YEREMIA 9 - Allah Wene Fano Wene Hupla Inane

¹ An nunggul yire i mogo ambe hoporogo yenggele'ma hak hilingik logoumo nen, neilenggen he i su'lenggeba sulhogo lagu mondok welagarek hak hilingik logoumo nen he mondok fano agwi! Ariginik logumo nen he ap an nunggulenu mene selei mene nen inoata mene andoma inobaget neil amusu pelafi logolik li le aga logoile mene ago.

² O walkwe lei enek pirimsekwe andoma ap ebekhalem laga logolik nogoguba ekhe were'ma herasilema nen he, an nunggulenu mene agaiserogo lagain iluk it an nunggulenu mene herakfisaluk heise andoma lele. It he ap inabulagam weak mene, tiphogo mel hilingiti'lek esa misik folek logolik,

³ ineranhogo wene ugu mene faget fikfouksek logolik werek inap. O kweang yi mondogat oba re eberogo hilingitarek mene a'nogo re sagarek werek lek, Henarogo hilingitarek mene nek he yikwe tikwe mondogat sagarek. Tuhan nen ikhi logolik, ”An nagainafuri nen he inanini mondok weak mene andoma palfigi'lek hilingiri'lagwi o, iren An nobaget nineisena Allah iluk fageri'lagwi mondok lego,” iluk ikhe.

⁴ Yakub en hilingitikhe hak he iren ogo inebe lombogen inagaila'lak lalinafunem, inagaila'lak meneba nen ogore inafe hebelogo nek hilingiti logou hak, nen inagaila'lak inamep meneba nen ogore eberogo iluk angga lek hak. Wene ineranhogo wene sagarik lagik, afuni inabok pilip-palaphogo palhik, uogeluk he inebe lombok ekhema-ekhema lili'lagwi.

^5-6 It inebe mondogat he lal-lal agunem he, higithogo hilingitu mene ekhe welagaikharek lek. It inambe re ineranhogo wene lalinafu mene faget obalik warek werek, iren wene weak mene re herakfisa lek hak. Iren he hundik-handik inaniniba nek hilingitik, lalinafarek mene nek hilingitik, hilingitu were'ma re, Tuhan a'nogo mondogat obokhogo herakfisaga.

⁷ Andiba re, Tuhan Omame Mondok Hokho mene a'nogo nen ikhi logolik, ”An nagainafuri andi re eil fano mene hilinglasuageluk he logam oba obabut palharek andi hak An nen nagainafuri inobabut palinabigin o. An nagainafuri mondogat weak hilingita andiba An nen ninggi'nogo hilingisu hak he?

⁸ It inane ili'lagwi mene re tok wei lambelegengge nen ap inoaterek hak ugunem he, inali'lip mondok ambik. It inambelema nen wiliferek mene re ineranhogo wene nek hoporek. It inane ugunem he mit-mirengge hilingi'mo ap endawinggen literek, oba nen inonggwaregen hele yebet fakhagarek oba nen hilingik.

⁹ Yago, ap inunggulenu ariginik mene ari inoba it hilingiri'lagwi onggo An nen it inoba ekhe hilingfisigi'lek logogin nogo a? It hilingiri'lagwi onggo An nen hilinginabigin aro. An Tuhan nen nane mondogat igi,” ikhe.

¹⁰ A'nogo ikhemo an Yeremia nen ikhi logolik, ”An he engga o leikwe inom, tomkwe andoma inom mondogat pukliok ikhe, nen afuni ogo andoma kwe lagaikharek legat, andem faget an he le agik, fong watik, hilingiti lagi o. Wam tatharek mene inom, nen ekhe amu mene inom he mondogat longgo agama, inareng tiring tereng ikhe andi faget he le aga lagi o.

¹¹ An nen a'nogo ugunem he, Tuhan ane ikhi logolik, ”O Yerusalem meisa'lambukhogo hilingisogo figik, mene olomene enggama mene ebe hinago werek oba hangge hilingisogo figik, igin o. Nen, afuni Yehuda mene inawi kota mondogat he afuni inebe le'ma somung logouwageluk hilingisogo fagain aro,” iluk ikhe.

¹² A'nogo ikhemo, an nen he, ”Neisena, o yoma leimo higit puk halongorogo, amusu mondok le'ma afuni inebe ninggi logou mene ogo mondok lek hilingisogo fegen andi re nenahalok? Wene a'nogo hilinglaga mene andi futfuluk hilingisu mene ap hebelek mene ekhe werega? Wene a'nogo hilinglaga mene andi faget, afuni ekhe yagaisoagaluk Haren ap sa tukhumhogo yangguleten,” iluk heinok wokhigi.

¹³ A'nogo yagatimo Tuhan nen onggo yi'nogo ikhe: ”A'nogo hilinglaga andi re, it nagainafuri An nen wene, Yi'nogo hilingiti logoino, ti'nogo hilingiti logoino, iluk komorinafigi mene andi herakfisaluk, An nane hologo hilingiri'lagwi lek andi nen o.

¹⁴ Oba nen it he inendawinggen mondok pugat logolik, it inombalagen, ’Yi'nogo hilingiti logoino,’ iluk yagaisasukwa hagat, afuni nen tugwi kembu wurogo fuluk fogeratarek mene omanogo iren ogo fogorataregat andi.

