YESAYA 16 - Allah Wene Fano Wene Hupla Inane

Moab inap he inomame legasigin isikhe wene

¹ It inunggulenu Moab inap o kota Sela leimo andoma logolik he domba eak ekhe waganogo o Yerusalem oba andoma omame werek agun a'nogo oba endawimo fanorogo iluk lakfesukwa.

² Lak fesukwasik it ap Moab mene re i Arnon aik oba andoma inobakheindok palogo nenanggoti logolik he, sue awi wuri'mo nen silogo wulak fisugunem leil waterek hak hilingiti lagaukwa.

³ A'nogo hilingiti logolik it inunggulenu Yehuda mene inoba yagaisikhi logolik he, ”Nit he ninggi'nogo hilingiti logogun he furugo yaganisani. O linggene misik oba mo aigen kun a'ma kwagarek hak nit hit hina'ma logogun nen fano anggani o. Nit yi re pugulogo wulibi wagosik welago mene hilingi'mo re, hiren weaget ninafi'lek hinakninobagani o.

⁴ Nit he hit hinawi hinanggweang oba yoma ninom logouwogen he fano yaganisani, ap nit weaget ninobagauwogeluk hilingiri'lagwi mene andoma inoba nen fe'ninarek logoni o. Inomameba sebelinarek welagaikharek mene inom weagerinafu welagaikharek mene inom a'nogo re wurep oba asi waga, nen, o afuni Israel mene werekwe sebelfisikhi logolik werek mene omanogo legasi lagain.

⁵ (Hobuk he ap misik ekhe Daud en tagomangge mene nen raja menlasimbik he, aren at unggulenu mene re endawi hundik oba inom higithogo hilingitarek meneba inom fanorogo halinafi logogin. Aren wene higithogo inoba figik kotik agarek mene menfigik, nen eberogo mene hilingisigiluk weak-weakhogo nek hilingitik, ikhi logogin.)

⁶ It inunggulenu Yehuda mene nen ikhi logolik he mel aga, ”Nit he it Moab mene nen winik-wonok ili'lagwi mene andoma re mondogat holho o. It andi winik-wonok ikhi logolik foget fakhili'lagwi mene andi re nit he ninelu aga o. Inane ili'lagwi mene andoma re waruk i ebe hinago lek mene hangge logoligen ili'lagwi o,” ikhi logogun,

⁷ Andi faget he, it inunggulenu Moab mene andoma re le yakhikhi logouwak. Iren nunggu mene enduk fano mene o kota Kir-Hareset oba logolik ninggi lagaukwa mene andoma ebethaluk he le yakhikhi logouwak. It inendawimo weagen inendawinggenma warikhi logolik a'nogo hilingiti logouwak.

⁸ Yabu o Hesybon horok-horokwe mene inom, nen anggur yabu o Sibma kwe omanogo inom mondogat legetfisaga, anggur yabu waganekwe enggen ebe mene paliluk it inunggulenu melalinafu mene noageluk wogisugunem lugu-lugwi palharek mene omanogo mondogat leget fisaga. Attak anggur yabu andoma re ukhalogo o Yaezer huli andomaba hilingik welaga, nen mo liabi wagarek fikhit he o leimo andoma huli, nen mo ubuk ikherek fikhit he i Laut Mati esanggo fena fikhit andoma huli hilingik welagaba nen arigin laga andi.

⁹ Yogondak an he o Yaezer faget le agagi hakhogo re o Sibna faget le aga lagi o. Kweang oba nen enggen awi yago omanogo ap selei mene nen mondogat sebelagama re, an he o Hezybon inom Eleale inom faget neil amusu pelafi logolik welagi o.

¹⁰ Yabu kweang mondok heiselek welaga mene andi faget yogondak ap misigen iluk ogo ekhe agaiyek werek lek. Anggur yabu andi faget ap ekhe nen fogeratik, wuniba apne wanhik, ekhe ugun lek. I anggur agai hilingisugun iluk ap misigen iluk ogo ekhe perelogo keraligin legat. It inagaiyegen inabunugeri'lagwi mene andoma palfouwageluk an nen arat yagaisigi.

¹¹ O Moab inom Kir-Heres inom hilingik mene andem faget neilenggen haluk he nendawimo warikhi logolik, ou hikhi lagi.

¹² Ap Moab mene re punuba andoma set kwil-kwalhogo lagaluk it kabogetunem andoma yi mene ti mene fuluk samban ugun iluk hilingiri'lagwiba nen ambisangma tip ili'logo lek.

¹³ O attak Tuhan nen it Moab mene faget yagaisoageluk isikhe mene re a'nogo andi.

¹⁴ Nen, yogondak he Tuhan nen yi'nogo ili'logo, ”Tahun henagan hilingfuluk andem oba re it Moab inaben inangge werek mene faget wonoget fakhili'lagwi mene andoma mondogat legasigin o. Nen, attak afuni hokhorogo welagaikha meneba nen hobuk inomame legasumo re inebe endebat asugun o.” ikhe.