YESAYA 14 - Allah Wene Fano Wene Hupla Inane

Hele warogo huginabi lagaukwaba omanogo nen sugulogo wesugun wene

¹ Tuhan nen he nekhengge At againafuri Israel mene endawirinabimbik At onggwarek mene asuageluk tegelinabigin. Aren he it inebe nekhengge inawi eroma inonggwaregen mene omanogoba logouwageluk fisa wesumo re ap pok mene yatma nen it inoba sebesi we'luk inom andoma logogun.

² Afuni Israel mene inawi eroma Tuhan nen wogisasikheba andoma nekhengge wesuageluk he it inunggulenu hokhorogo nen leberinabugun, nen o andoma nen he it inunggulenu andoma mene re it Israel mene inamingmingengge a'luk logouwageluk hilinginabugun. It Israel mene nen he it ap sebelinarek welagaukwa mene omanogo iren ogore sebelinarek logogunat. Nen it inane omameba yagaisikhi lagaukwa mene omanogo it Israel mene nen ogo inane omamerogo yagaisikhi logogunat.

Raja Babel mene re afuni wa'la'luk lagaikharek oba logogin isikhe wene

³ Tuhan nen he it Israel inap inoba ou pou higik, enggin-fenggin higik, yabu inane ninghogo hilingi'ni iluk yagaisugunem hilingiri'lagwi mene omanogoba nen fikhalogo fisagain.

⁴ Tuhan nen a'nogo hilingisumo re it Israel inaben raja Babel mene sebel fikhi logolik he, Raja anini mondok weak mene a'nogo arat pikhe o! Aren enggin-fenggin nit ninoba ekhe fikhi logogin lego iluk ikhi logogun.

⁵ It ap inomame logolik ina'mageba ferinarek welagaikharek mene omanogo inom,

⁶ wene palogo ap inunggulenu sebelogo fisili'lagwi mene omanogo inom, nen hundik-handik wiik weakhogo hilinginafu werek mene omanogo inom he Tuhan nen inomame mondogat leget fisikhe.

⁷ Andi ambisangma nen he o kweangma yoma mondogat fano liokhogo were'ma inendawinggen serogo logolik afuni inebe lombok inagaiyegen wuni watu logogun.

⁸ Ap raja afuni sebelogo fisikherek mene a'nogo arat pikhemo re, at laga mene andi nen hobuk ekhe musi lani iluk miming hinabigin lek enggere o Libanon tomkwe e ibin inom laik inom welagep mene andoma nen he hinagaiyege'ni o.

⁹ Kweangma ap wa'lagaikharek mene omanogo nen ap raja Babel mene a'nogo hondosuogeluk inanggilukhogo weri'lagwi o. A'nogo wagunem o attak o kweangma yoma inomame hokho mene logolik ferinarek welagaukwa mene omanogo inaheimengge inabologetik, nen it ap raja-raja attak ferinarek welagaukwa mene inaheimengge omanogo nen ogore it inebe hurek werek oba omanogo nen menlagik, ili'lagwi.

¹⁰ A'nogo menlaga logolik iren at oba ikhi logolik he, ”Ahwi! Hat hebe yogondak he hoba lebelekhogo nit ninom higit hilinglagen omari!

¹¹ Attak hat hebe re pinggong kecapi ba fogethafi lagaikhaba nen he, yogondak hat he hamu nek kweangma afuni wa'lagaikharek oba pegendik welagen. Nen hat hebe nogoguba re soborenggen oba tandamhogo nogogu welagik, nen imbalo re haselimut hakhogo salogo welagik, ikhi logoin o,” iluk yagasugun.

¹² Raja Babel mene yi re, attak hat hebe re hesagal wab o weigiluk ugu kwelek tilelherek a'nogo hanggge welagagin, meneat he yogondak he pogoroba nen halokhogo kweangma mondogat pi wagen! Attak haren ap inunggulenu lombok omanogo sebelogo fisikhi lagagin oba nen, yogondak he hat hebe kweangma hambokhogo pelakhabi wagaikha andi.

¹³ Hat hebe pogot hophogo lagai lagagendik he, hat hebe hurek welagen mene a'nogo re hesagalenggen amu mene amboloba legeisogo fesigin. Haren anggikhi logolik abel utara fikhit it dewa kabogetarek oba andoma an raja mendek logogin anggasigin.

¹⁴ Haren anggikhi logolik he, ”An he hena amboloba legoma po'lima lagaluk he, At Mondok Lego werek andi higit an ogo a'nogo hilinglasigin,” iluk anggikhi lagagin.

¹⁵ A'nogo anggikhi lagagin oba nen he eberogo mene re kweangma ap wa'la'luk lagaikharek oba fem a'ma ma'lima pilagendik welagen andi.

¹⁶ It andoma werek mene nen inelokhe legeisogo ineilenggen kwelakhiikhi logolik mel ikhi logogun, ”Ap o kweangma mondogat abologet higik, nen o raja-raja nen ferinarek welagaikharekwe omanogo aleik watik agarek mene a'nogo re, ebe re yi nogo a?

¹⁷ O kota-kota omanogo wolelenggen hogo figik, nen o kweang agaumhogo re o leimo hilingfigik, ap hele warek werek mene hinaiba lani iluk igi'lek hilingiti laga agun a'nogo re ari nogo a?” Iluk heinok wanhi logogun.

