YESAYA 13 - Allah Wene Fano Wene Hupla Inane

Allah nen afuni Babel mene unggum wogisagain isikhe wene

¹ Allah nen ap Babel mene inoba hilingfisagain mene yagaisoageluk Yesaya hun Amos amlogo a'nogoba wene fesikhe mene re yi:

² Punu unggul asili waganekwe andoma lagaluk he poksu liak fuluk hane ap weim aninirogo yafarek mene omanogo inoba kweti logolik, kota winik wonok agarek aiba andi ebekhe ambe palek kwe andoma pin kuakhogo iluk henggi pilinget feino o.

³ Tuhan nen ap At obaget inomamerogo hilingisuageluk ap Aren wenagaisogo inayonggo fesikhe. It inebe andoma re inomame werek mene logolik inendawinggen pukse'ma re Aren ogo it faget agaiyek werek. Tuhan nen a'mage inoba fikherek mene andoma unggum inoba fuluk leget fisoageluk inayonggo fesikhe.

⁴ Tom oba andoma nen afuni andogoti logolik inane sagali'lagwi andoma holini. Ap o kerajaan yikwe tikwe andoma mene mondogat andogoti logolik inane hokhorogo mari'lagwingge andi. Tuhan Omame Mondok Hokho mene a'nogo nen ap weim yabugun mene omanogo eilenggen penhigik andogarinabi'lago.

⁵ It inebe re o kweang wurep-wurep yatma omanogo nen andogosi weri'lagwi. Tuhan obaharo nen kweang mondogat meisalogo leget fagain iluk it andi inayonggo fikhesik hilingiri'lago.

⁶ Tuhan Omame Mondok Hokho mene Awi leget fisagain sambul a'nogo arat horogasi wagama andi nen he le aga logoni.

⁷ Ap inebe lombok he ninenggi omame lek agama iluk anggigik, nen it inailo lek hilingiti logogun mene a'nogo longgo igik, hilinglasugun.

⁸ It inebe mondogat he inailo hokho mene inoba asiginmo re ou hokho mene heinet wasugun mene re hemi omalik taginafi logolik ouen heinet watarek hak hilingisugun. It mondogat inendawinggen fit lasimbik inelokhe mep sagalogo hilingik logogun andi re inenggali nen hilingisugun.

⁹ O Tuhan awi wei igin sambul andi re Tuhan anini a'nogo inoba kweisalogo foumo re, kweangma yi mene ti mene mondogat leget fisambik, afuni inebe lombok weak hilingitu onggo ineiloak leget fisagainat.

¹⁰ Hesagalenggen mondogat he selegerati'lek logogin, mo wulibi wagarek oba aremnogo mondogat mum asigin, tugi yati'lek logogin.

¹¹ Tuhan nen ikhi logolik, ”An nen kweangma weak hilingiri'lagwi mene inom, nen it inaniniba hilingiri'lagwi mene inom onggo re unggum wogisagain o. Ap winik wonok ili'lagwi mene inebe lombok sebelogo fisagain, nen ap leget fakhili'lagwi mene inom, wonoget fakhili'lagwi mene inom he an nen wene inoba fagainat.

¹² No emas obabut pal haluk fano mene folharek andi re we endebat hak agarek oba nen, afuni inagap telasugun mene andi re we indip endepengge nek telasugun.

¹³ An Tuhan nomame hokho mene a'nogo nen nanini welagi mene inuk hagain sambul andi re, pogot leigetik, kweang ebe werek oba abolok igik, uageluk An Tuhan nen hilingisigin,” ikhe.

¹⁴ No rusa aben mugusogo longgo ilagarek hak athe domba ap halhu agun le'ma nalek-falek ikherek hak, ap pok o Babel werek mene re hobuk inambotkwe mugisogo inawi lombok hela logoin.

¹⁵ Ap sa nen it inebe ekhe fakfisaluk halok he mondogat talogo pinggi inoati logogun.

¹⁶ It inonggwarek ineilenggen kwelaginarek werek kwelek inomalik fou omanogo alperel isigik, inaiba omanogo telogo heligik, inagagwi omanogo inomameba pailak hilinginafik ikhi logogun.

¹⁷ Tuhan nen yi'nogo ikhe, ”An nen inunggulenu Madai mene o Babel andoma hugul kwikhi logolik heloageluk yagaisagain o, iren ninoasi kwi wesinogo iluk onggo emas inom perak inom wogisugunem inabit mene andoma inayonggo fembik lakfisa wesigin.

¹⁸ It inasikhe inandok oba re ap souge mene mondogat inoasugun, iren he omalik fou mene inendawirinafi'lek, yenggerugwi mene inelagaik isigi'lek, weagerinafi logogun.

¹⁹ O kerajaan Babel oba andoma nen o sili mondok fano mene it afuni andoma werek mene nen inagaiyek hagarek aiba a'nogo re An Tuhan nen o Sodom inom Gomora inom weaget fesigi hak weaget fagainat.

²⁰ Ap misik iluk ogo andoma ekhe logogin lek. Ap Arab inap leil warik nikharek inap ogore inawi sabu andoma salogo logogun legat, nen it ap inanggo kambing, domba halharek mene nen engga noageluk andoma woginarek waga logogun legat.

²¹ O obalik andomaba re yi mene ti mene eil polok mene nek logogun. Sue sumu-sumu it inawibene andoma inawi wuti logogun, nen, sue unta re andoma logogun. Nen, o meisalek omanogo bene re wam kambing maro mene nen huk sombo lagagik pigik hilingiti logogun.

²² O Babel o silimo nen inom nen ap raja awi silimo nen inom he olomene inom olomene amu mene enu serigala inom inane kouwatunem inane anggungga nek holhi logogun. O weagerogo fagain oba andi re arat horogasi waga. Nen linggene andi re higilogo feilogoin mondok lek mene asi wesigin.” Iluk ikhe ino, isikhe.