YESAYA 18 - Allah Wene Fano Wene Hupla Inane

Allah nen Sudan mene wene inoba fagain isikhe wene

¹ Yago! o Sudan i palogo fena fikhit a'lima nen o kweang misik ekheba re sue ogolabi lambun hugunem hilingiterek hakhogo hilingitunem holi'lagwi o.

² O kweang andiba nen ap o sili misik mene enuba inogogwi kain werek mene omanogo i Nil agumkwe perahu ele'ma kwelakhigik weri'lagwi. Yago hit ap yonggo wene waluk wagep mene yi re, i bene andoma nen hinawi eroma hinambotkwe weak-weak lani o, laluk he ap hit hinunggulenu mene inebe inomame werek inap omanogo inom, inoakhuse uandek mene omanogo inom, inagap sakhorek inap omanogo inom, o yi afuni ti afuni mondogaren inailorinabi'lagwi mene omanogo inobaget wene waluk weak weakhogo yagaisa lani o.

³ Hit o kweangma yi awi ti awi mondogat sagarek welagep mene oma re! Poksu tom ebene kelogo liabe'ma linoget hili'lago mene andoma futfeni o! Iren trompet fut hili'lagwi mene andoma hinesanggo holini!

⁴ Tuhan nen an noba ikhi logolik he, ”Lilengge o hup aganhan lagaikherek sambul yi mene ti mene enggen palhu sambul lilsi'norogo abolo'lek welagarek hak, nen o linggene mo eil ombak-bak fano mene hilingiterek hak, An nebe welagiba po'lima nen noba heanerogo alokhogo logolik pelakhisa waga logogin o.

⁵ Anggur enggen agayoba oan wurik agi'le'ma, nen enggen taganugun oba horogasi wagi'lek werek kwelek, owil agayoba nen lologo pugu kwelek andem, pisauba anggur oak tegetarek andi hak, it selei mene nen Sudan mene siserogo wolelenggen tagalogo lakfisogoin.

⁶ Ap sikhe fisogo inap inebe warek andoma re herakfisamo o hibi lagagunem sue warek fili ninggerek arue nen inom, nen salim agunem maro mene nen warek fili ninggerek mene nen inom faget noageluk herakfisamo logogin o,” iluk ikhe ino.

⁷ Linggene Tuhan obaget fagarek oba andi arat asi wesigin sambul andi re it ap inunggulenu mene logolik inomame hokho, inalong werek inap, inoakhuse re mondok uandek, inagap he sakhorek, o kweangma mondogaren he inailorinafarek inap andoma nen he, it inanggweang oba i andoma sogan isaluk he ineisena Tuhan Omame Mondok Hokho mene a'nogo obaget fuluk wogosi waga logogun. Iren he Punu Sion At Tuhan Omame Mondok Hokho mene a'nogo apne wanharek oba andoma fogerasi waga logogun o.