YESAYA 10 - Allah Wene Fano Wene Hupla Inane

¹ Hit ap wene melalek higithogo hilingiti'lek logolik An nagainafuri mene hinomameba sebelinarek welagep mene andoma re hinebe alomat lakhogoin o.

² Hiren a'nogo hilingiti lagep andiba re afuni inenggi lek mene omanogo it inangge mene heligik, it inawene higithogo palinafi'lek kwanirogo hilingitik, hemi sogwe mene inom, yenggerugwi suarek mene inom inangge teligik ugun iluk inanggwe palinafi lagep.

³ A'nogo hilingiti lagep oba nen he, linggene Allah nen hit unggum hinoba fagain sambul andi re, hiren ninggi'nogo hilingisugun anggegap? Nen, o yatma andoma nen enggin mene hinoba lakfei wesumo re hit hinonggwarek hinomameba elok tela hak anggegep? Hiren saba lebetninabin iluk kino yagasugun anggegep? Hit hinangge hinenggi werek welagep mene andoma re koma hinakfakhogoin nogo?

⁴ Hit hinebeba hilinglasigin mene re weim oba nen wa'lasugun hea, athe hele warogo wokhinarek logoin hea? Oba nen he, Tuhan a'mage oan lagagunem he, eberogo nen unggum hinoba fagain aro.

Raja Asyur mene re Tuhan enggiba asigin isikhe wene

⁵ Tuhan nen ikhi logolik, ”Asyur andi re An nen it afuni na'mage inoba fikhi lagi mene omanogo inoasuageluk fe'nengge inom e payuk inom hak hilingik werek. Arigini'mo re Asyur he alomat lakhoak!

⁶ It afuni An nagainafuri mene An inambot wo'ne'luk lagaikharek mene inom, na'mage kwelafarek mene inom andoma inoasuageluk An nen Asyur lakfei wesigin o. Nen, afuni An nunggulenu mene andoma inangge hugul heligik, hinakhigik, nen kweang age ebekhe kwe were'ma sebelisagarek hak, sebelisigik, hilingisuageluk An nen Asyur lakfei wesigin o,” ikhe.

⁷ Oba nen raja Asyur mene andi nen he it inunggulenu hokhorogo omanogo a'mageba mondogat leget fisagain iluk wenggelogo fikhesik werek.

⁸ At onggwaregen leget fakhikhi logolik yi'nogo ikhe, ”An mene nagoromi panglima andoma mondogat he inebe raja nek werek!

⁹ Andi nen he, o kota Kalno inom, Karkemis inom, Hamat inom, Arpad inom, telambik he, o Samaria ba inom Damsyik oba inom kota werek mene andoma an nen mondogat tela hak aro.

¹⁰ O Yerusalem inom Samaria inom oba tugwi kembu werek mene andoma maben hak oba nen, it kerajaan amu meneba tugwi kembu omame hokho mene wurogo fisogo mene andoma mene ogore an nen mabenet fisagain aro.

¹¹ Nen o Samaria ebe inom nen o andiba tugwi kembu wurik werek mene inom oba nen ogore an nen mondogat lilibukhogo figi. Andi hakhogo re, an nen o Yerusalem ebe inom o andiba tugwi kembu fogerari'lagwi kwe andoma inom mondogat lilibukhogo fagain enego,” iluk ili'logo.

¹² Oba nen Tuhan nen ikhi logolik he, ”An nen punu Sion oba inom nen o Yerusalem oba inom hilingiti lagi mene andoma mondogat neilenggen hambik he, An nen ap raja Asyur mene andi winik-wonok ikhi logolik onggwarek legeisogo fakhili'lago mene andi unggum wogosigin o,” ikhe.

¹³ Raja Asyur mene andi re ane nen weregap hikhi logolik yi'nogo ili'logo, ”Mondogat andoma re, an nomame welagi mene a'nogoba hilingisigin. An he nendawinggen mondok wenggelek nagun logolik, nelu mondok mene welagi. Andi nen he it inunggulenu amu mene faget huli-huli warek mene andoma leget figik, nen, iren andogorogo fakhagarek mene andoma teligik igin o. Nen it inogogwi ferinarek welagaikharek mene andoma re no banteng eisogen sebelisugunem hakhogo al perelogo fisagain.

¹⁴ Afuni inunggulenu lombok o kweangma werek mene re sue awi wurik hak hilingi'mo aben sue enggen inenggi nen awi inom abungusogo helagarek hak, it inangge andoma re, we siserogo nek helagain o. Inagerabulen tarogo wilifik, inambele angetik, inane kwe igik, ekhe ugun mondok lego,” ikhe.

¹⁵ Oba nen he Tuhan nen ikhi logolik mel ikhe, ”Afuni nen e mugusogo lakfagarek mene andi faget posie onggwaregen wonoget fakhamo re higit nogo a? Athe no gergaji ba e tegetarek mene andi esin hangge nen afuni inebe re sebelek hak nogo? E payugen afuni legerisamo re elo'lek athe afuni nen e payuk leget hamo nek he higiro.

