YEREMIA 6 - Allah Wene Fano Wene Hupla Inane

Selei mene nen o Yerusalem haningisogo kwelabi kwi wagaukwa wene

¹ Yago, hit afuni Benyamin mene yi sani, o abel utara fikhiren enggin mene inom, obabut mondok weak mene inom ninoba feigiluk weri'lago andi nen he, hit he o Yerusalem herakfisaluk wulibi lani o! O Tekoa nen he trompet futhani, nen o Bet-Kerem oba andoma enegenggerogo iluk he endu hule liapni.

² O kota Sion andi re eil alili mondok fanorek oba nen, At Tuhan nenat wolelenggenhogo fagain o,

³ nen it ap inenu werek welagaikharek inap he it inagoromi tentara inom o andoma lambik inawi tenda wuralogoin. Nen o kota andi abel haningisogo andoma re it inebe logogunkwe inendawimo nen anggaluk inamolo asigin oba inawi tenda wuthigik logogun.

⁴ A'nogo logolik iren yi'nogo ikhi logogun, ”Nit he o Yerusalem pin kugun enggere fik-foukhogo hilingi'ni o! We o linggene yibaat kuogen weni!” ikhi logogun. A'nogo ikhi la'lugen nekhengge iren ikhi logolik he, ”Eige, nit he aninuto higi! Ninafumak mondogat uan agik, o arat mumumenggetik, hilingiri'lago yi o.

⁵ Ariginik enggere niren o hubanggo pin kugun andi re mondok fano, kwikhi logolik it inawi agap telogo iluk leget pa'leget omamerogo waganek mene andoma mondogat wolelenggen isa kugun o,” iluk ikhi lagaikha.

⁶ At Tuhan Omame Mondok Hokho mene a'nogo nen ap inenu werek welagaikharek inap omanogo nen e mutik, o Yerusalem pin kugun kwe e mugusogo kweang punurogo filik lagagik, hilingisuageluk inyonggo fikhe. Nen Tuhan ane ikhi logolik he, ”kota yi elonggoma andoma nen afuni mondok sebelogo fisikhi laga andiba re An nen unggum wogosigin o.

⁷ I elesi wulabi wagarek oba nen i eil fano mene wulabi wagarek higit, o kota andiba nen he inanini weak mene nek enggen palogo wulafu welagaikharek. O andiba nen he ina'mageba hilingfisagarek mene inom, inenggi abisak helagarek mene inom andoma nek hilingitunem An nen nesanggo holhi lagi. Inoumo inom inagap oba ou werek mene inom yikwe tikwe were'ma nek neilenggen hikhi lagi.

⁸ Yago, hit afuni Yerusalem welagep mene yoma sani, An nen hit oboget hisaluk hit hinawi kota ari agamhogo re afuni inareng le'ma lei pirimse'ma hilingisogo hinobagagi hanogo re, enggin-fenggin hikhi lagep mene andoma re hiren fanorogo ebethikhi logobagaigeluk hilinghinobagakhi lagi o,” ikhe isikhe.

It afuni Israel mene nen wene melalek sagalogo fagarek wene

⁹ Tuhan Omame Mondok Hokho mene a'nogo nen an noba ane ikhi logolik, ”Israel he ungguloak enek hogol foumo re anggur yabumo enggen mondogat palhunem hilingik hak hilingisogo fagain o. A'nogo hilingisigin andi nen he yogondak linggene we endebat werek andem oba re afuni fena werek mene andem inagap telogo fisani o,” iluk ikhe.

¹⁰ A'nogo ikhemo an nen ikhi logolik he, ”Tuhan neisena, an nen ap saba yagasu hak nogo, nen sani inendawinggen wenggelogo logouwageluk yagaisagain, it he inungguloak haro logolik fut fili'lagwi lek. Haren yagaisano ugu mene omanogo an nen it inoba yagaisugunem he iren endo yagaisogo inabit eri'lagwi inap werego.

¹¹ Tuhan neisena, Haren hanini inoba fagain iluk hilingiti lagen mene andi ogore an noba aik age lagagunem he sebelhaluk lagou re elo'lek nabi'lago,” iluk yagati. A'nogo igimo At Tuhan nen ikhi logolik, ”Hat ha'mage lagaikhe mene andi re yenggerugwi magendek mene o kota ebekhe kwe werek mene inom, ap souge mene andogorekwe andoma inom kweisalogo lakfein o. Ap inom hemi inom mondogat hele warinabugun o, nen ap mondogat yaman agaikha mene ogore ekhe herakfisogoin lek.

¹² It inawi re ap amu mene inoba wogisogoin, andi nek fuk oba nen it ineabu kwe inom, inagagwi inom ogore wogisogoinat. Afuni o kweang yiba welagaikharek mene mondogat he An nen unggum wogisagain.

¹³ It inebe mondogat yenggerugwi magendek mene inom inaluendek mene inom he ineranhogo lalhigik ambisangma saburili'lagwi. Nen it nabi inom imam inom oba nen ogore afuni ineranhogo wene yagaisili'lagwiat.

¹⁴ An nagainafuri inoba inoumo werek mene andoma faget it inendawimo nen he inoumo we magengge anggili'lagwi, iren ikhi logolik he, ’Ah legu, mondogat he fano nek welago,’ iluk ili'lagwi. Oba nen eberogo nen he lek oba nen.

¹⁵ Ebe eberogo mene re iren ina'meilo mene andoma hilingitunem he inenggali asu mene o, oba nen it he inoba ambumhogo logolik inenggali mondogat lek. Andiba re it ogo ap amu mene hakhogo talorogo warogoin. Ma re An nen unggum wogisagain andiba re it inanini welagaikharek mene a'nogo ogore mondogat kobok igin. Iluk An hineisena Tuhan nen nane mondogat igi o,” isikhe.

