YESAYA 11 - Allah Wene Fano Wene Hupla Inane

Raja Daud en tagomangge mene nen fano liokhogo ferinarek logogin isikhe wene

¹ Raja Daud ambisangmangge mene re e mukfugu mene hak. Oba nen he, e ebe mukfugunem andimiba nen asimit suphogo lagaikherek andi higit hobuk Daud ambisangmangge mene nen raja ekhe weinam asigin o.

² A'nogo weinam asumo re Tuhan Omameba hilingirik lagunem, at endawinggen kagalek mene logolik melalinafik, higithogo hilingitik, wene katokhogo tegetik, Allah endawimo anggikherek mene hilingitik, ikhi logolik At oba tiphogo nek hilingiti logogin.

³ Aren he we eilenggen nen haluk tegetik, athe afuni inane ugunem holhaluk pilingitik ikhi logogin lek. Aren he eisena Tuhan ane hologo hilingitarek mene andi nek amolorogo hilingiti logogin.

⁴ Ap inenggi lek mene re inawene heirogo palinafik, afuni inamu nen hilingisu elo'lek mene inebikhit a'luk leberisigik, ikhi logogin. Ap weak hilingitu mene re At ane miming oba unggum wogisigik, Nen ap inobaharoba nek hilingitarek mene re inebe inoatik, ikhi logogin.

⁵ Yi'nogo ti'nogo hilingiti logolik, Aren higithogo hilingitik, tiphogo hilingitik, ikhi logogin.

⁶ Mene olo mene enu serigala andi re domba inom seberogo logogun, nen no macan tutul andi re kambing eak era'lu wengik logogin. Sapi eak he mene singa eak inom engga misikwe tekhigik ninggi logogun, a'nogo nunggunem he yenggerugwi magendek mene nen woginarek nikhi logogun.

⁷ Sapi re no beruang inom seberogo engga ninggi logogun, eagwi re misi'mo wengik logogun. Mene singa nen he engga irigik mene wam sapi nen ninggerek hakhogo ninggi logogin.

⁸ Omalik fou mene re kisu aik palinaferek mene inom yele pugagik, awi wuri'mo inenggi kwelafik ikhi logogun oba nen he aigen palinafi logogin lek.

⁹ Allah andom Sion fano Horek meneba andoma re inaninirogo hilingitarek mene inom, weak hilingitarek mene inom, logogin lek. O kweang andiba mondogat he, i nen laut agum hopot fikherek andi hak, Allah inelu agaikharek mene andi nen hoporek logogin.

Inunggulenu mene alinlan logogun mene re hobuk inambotkwe sugulogo wesugun isikhe wene.

¹⁰ Linggene ekhe wesigin oba re raja ket mene Daud ambisangmangge mene ekhe re yi afuni ti afuni inobaget menlasumo re inebe mondogen At faget herarik waga logogun. Iren At oba we'luk he, At ebe werek oba mondok fanoma omanogo andogoluk fogerati logogun.

¹¹ Linggene andi sambul he Tuhan en at omameba againafuri alinlan logogun mene o Asyur inom Mesir inom, o Patros kweang oba inom, Sudan inom, Elam inom, Babel inom, Hamat inom, i alonggen kwe yathogo werek mene omanogo mondogat woginarek inambotkwe sugulogo wesugun.

¹² Tuhan nen he bendera misik ekhe yi afuni ti afuni faget liak fagain. A'nogo Aren inunggulenu Israel mene inom, Yehuda mene inom, o kweang wurep-wurep hesangge-pesangge werek mene omanogo woginarek weri'logo iluk enegengge re poksu a'nogo kelogo fagain o.

¹³ Kerajaan Israel en mene re Yehuda meneba a'marikhogo kwelakhikhi logogin lek. Nen, Yehuda nen mene re Israel mene inom seleirogo logogun legat.

¹⁴ It inebe misik seberogo re ap Filistin inap mo erembul fikhit werek mene inoba weim kwi laluk he, inunggulenu mo ero fikhit werek mene telogo woginarek wesugun. Iren he, inunggulenu Edom mene inom Moab mene inom seberogo fisogoin, nen inunggulenu Amon mene re it ina'ma sebe ugun.

¹⁵ Tuhan nen he i kalok hokho mene Suez a'nogo iringisogo fagain. Aren sogoi aganhan mene funha wesumo re i Efrat a'nogo akhogo re 7 nen hilinglasumo i ebe we horok liarogo hilinglasumo re afuni nen ineisok sandal kwelabegengge i a'nogo elok palhi logogun.

¹⁶ At againafuri alinlan logogun mene faget he, Israel mene o Mesir en wulibi waga logolik kwe hokho meneba wagaukwa a'nogo hak o Asyur en wulibi wesuageluk he kwe hokho mene yago logoginat.