YESAYA 23 - Allah Wene Fano Wene Hupla Inane

Tirus inom Sidon inom hilingfisagain mene faget isikhe wene

¹ Tirus faget yagaisoageluk isikhe mene re yi: Yago, hit ap Spanyol hinap i laut ebene nen laga pu hilingiti lagep mene omanogo re le aga logoni. Hit o Siprus nen hinaiba wesuogeluk wagunemen yagahisikhi logolik, kota Tirus a'nogo re mondogat wolelenggenhogo pikhe, nen hit hinaiba inom hiren hinangge kapal fei waga lagep oba obalik omanogo inom he mondogat sunukhogo pilik lagama o, iluk ugunem holugun.

^2-3 Andi nen he yago, hit afuni i esanggokwe welagep mene inom, yi mene ti mene onggo pali laga lagep mene inomen he hinetokhogo afuni hit mene o Mesir i laut fena fikhit andoma laluk gandum onggo paligik, hunirigik, nen inunggulenu ekhe ale'ma mene mondogat inoba onggo palpal agik, ikhi lagep mene omanogo re hinendawimo weakhogore hinane igi'lek logoni o.

⁴ Hat kota Sidon yi re, legeisogo hobagakhi lagaikha mene omanogo mondogat lek agaikha o! I laut eil uanhogo yenggelek mene nen ogore hat hobaget legeisogo hobagagi'lek logolik, yi'nogo ili'lago, ”An he nomalik takhikhi lagi'lek mene o, nagainafuri abengge ogo helime ogo taginafi lagi legaro” ili'lago.

⁵ Ap Mesir mene nen ogore Tirus mondogat leget fisikhe o, iluk ugunem holhambik he youk lambik inoak leigesugun.

⁶ Hit afuni i esanggokwe welagep mene andoma re le yakhilik-yakhilik hinonggwarek hinagap telogore hinawi meisalogo helaluk o Spanyol wura lani o.

⁷ Hani, hinawi kota Tirus attagen engge welagaikhe awi a'nogo. Kota agaiyekhogo nek hilingitarek awi a'nogo re yi nogo a? Kota i laut palogo fena fikhit andoma loageluk lakfisikherek awi a'nogo re yi a?

⁸ Yi mene ti mene onggo heligik, saburigik hilingirik nikharek mene andi re ap kaindek inenuwerek andi re lek nogo a? Tirus kota omame mondok hokho werek aiba ari re sa nen leget fisagain iluk wene kagalhe nogo?

⁹ Tuhan Omame Mondok Hokho mene a'nogo nen wene andi hilingisigin iluk Arenat sikhiphogo ikhe. Aren he it inenggingge helugu meneba wonoget fakhagarek mene inom, afuni o kweangma kaindek welagaikharek mene inom, seberogo fisagarek awene andi wurep kobokhogo huli andiba leget fisagain anggikhe.

¹⁰ Ap kapal oba yabu hilingitarek inap omanogo re inebe mondogat lek enggere, hit ap Spanyol hinap yi re, hineabu helikhi logobagaigen he hela wilipni o.

¹¹ Tuhan enggi i laut agumkwe pisarogo lakfikhesik he, o kerajaan omanogo mondogat enggimo yinggilogo wanhemo werek. Nen Aren o Funisia leget pak waganek mene omanogo meisa'lambukhogo leget fisoageluk wene mondogat tekhogo fikhe.

¹² Tuhan ane ikhi logolik, ”Kota Sidon yi re! Hat he hagaiyek mene ekhe inom hilingiti logogin lego. Afuni re mondogat sebelogo fisogoin. It mugusogo o Siprus logoin oba nen ogore fano liokhogo logogun legaro,” iluk ikhe.

¹³ It inunggulenu Asyur mene nen he lek oba nen, it afuni Babel mene nen he kota Tirus mene inoba olomene aik anini mene o andoma sagarogo logouwageluk herak fisagama werek. Irenat he o pin kwi wesuogeluk wagunem he, ap lagaluk ineil werek oba faget maserogo wuta mene omanogo inom, nen kota andi leget pak waganek mene omanogo inom mondogat meisalogo pelafik, kota andi oba weak-peakhogo hilingisogo figik ugun o.

¹⁴ Hinawi kota hiren hinendawineggen oba himbirik welagep mene omanogo mondogat weaget laga andi nen he, hit yabu laut oba hilingiti lagep mene andoma le aga logoni o.

¹⁵ Inenggi hobuk ekhe asi wesigin oba re Tirus andi re tujuh puluh tahun nen ap raja ebe umur welagarek higithogo oba inonggorasimbik logogun. Oba nen linggene andi arat hilinglagunem he Tirus he, he onggo faget yanani hilingiterek mene hak asumo awuni re yi'nogo ikhi logogin:

¹⁶ ”He yanani nilik negendek mene hoba ebethagarek lek mene yi re, hat faget ebet heoakhogo re, no kecapi anet haluk hawuni warik-warik o kota haninget han o.

¹⁷ Tujuh puluh tahun andi mondogat hilingfuluk he, Tuhan nen hobuk Tirus faget ebet hambik Aren yabu attak hilingiti laga hak hilingiti logouwak anggagain o. Aren he kweangma mondogat o kerajaan werek mene andoma inom onggo palhik, hunitik, hilingiti logogin.

¹⁸ At ambisangma helugu mene inom, omame agunem helugu mene inom he foukhogo fakhikhi logogin lego, oba nen he Tuhan obaget enek fikhi logogin. Afuni Tuhan apne wanhi logogun mene nen he uang andiba inamburu nunggu mene inom inasu fanorogo laberugu mene inom onggo hunirikhi logogun.