Israel mene nen he Tuhan nen fetninarek logogin ninabit iluk isukwa wene

¹⁶ Nineisena Tuhan nen againafuri faget mel ikhe: ”Hit hinebe ebekhe lagaikharek oba kwe handogalma andoma mendek logolik he hineilenggen fanorogo penesino o. A'nogo pene'luk he, kwe attak laga lagaukwa kwe andi, hiren wenakhaluk he, Fano re yi kwe iluk hinendawinggen hambukhogo logobagaigen he, kwe fanokwe andiat laga logoino o,” iluk ikhe. A'nogo ikhe meneat he, iren mel aga, ”Kwe haren egen kwe andi nen laga logogun he ninabiro,” iluk aga.

¹⁷ A'nogo agama re Tuhan nen yi sambul ti sambul he enegenggerogo iluk trompet ane hokho mene anethugunem he, Andi re inebe wagaikhama iluk inafe hebelaga logouwagaluk ap kagalek logogun mene menfisugu mondok welagaikhe meneat he, iren he, ”Nit he pinggong ane andi ninesanggo holek logou re, ninabiro,” iluk ikhi lagaukwa.

¹⁸ A'nogo ikhi lagaukwa andiba re At Tuhan nen ikhi logolik, ”Hit afuni hinunggulenu lombok welagep mene andoma nen hinesanggo holino o. An nagainafuri mene inoba ekhe hilinglasigin mene andi re hinelu asigin aro.

¹⁹ Hat kweang yi. An nagainafuri nen, an nen yi'nogo hilingisugun ti'nogo hilingisugun iluk komorinafigi wene andi, nane hologo hilingiti'lek herakfisaluk, it inendawimo nen anggaluk hilingisugun mene nek ebetu werek andi nen he, mondok weak mene inoba lakfei wesigin enggere fanorogo futfein o.

²⁰ Iren kemenyan amben fanongge a'nogo o Syeba nen inom, nen yi mene ti mene enduk fano mene ekhe o yatma nen inom, An faget waluk weri'lagwi andi nenahalok nogo? Andoma re tulem aro. Iren yi mene ti mene An nobaget nobagali'lagwi mene andoma re, An nen wanhi lagi mondok lek. Wam warogo nolneri'lagwi mene andoma ogore, An noba liok ili'lago legat.

²¹ Andi nen he, An nen hilingik obare it ekhe ineisok temukhogo hulambesugun. A'nogo warikhi logolik it ap inaluendek mene inom, inagainafuri inom, inagaila'lak inom hundik mene inebe mondogat alomat lakhogoin o,” iluk ikhe.

Abel utara fikhiren weim kwi wesugun isikhe wene

²² Nineisena Tuhan nen wene a'nogo ikhesik, ekhe mel ikhe: ”Afuni inunggulenu ekhe inomame mondok hokho mene abel utara fikhit yatma andoma nen wesuogeluk hilingiri'lagwi. It wesugun andi re weim yabuogeluk wesugun.

²³ Ap andi inobabut he mondok weak logolik sikhe sigeba inoatarek inap. Inebe ekhe inendawirinafi'lek inoatarek inap. I laut yenggelek eindep ane ikherek andi hak, it andi inanggo kuda ba lagaluk esa fologo wagunem ineisok ane tap-tap waga logolik, hit afuni o Yerusalem welagep mene hinoasi kwi wesugun o,” iluk ikhe.

²⁴ A'nogo ikhemo, it afuni Yerusalem welagaikharek mene inesanggo holhasik he, inoagelekwe mondok kilukhogo, inailo mondok agama re, hemi omalik taginabuogoluk heinet hokho watarek andi hak, aleik hokhorogo wati lagaikha.

²⁵ Aleik a'nogo wati logolik, iren ebekhe kwe wilifu aple ogo, nen yabukwe lagu mene ogore yikwe tikwe omanogo re ap inoatu mene nek kagalek werek iluk aleik kwelafunem he inailo lekhogo lare mondogat elo'lek aga.

²⁶ A'nogo hilinglaga andi nen, At Tuhan nen againafuri faget mel ikhe: ”Hit hinaselei mene nen hinoasugun mene andi re, hit hinobakhe palek were'ma hinoasi wesugun andi nen he, hinasu karung su laberogo wulkwe limbik lambak laga logolik, inagainafuri manggusa mene wa'lagunem, fong watu logolik le mondok weakhogo agaikharek andi hak, li le aga logoino o,” iluk ikhe.

²⁷ A'nogo ikhesik Tuhan nen Yeremia ba ikhi logolik: ”Haren he, no perak endumo weragaisogo obabut palharek andi hak An nagainafuri andoma inobabut palinabino o. It inobabut hilingik aple furogo kwelagisano.

²⁸ It mondogat inobabut he, An nawe a'ma logou inabiren inungguloak mondok helep haroweak andi hangge logolik posiemanggen haro andi hak a'luk hilingitarek. Ina'meilo mene hilingiti logolik, afuni ekhe inenu weagarogo inane tindel weagengge afuni inabok palik nikharek andi.

²⁹ Perak tegeluogoluk endu aik weak meneba weratunem, weak mene i hangge hilingla'luk tegelagarek mondok elo'lek andi hak, an nagainafuri inendawimo nen inobabut weak mene tegelogo wulakfisagain mondok le'ma re, elalinat tegelinafu mondok logou hago.

³⁰ It inebe An hineisena Tuhan nen mondogat oboget isigi andi nen he, afuni ekhe nen ikhi logolik, Perak herakfisaga mene o, iluk inenu salinapluk ikhi logogun andi,” iluk yaganete.