YESAYA 15 - Allah Wene Fano Wene Hupla Inane

Allah nen o Moab wolelenggenhogo fagain iluk isikhe wene

¹ Tuhan nen Moab mene faget yagaisoageluk isikhe mene re yi. O kota Ar inom Kir inom he we hup misik oba nek wolelenggenhogo fagain, nen o Moab he afuni inareng tiring terenghogo hilingik aiba hilingisogo fagain.

² Afuni Dibon mene re le asuogeluk inangge tugwi kembu fogeratarek kwe tom oba omanogo lagakhi logogun. Afuni Moab mene re o kota Nebo inom Medeba inom faget inendawimo weakhogo le aga logogun. Iren he fong warogo iluk enegengge re inesi hogolhik, inomboro palhik ikhi logogun.

³ Afuni ebekhe kwe werek mene re fong warogo welago iluk enekhogo re su karung su laberogo logogun, afuni andoma re olulu afuni lambulharekwe omanogo nen inom, o tum ebene omanogo nen inom fong watik, le agik, ikhi logogun.

⁴ Afuni Hesybon mene inom Eleale mene inom he ngai-waiengge hilingitunem it inane re o Yahas andoma nen holhi logogun. It inane nen he ap sikhe anini meneba nen ogore inailo nek agunem, inoak leigeti logogun.

⁵ It afuni Moab mene re pugulogo o kota Zoar inom Eglat-Selisia inom oba andoma logoin andi nen he, an he it faget nendawirinafi lagi o. Fena re le arik o Luhit kwe lagakhi logogun, nen fena re inoba enggin-fenggin asigin mene andi faget le arik he o Horonaim wulibi logoin.

⁶ I Nimrim weri'lago esanggokwe inom, engga wilibik mene inom mondogat puk lelok umo re engga eluk mene ekhe logogin lek.

⁷ Afuni nen he i Haarabim endep mene palisaluk wulibi laluk he, it inangge omanogo selekhogo helaluk wulibugun iluk hilingiti logogun.

⁸ Yi kwe ti kwe o Moab inom huli hulimo andoma ap ngai-waiyenggetunem holhi logogun. Nen, le agunem he o Eglaim inom o Beer-Elim inomen holhi logogun.

⁹ O Dibon oba i andoma ap mep inom sebetunem he eil mep enek aga logogin. Allah nen he afuni andoma werek mene inoba mondok hunik mene hilingfei wesigin. Nen, ap kogolharek inap Aren lakfisa wesigin mene omanogo nen he ap Moab inap inanini mondok werek mene omanogo mondogat inoasugun.