YESAYA 22 - Allah Wene Fano Wene Hupla Inane

Yerusalem hobuk hilinginabigin mene faget isikhe wene

¹ O Lembah Penglihatan faget yagaisoageluk isikhe mene re yi: Yago, hit afuni Yerusalem mene hinebe mondogat o tum oba lagakhi lagep andi re nenahalok nogo?

² It kota andoma nen seni-seningge isati logolik inagaiyekhogo hilingitu werek andoma re hilingisu elo'lek oba nen hilingiri'lagwi o. A'nogo andi re hit hinogogwi weim inanini mene inebe wa'lagaukwa andoma re weim yafunemen inoatama wa'lagaikha re lego?

³ Ap hit hinogogwi panglima sikhe fisogo mene omanogo re iren inandok oan pisinget halagi'lek engge nen inebe heise lagaikhama aben hele warinafa. Nen, hit mene ap inomame werek mene ogore yatma asi lagaikhaba nen he hele warinabugunat.

⁴ An nobaget he ebesu fugo, an he ap an nunggulenu mene wa'lagaikha andoma faget le aga logoigen he heraknobagani o, hiren an nendawimo nagaiyek asuageluk konabu fuk.

⁵ Eberogo nen Tuhan Mondok Lego logolik Omame Mondok Hokho mene a'nogo nen he o Lembah Penglihatan yoma nen nonghong isigik, youk laginafik, inane sagalpagal isigik hilingisigiluk o linggene yiba arat wenagaisogo fikhe. O kota leget pak omamerogo waganek mene omanogo re arat molulukhogo fikhe. Nen, iren lebetnisani iluk inane kweri'lagwi mene omanogo re afuni punukwe welagaikharek mene omanogo nen inane holi'lagwi.

⁶ Ap Siria mene re inangge kuda inom kereta inom weim yabuogeluk waluk weri'lagwi, ap Elam mene re sige-sikhe waluk weri'lagwi, ap Kir mene re tok kwe palengge fik-foukhogo hilingiri'lagwi.

⁷ O Yehuda ba tonggoma kweang mondok heisele'ma omanogo re kereta weim yafarek mene nek petesikugun. Nen ap kuda ba lagaluk weim yafarek mene re o Yerusalem kwe kwagarek oba andoma fangsek logogun.

⁸ It Yehuda mene nen inebe himbirengge iluk hilingik mene omanogo mondogat he wolelenggen isogoin. O andi sambul he hiren togengge fuguba omanogo sige sikhe werek iluk herasugun.

^9-10 Hiren heratunem en he, pa'leget mene o kota Yerusalem oba haningisogo waganek mene omanogo fena halik halokse'ma hineilenggen hambik he fanorogo halogo fou mene hilingi'mo hogoin o. Hiren o Yerusalem wurik mene omanogo oloarik lagunem en he fena meisale'ma pugunesu mene hilingi'mo hambik he helep andoma nen waganogo leget andoma omamerasugun. I mogo yenggelugun iluk,

¹¹ hiren i mogo o kota elonggoma pugunet fuluk, i mogo attak meneba yenggel fikhi logogun. Oba nen hit he Allah nen wene attak a'nogo hilingisigin iluk kagalogo fesikhe mene a'nogo re fut figi'lek hilingiti logogun. Nen andi re asuageluk sa nen hilingfikhe nogo iluk ogo futfikhi logogun legat.

¹² O andi sambul he Tuhan Mondok Lego logolik Omame Mondok Hokho mene a'nogo nen he hit le yagaisogo logolik fong watik, hinesi hogologo palhik, pelagi su labetik hilingi'ni o, iluk yagahisagain.

¹³ Oba nen hebekhogo hit he hinagaiyekhogo hilingiti logolik seni isati logogun. Hiren hinaiba hinanggo kambing, domba wat fakhaluk eino ninggik, hinagai anggur agai ninggik ikhi logolik, ”Nit hobit wa'lasugun enggere, ninamburu ninggik, ninagai ninggik ikhi logouwogen we'ni o!” iluk wolinafi logogun.

¹⁴ Tuhan Lego Mondok logolik Omame Mondok Hokho mene a'nogo nen an nelokhoma weinam agasik ane yi'nogo ikhe, ”Eberogo nen iren weak hilingiri'lagwi mene andi re An nen sagalogo leget fisigi'lek werek kwelek enek he it inebe wa'lasugun, iluk An Tuhan nen nane mondogat igi o” iluk yaganete.

Sebna endawinggen senggerogo iluk yagatikhe wene

¹⁵ Tuhan Lego Mondok logolik Omame Hokho mene a'nogo nen an mimingnafi logolik hun Sebna raja awi istana ba inoe kepala werek mene a'nogo ambit laluk, Tuhan nen yi'nogo yaga'no ikhe, iluk yagasi loageluk mimingnafe,

¹⁶ ”Honggwaregen anggikhi logolik hat hebe yi re sa anggikhi lagen? Haren ero kiba honggwarek salhabugun oba faget helep elema andoma anggwe folelik kwikhi lagen nogo?

^17-18 Hebe hebelogo logoin, Hat hebe re An nen yatpatma hukhea lagain. An nen hat hebe pikpukhogo halmak heambik he pogola limbilogo lakfagarek hak o sili hokho mene o silikwe limbil-limbilengge lakhobagagin o. A'nogo hilinghabumo re hangge kereta faget hawonok aga lagen andi re hangge andoma era'lu nen hebe wa'lasigin. Haren he heisena eisok erokwe inenu weagerogo fagain andi o.

¹⁹ Nen haren a'nogo hilingisigin andiba re, An nen hat heabu hilingiti lagen mene legetfigik, hat mene pangkat lego welagen meneba nen pelakhobagagik, igin o.

²⁰ Andi sambul he An nen namingmingengge Elyakim hun Hilkia amlogo wolesigin.

²¹ A'nogo wolesimbik su hat kain logolik labeti lagen mene inom, ban inom, andoma An nen waganogo re at puget fagain. Nen yi mene ti mene hat eiserogo logolik welagen mene omanogo waganogo re at mondogat wogosigin. At he afuni Yerusalem mene inom Yehuda mene inom faget ineisena logogin.

²² At he, raja Daud en tagomangge mene a'ma logolik omame hokho mene logogin. Nen aren o kerajaan omame werek mene andi faget kwe kunci enggen fisogo logogin, Aren hutu halok he it ekhe nen yagasu lek hak logogin, Nen Aren yagatu halok he it ekhe nen husu lek hak logogin.

²³ Ap hele su leratu mene leget pak waganek meneba omamerogo kelharek andi hak At eabu omame hambuk lele warek mene wogosigin. At oba nen he eisok erokwe mene mondogat legeisogo fisikhi logogin.

²⁴ Oba nen he, eisok erokwe mene inom, ogogwi agoromi inom faget he at onggwaregen leberisikhi logogin. Posiemanggen heleba belanga kologo pelafarek andi hak, it andoma re at oba inendawinggen pelabek logogun.

²⁵ Andi hilinglasigin halok he, hele senek mene omamerogo homago mene andi re tekhogo pigin. Andi re at eisok werekwe mene inom ori erugwi inom inebe mondogat at oba kologo pelabek logogun mene legasugun he a'nogo hilingisugun andi, iluk An Tuhan nen nane mondogat igi o.” ikhe ino isikhe.