YESAYA 21 - Allah Wene Fano Wene Hupla Inane

O Babel pigin mene faget abikanggo hasikhe wene

¹ Tuhan nen o Babel oba hilinglasigin mene faget yagaisoageluk isikhe mene re yi: Sogoi sielu anini mene o leikwe nen kwanirogo funfan hilik wagarek hak, o kweang mondok inailorekwe andoma re enggin mene inoba asi wesigin.

² An nabikanggoba hugunemen he, enggin-fenggin hugu mene inom, henarogo hilingitu mene inom, oba re mondok inailo asu hak mene hilingi'mo higi. Andi nen aren ikhi logolik, hit Elam hinap esa folek welagep mene yoma re pin kwi lani o! Yago, hit Madai mene esa logalek yoma re walingisi lani! It Babel inap enggin-fenggin hilingfisagarek mene a'nogo re yogondak Allah nen arat wurep oba hilingfisageluk werek andi.

³ A'nogo ugunem hasigisik he an neil higi mene a'nogo faget ninggi'nogo iluk nobakheindok palogo re neilenggen ha lek hak hilingnafik, nesanggo holu elo'legat hilingnafik, ikhe. An noba nailo mene nek agunem he noba ou ikhi lagi mene re hemi nen inomalik takhouwogeluk heinet watharek hak hilingiti lagi.

⁴ Nendawinggenma lebe-lebe nek ikhi logolik, hom-hombuk nobarogo re noak leigeti lagi. Hup asi wesuageluk nenangot higirek mene a'nogo re nendawinggenma abolok u hak enek hilingnabi'lago.

⁵ An nen ekhe hugunemen he pesta perjamuan hilingisuogeluk he ap pok mene hu'lasugun oba foukhogo hilingik were'ma higi. Andi nen he iren inagai inom, inamburu inom, ninggi logolik were'ma nen he ferekhogo aremnogoat wene ekhe yi'nogo ikhi laga, ”Yago, hit ap weim yafi lagep mene yoma sani! Hiren tok peigengge omanogo fik-foukhogo hilingi'ni o!” iluk ikhi laga.

⁶ Andi nen Tuhan nen an noba ikhi logolik he, ”Ap misik ekhe kagalek logouwageluk fei laluk he aren hagain mene andoma yi'nogo hilingik iluk yaganesi wesuakhogo lan o.

⁷ At eilenggen penetunemen ambi ap kuda ba lagaluk weim yafarek inap pirendek wuthigik wesugun a, athe it esa fena no keledai inom unta inom oba lagaluk wesugun mene re aren eilenggen fanorogo penesuak,” iluk yaganete.

⁸ Andi nen at kagalek werek mene a'nogo ane kweti logolik, ”Neisena an he, linggene hundik-handik, hubanggo inom kagalek welagarik wagi o.

⁹ Yethan, it inebe re wagaikha a'li! It ap esa kuda ba lagaluk lagaikharek mene inebere pirendek wurethigik weri'lagwi! Ap kagalek mene a'nogo nen wene waluk waga logolik, Babel he, mondogat sebelogo fikhe! Iren kembu agut hilingik mene fogeratarek mene omanogo re, halik-halokhogo kweanggwe telfol ikhe o,” iluk ikhi laga.

¹⁰ Israel an nunggulenu mene andi re! Hat he, kandum enggen perelharek hak alperel hafi logolik milil-mulelhogo hobagaga. Yogondak he, hat hobaget wene ebe mene At Tuhan afuni Israel mene ineisena Allah Omame Mondok Hokho mene a'nogo nen ugunem holhi mene yagaheti lagi o.

O Edom oba asigin mene faget isikhe wene

¹¹ O Edom oba hilinglasigin mene faget yagaisoageluk isikhe mene re yi: Ap ekhe o Edom en an noba yaganeti logolik mel ikhe, ”Hat kagalek welagen mene ahwi, hup yire aninurega? Mo miren hak logombik o wei igin nogo?” iluk ikhi laga.

¹² Andi nen an nen onggo ikhi logolik he, ”Hubet he wei igin, oba nen he hubasigin oba ogo arat asi waga. Nen, hobuk heinok wanigiluk halok he, wesimbik heinok wani we'no,” iluk yagati.

O Arab oba asigin mene faget isikhe wene

¹³ Arab oba asigin mene faget yagaisoageluk isikhe mene re yi: Yago, hit Dedan hinap hiren mene ap onggo paluogeluk yatma lagaikharek mene omanogo re o Arab kweang oba engga anggele'ma omanogo inawi sabu salogo nogoli'lagwi. inom nen hit o Tema anggweang oba welagep hinap inom yoma sani! Ap hit mene logalek ekhe onggo paluogeluk yatkwe laga la'luk Arab kweang oba hinawi tenda wuti lagep mene andoma re

¹⁴ Yago hit o Tema kweang oba welagep mene yoma sani! Afuni i nele nen hit hinambit weri'lagwi mene andoma re inagai noageluk wogisigik, nen ap o ekhema pugulogo louwogeluk lili'lagwi mene andoma re inamburu noageluk wogisigik, ini o.

¹⁵ It andi re karok enggatma nen inom, tok fangse'ma nen inom, weim elema nen inom weri'lagwingge re.

¹⁶ Andi nen Tuhan nen an noba yaganeti logolik, tahun misik higit agu kwelek andem he it afuni o Kedar mene weak mondok hilingiri'lagwi mene andoma mondogat wurep kobokhogo legasigin o.

¹⁷ Ap Kedar mene weim yafarek inap andoma re mondok inelouk-pinelouk inap welagaikharek, oba nen he we it endebengge nek inagap telasugun. Iluk An Tuhan, afuni Israel mene ineisena Allah a'nogo nen nane mondogat igi o, iluk yaganete.