¹⁶ Ap Asyur mene nen he inonggwaregen wonoget fakhagama re Tuhan Omame Mondok Hokho mene a'nogo nen ap sikhe fisogo inap perwira mondok fano mene omanogo nek ou mondok enggin meneba unggum wogisagain. It inebeba re ou aganhan engge mene inoba asumo re endu nen inagap weratunem hak hilingiti logogin.

¹⁷ Allah tegelek mondok welagarek mene a'nogo nen it Israel mene selegerinafunem he, endu amulok linggene misik sambul yi mene ti mene lei laga logolik libunghogo ninggik, nen engga alok-alogengge mene ogo lilibukhogo ninggik, ikherek hak hilingisigin.

¹⁸ O Asyur oba andoma engga ogoi mondogat inom, yabukwe kweang muli fanorekwe andoma inom mondogat he afuni inoba ou weakhogo wanhila'luk wa'lagaikharek hakhogo mondok felelenghogo legasigin.

¹⁹ A'nogo hilinglasumo re e wilibik mene re we endebengge were'ma yenggerugwi magendek mene nen ogo elok wenasu hak hilingik logogin.

Afuni we endebengge nek inagap teligin iluk isikhe wene

²⁰ Inenggi hobuk wesigin meneba re inunggulenu Israel mene inebe alinlan logogun mene re it inebe afuni sebelogo fisikhi lagaukwa mene omanogo inoba inendawinggen tibet fuluk logogun lego, athe Israel mene ineisena Tuhan Allah Ebe Horek mondok mene andiba inendawinggen oba himbiret fuluk logogun o.

²¹ Afuni Israel mene inebe endebengge nek inendawinggen ineisena Allah Lego Mondok welagarek mene a'nogoba hebelugun.

²² Yogondak afuni Israel mene inebe i laut esanggokwe ilingage hokhorogo werek andoma hak hilingik oba nen he we endebengge nek sugulogo wesugun. Tuhan nen it inoba unggum wogisagain mene andi re arat horok asi waga. Nen, it unggum wogisagain andi re it inobaburenat tiphogo hilingisigin.

²³ Tuhan yi wene ti wene hilingisu hagenek mene a'nogo nen o kweang andiba mondogat wolelenggen isagain iluk ikhe mene andi re eberogo nen ikhe, At Tuhan amu nen hilingisigin iluk tekhogo ikhemo re sugwi asigin lek.

Tuhan nen Asyur unggum wogosigin wene

²⁴ Tuhan Omame Mondok Hokho mene o Sion welagarek mene a'nogo nen he At againafuri inoba ikhi logolik mel ikhe, ”Afuni Mesir mene nen hit hinoba hilingfikhi lagaukwa hakhogo it Asyur mene nen inenggi omameba sebelhinarek logolik enggin-fenggin hinoba fili'lagwiba nen he, hiren it inoba hinailorinabu fugo.

²⁵ Nenggi ekhe welagi'legat An nen hit hinoba na'mage fikhi lagi mene palfembik he, it inebe An nen leget fisagain o.

²⁶ An Tuhan Nomame Hokho mene a'nogo nen afuni Midian mene helep unggul o Horeb oba nen fe'nengge watigi hakhogo irogo fe'nengge inoasigin aro. Nen, Asyur mene re An nen Mesir mene inoba unggum wogisasigi hakhogo wogisagainat.

²⁷ Andi sambul he it Asyur mene nen inenggi omameba sebelhinarek were'ma andoma nen An nen fikhalogo hinobagaumo re hit hobuk ekhe it inawe a'ma logogun lego,” ikhe.

Selei mene nen weim sineli kwi wesugun iluk isukwa wene

²⁸ Tentara Asyur mene nen he o Ayat mondogat sebeli kwaga. It inebe re o Migron soganogo lagaikha! It kwemangge nunggu mene re o Mikhmas fuluk lagaikha!

²⁹ It inebe re tom soganisaluk lagaikhasik he o Geba nogoli'lagwi! Nogogunem he ap o kota Rama mene re inoak elekwe leigeri'lagwi, nen afuni o Gibea, raja Saul awi kota andi mene re inailo nen heise wulifa.

³⁰ Yago! Hit Galim mene re hinane a'mit subini o! Hit afuni Laisya mene re hinesanggo fanorogo holini! Afuni Anatot mene re it inane onggo yagaisani!

³¹ Afuni o Madmena mene inom Gebim mene inom he o andomaba nen pugulogo wulibini.

³² Yago! O yi sambul he hit hinaselei mene o kota Nob oba logolik he iren inenggi yinggilogo re punu Sion oba kota Yerusalem fikhit andoma mumet hili'lagwi.

³³ Tuhan Omame Hokho mene a'nogo nen e enggi tekhogo pelafarek hak it inebe a'nogo tamukhogo lakfisagain. It anggele'ma andoma nen lego logogin mene re tekhogo lobaget fisigik, nen wolonghogo liabek logogin mene re sebelogo pelakfisigik, igin.

³⁴ It inebe re e enggama nen yagaba mugisogo lakfagarek hak Tuhan nen it a'nogo hilinginabigin. O Libanon oba e mondok fano mene omame werek andi hak, it inebe a'nogo hilingik logogun oba nen he talosugun aro! Iluk ikhe,” isikhe.