo re wolelenggen taganogo wulhigit hilinglasigin.