YESAYA 20 - Allah Wene Fano Wene Hupla Inane

Nabi alfulukwa kogouk andi re enegengge hilinglasigin wene

¹ Raja Asyur mene Sargon a'nogo nen tentara inoe panglima a'nogo ayonggo fesikhesik o kota Filistin misik ekhe enu Asdod andiba pin kwi loageluk ayonggo fesikhe.

² Andi hilinglagi'lek werek kwelek tahun henagan welagaukwa andem oba Tuhan nen Yesaya hun Amos amlogo a'nogoba re su karung mene inom eiso'ma ugu mene inom laberek mene andem nonggologo fouwageluk yagatikhe. Ma re, aren ane hologo hilingitikhesik asu inom eisok agut inom laberek legengge laga lagaikhe.

³ Nen, o kota Asdod a'nogo hukhogo kwelakfesukwa sambul he Tuhan en ikhi logolik, ”An namingmingengge Yesaya re tahun henagan inukhogo asu laberek legengge eisok agut kwelabek legenggeat welaga. Andi re o Mesir inom Sudan inom oba asigin mene faget enegenggerogo welaga andi.

⁴ Raja Asyur mene nen he o kweang pire andem oba afuni andoma hele warogo sebelogo fisambik he inebe inalfulukwa kogouk hilingfisambik lirinarek lagain o. Yaman mene inom, souge mene inom mondogat he inasu laberek legengge ineisok agut kwelabek legengge inalele weinam-weinam o Mesir mene sebel fisikhi logolik enegenggerogo iluk a'nogo lirinarek lagain andi.

⁵ Afuni Sudan mene inoba himbirik mene inom Mesir faget inawonok agaikharek mene inom inendawinggen heiselambik he fanotninabigin iluk eberek logogun mene a'nogo alomat lasigin.

⁶ Andem oba re, afuni i laut esanggokwe werek mene nen ikhi logolik he, ”Raja Asyur meneba nen nit ninalong palek logouwageluk inunggulenu andi mene inoba himbirik welago mene a'nogo hani. Nit he ninagap telninabu elo'lek hilinglaga andi o,” iluk ikhi logogun.