YEREMIA 7 - Allah Wene Fano Wene Hupla Inane

Yeremia nen Allah wene o Tuhan Awi wuri'mo nen yagaisasikhe wene

^1-3 Tuhan nen he o At awi wuri'mo omanogo lan iluk an laknobagaikhemo lagarik he kwe ambe palek mene afuni Yehuda mene kabogesuogeluk wagaikharek oba omanogo mendek logolik were'ma nen he, Aren it inoba wene yi'nogo yagaisano iluk yaganete. Nen wene yagaisoageluk yaganete mene andi ebere yi, ”Hit hinobabut inom, hinebe welagep aple inom, agaum e'ni o, hit hinobabut agaum esugun halok he An Tuhan Nomame Mondok Hokho mene, afuni Israel mene ineisena Allah a'nogo nen hit o yoma femhogo logoni iluk yagahisagain o.

⁴ Hit he aben lalhinafi logolik, ’Yi re o Tuhan Awi wuri'mo, eberogo yi Tuhan awi wuri'mo o,’ nit he ninailo legengge logogun iluk yagahisagarek mene andoma inoba re eberogo angga fugo.

⁵ Hit hinebe welagep aple inom, hinobabut hilingiti lagep aple inom agaum e'ni o. Nen hiren he ap ekhe inoba higithogo nek hilinginafi logoni.

⁶ Ap pok mene inom yenggerugwi suarek mene inom, hemi sogwe mene inom sebelogo fisagarek mene andi re ariginhi logou fuk. O kweang yiba nen ap weak hilingiti'lek kwelek he inoasu fuk. Nen kembu ilah omanogo inoba apne wanhi logou fugat. Hiren a'nogo hilingiti logogun halok he hinebe weaget hinabigin enggere.

⁷ Hiren ambi hinobabut hebelhik, hinebe werek aple hal fakhigik, nen andoma mondogat hilingiti lagep mene andoma palfogoin halok he, An nen kweang hit hinombawi inanggweang mene asuageluk wogisasigi mene ariba hit femhogo logobagaigeluk wokhisagain o.

⁸ Oba nen, ibi-eberogo nen he, hiren we alomarogo ineranen wene agarek mene omanogoba tibet fikhi lagep.

⁹ Hiren he ap inangge hinatik, ap watik, babi lagik, hineranhogo wene igik, Baal oba warogo wogetik, nen dewa hit hinonggot mene omanogo apne wanhik, hilingiti lagep.

¹⁰ Hiren andoma mondogat hilingiti la'luk he An nambit An nonggwarek nawi wuri'mo yoma we'luk hiren ikhi logolik, ’Nit he ninendawinggen serogo welago,’ iluk he hiren nekhe aple omanogo hilingisi laga lagep.

¹¹ Hiren anggikhi logolik he, An nawi arire ap hina'ni inaiba anggikhi lageba? Hiren hilingiti lagep mene andoma re An he mondogat neilenggen hikhi lagi o.

¹² Hit he o Silo kota attak An nen nobaget hilingiti logolik kabogetuba iluk wenagaisogo fesigiba a'nogo lani o. Laluk he it An nagainafuri Israel mene nen inaweak hilingiti lagaukwama An nen o andiba hilingfesigi aple andoma hineilenggen kumuthano.

¹³ An nen hundik-handik hit hinoba ugu welagiba nen, hiren holhu aple hinabit mondok welagep. Hit he weak mene andoma mondogat hilingiti logolik he, An nen wolhinafunem he hinane onggo igi'lek welagep andi.

¹⁴ Enggere, An nawi wurik hiren hinendawinggen himbirik welagep mene, An nen hinombawi inom hit inom wokhisasigiba ari re, An nen attak o Silo ba hilingfesigi andi higit hilingisogo fagain o.

¹⁵ An nen hit hinagaila'lak hinerugwi Israel mene mugusogo wulaginafigi hak, hit ogo An nelokhoma nen mugusogo wulak hinobagagin aro,” iluk ikhe o, isikhe.

Afuni inungguloak haro mene faget isikhe wene

¹⁶ Tuhan nen ikhi logolik, ”Yeremia, haren afuni oma inobaget samban u fugo. It inobaget haren leberisigik, samban inobaget igik, u fuk. An he haren kino yaganesigin mene andi hane holigin lek enggere, an noba hane ning nanghogo yaganesu fuk.

¹⁷ Hat he it ap andoma nen o kota Yehuda nen meneba inom, Yerusalem en meneba inom ebekhe kwe hilingiti lagaukwa mene omanogo mondogat heilenggen hasigin!

¹⁸ Yenggerugwi magendek mene nen he e wurogo kabogetu kwelek he, ap inaluendek mene nen he endu nonggwalhi lagaukwa, nen hemi re kue kembu he mene Dewi Ratu Surga iluk agarek mene a'nogo faget weragaisogo fogoin nen iluk mulelhi lagaukwa. Nen, ekhe An nendawinggen waroageluk he iren anggur agai ilah amu mene faget fuluk wogeti lagaukwaat.

¹⁹ Oba nen, ibi-eberogo mene re An nendawimo ouet nobagali'lagwi re fuk, athe it inonggwarek inendawimo ouet fakhili'lagwi oba re inonggwaregat inenggali ari'lagwi andi.

