YESAYA 17 - Allah Wene Fano Wene Hupla Inane

Allah nen Siria mene inom Israel mene inom wene inoba fagain isikhe wene

¹ Tuhan nen ikhi logolik, ”Damsyik andi re o kota hak he hilingik logogin lek, oba nen o meisalek enek kabok lagakhi logogin.

² O Siria oba kota-kota andoma re mondok-mondok faget herakfisaluk wilibumo re obalik andoma re yi anggo ti anggo kuluk were'ma re, ap ekhe nen iluk ogo inelokhe palu lek hak hilingik logogin.

³ Israel he at along palogo fakhugu mene a'nogo longgo igin nen Damsyk he omame logogin mene a'nogo legasigin. It ap Siria mene alinlan logogun mene re it afuni Israel mene welagaukwa hakhogo li'norinafu kwelek logogun. An Tuhan Nomame Mondok Hokho mene a'nogo nen mondogat igi o,” isikhe.

⁴ Tuhan nen ikhi logolik he, ”It Israel mene nen ina'mageba hilinginafu welagaikharek mene andi legasigin oba arat asi wesumo re, fanorogo logolik inenggi werek welagaikharek mene a'nogo legasigin.

⁵ It ap Israel mene re yabu o Refaim tonggoma gandum hokhorogo palhunem we afulfulengge endebengge welagarek aremnogo hak asugun.

⁶ E zaitun enggen mondogat paliluk enggi mene erumbul we endebat agarek a'nogo hakhogo it Israel mene ogore andi higit hilinglasumo re, endebengge nek inagap telinabigin. An Tuhan, Israel mene ineisena Allah a'nogo nen nane mondogat igi o,” isikhe.

⁷ A'nogo hilinglasigin andiba re afuni nen hobuk it Isarel mene ineisena Allah Mondok Horek logolik pogot kweang elalhikhe mene a'nogo oba telninabin iluk yagati logogun.

⁸ Iren inenggiba hilingiti logogun mene omanogo ambisangma faget ekhe eberek logogun lek. Andoma ebere yi mene ti mene fuluk wogotuba mezbah omanogo inom, amben fano mene duba noletuba omanogo inom, kembu dewi Asyera hilingik omanogo inom andoma.

⁹ Andi sambul he o kota-kota it ap Israel mene inaiba omamerogo wurik mene omanogo meisak langgukhogo hilinglasumo re it afuni Hewi mene inom Amori mene inomen, he it Israel mene inoba nen inawi kota-kota omanogo herakfisaluk wulibi wagaukwama hilingik welagaikhe a'nogo hak inane tiring tereng igin.

¹⁰ Israel, Hat he Allah helep tom eil hak abolok igi'lek logolik hagap tel hafik, awe a'ma fetharek welagik ikherek mene a'nogo oba honggoret fegendik welagen. Nen hebekhogo haren he tugwi kembu dewa omanogo faget fogerati logogin iluk awi yaginafi lagen.

¹¹ Oba nen he, awi yago mene andi pikhit fulelogo wilifi logolik henggi yasigin sambul andiat owil isigin oba nen he, enggen fanorogo isigin lek. Logogin mene re we inelagaik logolik anggolo hagarek mene inom nen inendawimo ou enek hugu welagaikharek mene inom andi nek logogin.

Selei mene inailokwe omanogo mabenet fisogoin isikhe wene

¹² Ap inunggulenu mene inomame hokho logolik welagaikharek mene omanogo inane sagali'lagwi, sagalhunem it inane anggunggare i laut founalhi logolik tung eterek hak hunikhogo hilingiri'logo.

¹³ It wagunem he i fu waga logolik esinggen founalik wagarek hak weri'lagwi. Oba nen he Allah nen inoasigiluk ugu nen it a'nogo heise re yatma lili'lagwi. It heise lagunem he sogoi en engga puk mene punu alilukwe nen furogo lagarek hak, athe kweang age sogoi sielu nen funhugunem hak, lili'lagwi.

¹⁴ O hubagunem he iren inailo mondok hokho mene hilinglari'lagwi, nen o wei igiluk ugu kwelek he koma lagaikhaheat longgo ili'lagwi. Andi re afuni mondogat nit ninangge telagarek mene nen hogoin mene ebere a'nogo andi.