¹⁵ It a'nogo hilingitarek andi nen he, An hit afuni Israel mene hineisena Tuhan yi mene ti mene hilingisuhagenek a'nogo nen hilingisigin mene yagahesigin yi hesanggo fanorogo holino o. An nen he: An nagainafuri inamburu ninggi logogun mene re ale weak mene wogisigik, inagai ninggi logogun mene re, inebe wa'lagaikharek mene wogisigik, igin o.

¹⁶ A'nogo wogisambik, inebe it afuni inunggulenu hunogoat mene, iren inom, inombalagen inom, inebe inonggot mene inenggiba fisagain o. An nen ap tentara mene karok waluk it muginarek loagaluk lakfisambik, elugun oba An nen it inebe mondok legetfisagain o,” iluk yaganete.

Afuni o Yerusalem welagaukwa mene nen, Allah nen telninabuagaluk, inane hokhorogo ayonggo fesukwa wene

¹⁷ Nineisena Tuhan yi wene ti wene hilingisuhagenek mene a'nogo nen yaganetesik wene ekhe againafuri faget mel ikhe: ”Wene o yoma hinoba hilinglari'lago mene andi fanorogo futfuluk he, weak-weagat hemi le wuni inelu mene inayonggo feni o. Le wuni ugu inelu mene inayonggo foumo wagunem he, le wuni ware'ma fong wati logolik le agaikharek mene andi ikhi logouwagaluk yagaisano o,” iluk ikhe.

¹⁸ A'nogo ikhemo yagaisigimo re, it afuni Yehuda mene nen he, ”Nit nineil amusu mondok hokhorogo ninelokhonggen ebene lothigik pi wesuagen he, hemi andi le wuni afuni wa'lagunem fong wati logolik le agaikharek mene andi, nit ninouak le asi wesuagaro,” iluk aga.

¹⁹ Afuni tom Sion oba nen inane le aga logolik mel ili'lagwi: ”Eige, nit ninawi wurik mondogat meisa'lambukhogo potfisagama, o nit were'ma yoma herakfisogoin andi nen he, nit ninenggali hokhorogoat asimbik, ninebe mondok lek asugun higi o,” iluk le agunem inane anggungga holi'lagwi o.

²⁰ A'nogo aga andi nen he, hit hemi mondogat hinoba mel yagahisak, ”Nineisena Tuhan ane ili'logo mene andi hinesanggo fanorogo holini o. Holimbik he, hineagwi helime yenggerugwi lenggu fili'lagwi mene andi, fanorogo yagaisigik, hinagaila'lak ekhe fong watu werek mene andi yagaisigik, ikhi logoino.

²¹ Ou ero mondok weak inebe inoaterek mene, hit hinawi lokwe jendela ambe palek lombok arat kwi wagasik, nit ninogogwi inenupogot inawilokwe mondok kwilik laga aro. A'nogo kwi wagasik he, yenggerugwi ebekhe kwe nugunem inoatik, alage o silikwe were'ma noatik, hilingirik weri'logo andi.

²² A'nogo inoatunem, inebe warek he wusa yogolhi logolik engga finhigik herakfisagarek hak, athe gandum enggen palhigik hele keralhi'lek hesangge herakfisagarek andi hak, inebe yugunat wathigik lakfisamo re o ekhema-ekhema ap warek enek kabok igin o. A'nogo hilinglasigin wene andi kamo igi'lek yagaisano o, iluk Tuhan nen an yaganetemo yagahisigi o,” iluk yagaisigi.

²³ A'nogo yagaisigimo Tuhan nen mel ikhe: ”Ap ekhe endawinggen kagalek andi nen fogerakhigik, it ekhe inomame hokho andi nen fogerakhigik, it ekhe inangge yi mene ti mene mondok hokhorogo werek andi nen fogerakhigik, ugun mondok lego.

²⁴ Sa nen amu mene faget ekhe endawimo nen fogerakhagain anggikhe halok he aren An nebe elu asimbik fut nobagakhi logolik fogerakhagain logouwak, nen An nen mondok-mondok faget nendawi hundik hilinginafi lagi mene andi faget inom, An nen eberogo weneba inom katokhogo hilingitarek meneba inom o kweangma mondogat omamet fikhi lagi mene andi faget aren elu aga halok enek he, fogerakhagain logouwak. Mondogat andoma a'nogo asigin halok ibi-eberogo nen he An nendawimo namolo anggigirek mene o. iluk An hineisena Tuhan nen nane mondogat igi,” ikhe isikhe.

²⁵ Yethani! Afuni weagerinabigin oba arat horogasi waga o. Tuhan nen ikhi logolik, ”Yi afuni ti afuni mondogat inagap inenggalimo mene palek lek mene inom, nen afuni Israel mene inagap inenggalimo mene palu hak inendawinggen oba nen eberogo anggili'lagwi lek mene inom inebe mondogat wene inoba fagain oba arat asi waga andi nen he:

²⁶ Inunggulenu Mesir mene inom, Yahudi mene inom, Edom mene inom, Amon eisok erokwe mene inom, Moab mene inom, it afuni inesi inunggul hogologo palharek mene inom, afuni o leimo esi lekwe welagaikharek mene inom he wene inoba feigiluk waga lagi o,” iluk ikhe.