²⁰ An Tuhan Lego Mondok welagirek mene a'nogo nen o wene kabogetu awi yi inom, afuni inoba inom, wam, mene, paik inom, e wilibik meneba inom, kweang oba nen enggen ugu andoma inom, nanini hokho mene a'nogore andoma oba fagain o. An na'mage lagali'lago mene andi re endu wabunak nunggunem nagulu elo'lek agarek andi hak hilingiri'lago o,” iluk ikhe.

Afuni inaweak onggo wene inoba fagain isikhe wene

²¹ Tuhan nen ikhi logolik, ”Yago hit An nagainafuri mene yoma sani, hit he yi mene ti mene fuluk mezbah amboloba nolhi lagep mene andoma re mondok alkan kurogo nolhi lagep, nen fena hit ninggi lagep mene andi re hit hinonggwarek hinelu o. Oba nen he An Tuhan nen yagahisikhi logolik, andoma mondogat ninggi logogun andi fano! Iluk ikhi lagi.

²² An nen hit hinombawi o Mesir en woginarek wulibi wagagi andem sambul, An nen it inoba wam An nendawimo nagaiyekhogo iluk warogo nolhu mene inom nen amu mene faget nolhi logolik hilingitu mene faget wene melalogo yagaisasigi lego.

²³ An nen he we An nebe it inobaget ineisena Allah were'ma it An nagainafuri a'luk logouwageluk he An nane hologo hilingiti logoino iluk enek he yagaisasigi. Nen, it inendawimo inagaiyekhogo logouwageluk he An nawene melalek higithogo hilingiti logoino iluk yagaisasigiat.

²⁴ Oba nen he, iren holhi'legengge hilingitik, fut figi'lek welagik, hilingiti lagaukwa. A'nogo hilingiti logolik iren he ina'mageba nek wene mondok kwanirek mene omanogo hilingiti lagaukwa. It inebe re fano aga lagaukwa lek, meneat he ekhe inom mondogat inanini weak mene aga lagaukwa.

²⁵ It hinombawi o Mesir en wulibi lagaukwa huli nen engge yogondak huli nen he An nen namingmingengge nabi omanogo hit hinoba lakfisa wagu mondok welagi.

²⁶ Oba nen he hiren ekhe hinesanggo holhik, fut-figik, ikhi lagep lek. It hinombawi re horok harek hak welagaukwaba nen hit enek he hinungguloak mondok haro logolik, hinanini mondok hokho welagep andi,” iluk ikhe isikhe.

²⁷ Andi nen Tuhan nen ikhi logolik, ”Ariginik enggere Yeremia ahwi, haren mondogat andoma re An nagainafuri inoba yagaisikhi logogin oba nen he iren hat hane yagaisikhi lagen mene andoma futfikhi logogun lego. Nen, haren it wolinafi logogin oba nen he iren inane onggo ikhi logogun legaro.

²⁸ Enggere, haren it inoba yagaisikhi logolik he, Hit hinunggulenu yi re hineisena Tuhan Allah a'nogoba ane hologo hilingisu hinabit hinap welagep. Hit he unggum hinoba fugunem enggin-fenggin hinoba agarek mene omanogo futfikhi lagep lek inap welagep. Tuhan oba tiphogo hilingitu mene omanogo hit inoba mondogat longgo ikhe, nen hinaneba nen ogo At faget ekhe tindelogo yagaisogoin mene welagep legaro,” iluk yagaisano, isikhe.

O Hinom tonggoma nen inobaharo asu mene hilinglagaikhe wene

²⁹ Tuhan nen ikhi logolik, ”Yago, hit afuni Yerusalem mene yi sani! An Tuhan nen nanini arat hinoba figirik, hit mondogat obokhogo lakhinobagagi andi nen he, fong watu logolik, hinesi palogo hugisigik, o tom-tom alonggopkwe andoma nen le wuni wulagaisogo watu welagik ikhi logobagaigen he andogosi we'ni o!

³⁰ Afuni Yehuda mene nen he inaniniba mondok weak mene hilingita o. Kembu iren mene An nen nabit iluk ikhi lagi mene omanogo re An nawi elonggoma fagama re emetfaga andi.

³¹ Mezbah misik ekhe enu Tofet andi re o Hinom Tonggoma andoma, iren kembu endawimo agaiyek hoageluk inomalik warogo nolhuba faget wutha. Andi re iren a'nogo hilingisuageluk An nen ogo ekhe yagaisigi lek oba nen, nen ariginik mene andoma re An nendawimo iluk ogo eberogo wagarek lek mene oba nen hilingita.

³² Andiba nen he inenggi ekhe higit asi wesigin oba obalik andem enu re Tofet igik, Hinom tonggoma igik ikhi logogun lego, oba nen he, Ap ware Tonggoma ikhi logogun. Kweang andem he kweang amukwe ekhe werek lek enggere ap wa'lagaikharek mene salinafarek oba ikhi logogun o.

³³ It inebe warek he sue nen inom mene olomene nen inom nunggu mene aga logogin, nen amungge nen iluk ekhe ineil palhi logogun lek.

³⁴ O kweang yi re mondogat lei pirimse'ma asigin. Inagaiyegen inane agarek mene inom afuni lambulinafunem inom pesta hilingiti logolik hilingitarek mene inom he o kota Yehuda ba inom Yerusalem ebekhe kwe inom andoma An nen leget foumo re afuni inane ekhe igi'lek mondogat tiring-tereng igin.