YESAYA 19 - Allah Wene Fano Wene Hupla Inane

Allah nen Mesir mene unggum wogisagain iluk isikhe wene

¹ Mesir mene inoba hilingfisagain mene yagaisoageluk isikhe mene re yi. Tuhan o Mesir lageluk ohena weak-weak lagarek meneba weri'logo a'li yethani! O Mesir oba tugwi kembu werek mene omanogore At elokhoma inoak leigetik, nen afuni Mesir mene re inendawinggen eak agik hilingiri'lagwingge andi.

² Tuhan nen ikhi logolik he, ”An nen o Mesir oba andoma it inonggwarek inagaila'lak mene inom, weim yabuageluk hilingfisamo re, are nen are ekhe watik, it inawi horok-horokwe werek mene inebe wat-wat lagik, o kota ekhe nen kota ekhe mene inom weim yafik, nen kerajaan ekhe nen kerajaan ekhe mene inom weim yafik, hilingiti logogun o.

³ An nen it Mesir mene nen hilingisugun mene iluk eberek werek mene andoma sugitfisigik, it inagaiyek werek mene inagaiyek legetfigik, hilingisigin. A'nogo hilingfisamo iren he tugwi kembu werek meneba komo wene yaganisoageluk kino igik, hareise mene inoba inom, heinogengge mene inoba inom hilingisugun mene yaganisoageluk kino yagaisigik, ikhi logogun.

⁴ Mesir he, An nen ap raja obabut mondok weak mene nen ferinarek logouwageluk enggiba fagain o, iluk An Tuhan Nomame Mondok Hokho mene a'nogo nen nane mondogat igi,” iluk ikhe isikhe.

⁵ I Nil a'nogo re ebe endep-endep pikhi logolik mondogat firok igin.

⁶ I kalok hokho mene waganekwe omanogo re i ebe lek agunem he amben weak mene sang ikhi logogin. Kem-kem inom, engga inom mondogat pugasigin.

⁷ I Nil esanggokwe awi yago mene omanogo re pugasumo sogoien furogo lagain.

⁸ It ap ikan wanharek mene re i Nil andiba inasu yogwe su inom ikan watu mene mata kail inom omanogoba ikan ebe wanu lek hak hilinglasumo re, nenahalok halok hilinglaga iluk ina'makwe het-pet ikhi logogun. Nen, it ap yogwe su itarek mene re inendawimo weakhogo inoba lebelek a'luk logogun,

^9-10 it inom ap onggo wo'nisoageluk yabu hilingiri'lagwi mene inom inendawinggen heiselhi logolik inoba sinurogo logogun.

¹¹ O kota Zoan oba ferinarek welagaikharek mene andoma eberogo nen he mondogat kembu! Ap Mesir inap inendawinggen kagalek mene nen he it kemburogo hilingiri'lagwi mene omanogo komorinabi'lagwi! Iren inailo legengge raja ba ikhi logolik he, ”Nit he ap o attak inendawinggen werek inap logolik inogogwi raja ogo higithogo hilingiti lagaukwa omanogo mene inambisangmangge welago o, iluk ili'lagwi andi ri!

¹² Hun raja Mesir agun ahwi, hat hagoromi komo wene yagaheri'lagwi mene hebelek inap omanogo re koma werek? Tuhan Omame Mondok Hokho mene a'nogo nen o Mesir oba hilingisigin mene iluk ebete mene andi re it he inelu werega?

¹³ O Zoan oba inom, Memfis oba inom, ferinarek logolik werek inap andoma re ap mondok kembu mene nek werek. It he, ap ferinarek welagaikharek mene hak he fuk, iren he ap it inonggwarek inunggulenu mene omanogo weaget fisili'lagwi.

¹⁴ Iren komo wene inendawinggen nonghongsek mene yagaisili'lagwi andoma re Tuhan nen hilingfisugunem hilingiri'lagwi. Andiba re Mesir he ap lugu-lugwi palhi logolik talo-talonggerik lagunem inonggwaregen hebak wutu meneba ineisok peikhogo waragarek a'nogo hak hilingiri'lagwi andi o.

¹⁵ O Mesir oba andoma re, ap inomame werek mene inom, it afuni we mene inom, ap kain mene inom, it hesangge mene inom he, iren ekhe hilingisu elo'lek mene nek hilinglagaikha.

Mesir en Tuhan fogerasigin iluk isikhe wene

¹⁶ Inenggi ekhe asi wesigin oba re inunggulenu Mesir mene andi re hemi nen hilingisu hak youk lambik inailo asugun. Tuhan Omame Mondok Hokho mene a'nogo nen enggi legeisogo it unggum wogisugunem ineilenggen hambik he inailo nen inoak leigeti logogun.

¹⁷ Tuhan Mondok Omame Hokho mene a'nogo nen it afuni Mesir mene faget hilingisigin mene iluk wene tekhogo ikhe mene a'nogo ebethaluk he, o Yehuda kweang oba andoma re afuni youk laga logogun.

¹⁸ Andem sambul o Mesir oba andoma re kota ebe fuaben logogin mene re inane Ibrani inaneba nek ikhi logogun. Afuni andoma mene nen he, Tuhan Omame Mondok Hokho mene a'nogo enuba hombuk palhi logogun. O kota andem mene misik ekhe re enu kota matahari ikhi logogun.

¹⁹ Andem sambul he, o Mesir andi eroma andoma re Tuhan obaget mezbah misik ekhe logogin, nen kweang huli-hulimo andoma re, helep mendek mene misik ekhe Tuhan obaget enogo logogin.

²⁰ Mezbah andi inom helep mendek mene andi inom andem he Tuhan Omame Mondok Hokho mene a'nogo o Mesir oba welagarek iluk enenggerogo hilingik logogun. Nen, inunggulenu andi inaben sebelogo fisugunem, iren Tuhan oba telninabin iluk kino yagatunem, Aren ap misik-misik ekhe it telinabuageluk lakfisa waga logogin.

²¹ Tuhan nen afuni Mesir mene inoba weinamet fugunem iren At ebe inelu asimbik fogerasugun, nen iren warogo nolhu mene inom obaget fuluk wogetu mene inom At ambit waluk waga logogun, iren he hilingiti logogun mene iluk hombuk palogo Tuhan yaga'luk hilingiti logogun.

²² Tuhan nen he ap inunggulenu Mesir mene endawi hundik oba weagerinabimbigen he hobuk lagokhogo re it inoba fanorinabigin. Iren Tuhan oba inendawinggen hebelogo wagunem he, Aren it samban ugu mene inane esanggo holiluk he fanorinabigin.

²³ Andem sambul he, ebekwe ekhe o Mesir en pikhit o Asyur oba andoma kwelabek logogin. Afuni o negara andem mene re kwe andi kwe nen laluk waga logogun. Nen, it inebe seberogore Tuhan obaget fogerati logolik kabogeti logogun.

²⁴ Andem sambul it Israel mene re, it Mesir mene inom, Asyur mene inom higitsek logogun, it inunggulenu henagan andem he afuni o kweangma mondogat fanotfisugu mene logogun.

²⁵ Tuhan Omame Mondok Hokho mene a'nogo nen it fanot fisikhi logolik yi'nogo igin, ”Hit An nagainafuri Mesir mene re, An nen fanot hinobagagi o. Nen hit Asyur mene re An nen elalhinafigi mene, nen hit Israel mene re An nonggwarek nagainafuri wenagaisogo fakhasigi mene welagebo,” iluk yagaisagain.