¹⁸ It raja-raja attak inunggulenu lombok ferinarek welagaukwasik wa'lagaukwa mene omanogo inebe mondogat he inobalik lombok inawi fanorogo wurogo wengik werek,

¹⁹ oba nen he, hat hebe salhabugun oba re obalik ekhe werek lek, we hat hebe warek he e asimit warogo lakfagarek hak fili asuageluk hukheogoin werego. A'nogo hukheamo hat hebe warek andi re it ap weim yafi logolik inoata mene inebe warek omanogo nen sebelharek were'ma, andoma nen warek omanogo inom mondogat waganogo re helep elema hinobagai lamo, hinebe fili omanogo re, sibil-sebelhogo hinobagagun o.

²⁰ Haren he honggwarek hawi ero a'nogo lek hilingisogo figik hunggulenu mene honggwaregen inoatik, hilingiti lagagin andi faget hat hebe warek he raja amu mene salinafarek hak salhabagun lego. Ap misik iluk ogo hat heisok erokwe ina'mage weak mene andoma inagap teligin mene ekhe werek legaro.

²¹ Yi kwe ti kwe kota omanogo fanot fouwageluk hat hagainafuri mene ekhe menlasimbik ferinarek logogun legat. Hele warinabimbik inaosugun mene a'nogo yogondak horok aga. Hat hagainafuri andoma re inombawi weak hilingita mene inenggi ambisangma re it inebe wa'lasugun o, ikhe.

Allah nen o Babel wolelenggenhogo fisagain isikhe wene

²² Tuhan Omame Hokho mene a'nogo nen mel isikhe, ”An nen o Babel pin kwikhi logolik felelenghogo leget fisagain o, ap misik iluk ogo ekhe An nen agap teligin lek. Nen yenggerugwi magendek mene ogore ekhe ineluk logouwageluk herakfisagain legat, iluk An hineisena Tuhan nen igi.

²³ O Babel andi An nen i lopkobenggeri'lagoba hilingisogo foumo re sue sumu-sumu werek oba hilinglasigin. Nen o Babel he An nen mondogat horogo lakfisagain. An hineisena Tuhan Nomame Mondok Hokho mene a'nogo nen igi o,” iluk ikhe ino.

Allah nen o Asyur legetfagain iluk isikhe wene

²⁴ Tuhan Omame Mondok Hokho mene a'nogo nen ane hombuk yi'nogo palhe, ”An nen wene mondogat kagalogo figi mene andoma re eberogo nen he higithogo nek hilingisigin.

²⁵ It afuni Asyur mene Israel An nanggweang oba werek mene andoma mondogat he An nen leget fisageluk welagi o. Nen An nandom ebene werek mene andoma re neisogen alperelogo fisagain. Nen it An nunggulenu mene andi inoba it Asyur mene nen enggin mene inoba fisigik, inane omameba yagaisigik, hilingitunem An nen inagap telogo fisagain.

²⁶ An nen o kweangma yoma mondogat faget hilingisigin mene wene figi mene re yi: An nen yi afuni ti afuni inunggulenu lombok unggum inoba feigiluk nenggi legeisogo welagi o,” ikhe ino.

²⁷ A'nogo hilingisigin iluk andi re Tuhan Omame Mondok Hokho mene a'nogo nen wene mondogat tekhogo fikhe. At enggi re unggum inoba fagain iluk lego logolik were'ma re, ap ekhe nen Haren a'nogo hilingisigin lek iluk kwe palumo re elo'lek.

Allah nen afuni Filistin mene legetfisagain isikhe wene

²⁸ Tahun raja Ahas ebe wa'lagaikhe mene andiba Tuhan nen hilingisigin mene fakhogo yagaisasikhe mene re yi.

²⁹ Hit hinunggulenu Filistin mene yi sani, e payuk hit hinoatu mene a'nogo re, mondogat sombologo laga o. Oba nen he kisu misik wa'lagunem he kisu amu mene ekhe aik anini mondok weak mene obali'mo wesu hak aro, Nen kisu enggen oba nen sokhogore menawe ogolabi wilibigengge wulibi wesigin enggere a'nogo hilingite iluk hiren hinagaiyek asu fugo.

³⁰ Hit he sumburu ouwak mondok elo'lek mene hinoba asi wesigin, nen ap hit mene we alin lan logogun mene re mondogat inoasugun. Oba nen hebekhogo re An Tuhan nagainafuri mene inangge yi mene ti mene mondok inelagaik mene andoma re inamburu elok ninggi logogun, nen it afuni yi'nogo ti'nogo hilingisu mondogat elo'lek mene andoma re inailo legengge inendawinggen hambukhogo logogun.

³¹ Yago, hit Filistin hinap welagep kwe hinawi kota-kota andoma re hinane hum ngaiyengge hilingiti logolik lebetnisani iluk le yakhikhi logoni o! Hit hinebe mondogat he, hinailo nen hinoak leigeti logoni! Kweang age ohena abel utara fikhiren mone'luk lagaikhe andi re hit hinaselei mene esa fologo wagunem enegengge hilingite, it andoma re igetfuluk hilingitarek lek inap.

³² Ap Filistin inaben yonggongge lakfisa wesugun mene andoma inoba re niren onggo ninggi'nogo yagaisogoin nogo? Niren yagaisikhi logolik Tuhan en o Sion a'nogo re mondogat wute o, nen At againafuri enggin-fenggin hugu welagaikharek mene re o andi elonggoma inagap telek logogun o, iluk yagaisogoin o.