YEREMIA 51 - Allah Wene Fano Wene Hupla Inane

Babel mene inoba unggum amu mene ekhe fisagain isikhe wene

¹ Tuhan nen ikhi logolik,” An nen he sogoi sielu weagerinaferek mene o Babel fikhit inom afuni werek fikhit inom funhogo weaget fei wesuageluk lakfei wesigin.

² Sogoi en gandum agap furogo lakfikherek hak An nen ap Babel mene andoma wolelenggen inabuageluk ap pok mene lakfisa wesigin. Linggene andi sambul he o kweang andiba unggut fena-fena nen kwi we'luk felelenghogo mondogat inoasugun.

³ Ap tentara it mene nen inasikheba ekhe pisiget isoageluk selegerisigik, nen it inasu weim yafi logolik labetarek mene labe'luk wonoget fakhoageluk hilingfisigik, u fuk. It mene ap souge andomare ineluk ekhe herakfisa fuk. Nen tentara it mene andoma mondogat he wolelenggen isano!

⁴ It inebe re tok inelonggoma yugulogo inoasumo re it inawi kota ebekhe kwe andoma wa'lasugun.

⁵ An Tuhan Nomame Mondok Hokho mene, Israel mene ineisena Allah Horek welagi mene a'nogo nen he, Israel inom Yehuda inomen An neilhanem weak hilingitaba nen he An nen it oboget isaluk lagain mondok lego.

⁶ An nen Babel aniniba hilingiti laga mene a'nogo inom, nen at obabut hilingiti laga mene inom ambisangma higithogo unggum oba fagain sambul a'nogo re, yogondak yiat hilinglaga. Ma re at aweagen wasugun sambul andi re hirogo hinoasinogo hinonggwarek hinagap telogo re o Babel en heise wulibi lani o.

⁷ Attak Babel he piala emas hakhogo An nenggiba were'ma o kweangma mondogat lugu-lugwit fisikhi lagaikhe. Ap inunggulenu mene re piala emas mene andiba anggur agai nenggarek engge nen lugu lugwi palhi lagaukha.

⁸ Oba nen he ferekhogoat Babel a'nogo pikhi logolik he mondogat halokhogo tagikhe. Andi nen he at obaget le yaginapni o, at ebene oumo werek mene andoma obat foumo fano asu hak enggere at obaget obat hera'ni.

⁹ Ap pok mene o andoma werek mene ekhe nen ekheba ikhi logolik,” Niren he Babel telugun iluk hilingito, oba nen he aninurato! Enggere niren o kweang ari herakfuluk nit ninaggweang lombok logoin andi re fano. Tuhan nen Babel oba unggum mondok omamerogo wogetesik mondok wolelenggenhogo hilingfikhe o, ikhi logogun,” ikhe.

¹⁰ Tuhan againafuri nen ikhi logolik,” Nit he eberogo mene fikhit welagongge a'nogo re Tuhan nen inuk nisikhe andi. Enggere nit he o Yerusalem lambik he nit nineisena Tuhan Allah nen hilingite mene andoma tindeli louwogen he we'ni o,” ikhi lagaukwa.

¹¹ Tuhan nen he Babel wolelenggen inabigiluk he ap raja-raja Media mene inoba inayonggo fikhe. Aren ap Tuhan Aiba a'nogo weaget fesukwa mene andoma inoba ambisangma hilingfisageluk he a'nogo hilingite andi. Ap sikhe pisogo inap inogogwi perwira nen he,” Tok enggat kabelini! Tok peiyengge fouge'ni!,

¹² Babel en pa'laget leget waganek mene andomaba hou sali laluk kwi logoin nen he enegengge feni o. Nen, ap salek mene re omamet feino. Ap inera'lu mendek mene re fouget feino. Ap kwe palinafu mene re fik foukhogo hilingi'no!” iluk ili'lagwi. Tuhan nen he afuni Babel mene inoba hilingfisagain iluk wenggelogo fikhe mene a'nogore mondogat hilingite.

¹³ O kweang andiba yi mene ti mene mondok hokhorogo were'ma re agai lagarek mene andoma ogo hokhorogo werek, oba nen at eluk werek mene ogore arat lek aga, nen ebe legasigin oba ogore arat asi waga.

¹⁴ Tuhan Omame Mondok Hokho mene a'nogo nen At onggwarek enuba hombuk palhi logolik, ap o Babel inoasi kuageluk he no pulue elang palogo lagarek hakhogo lakfei wesigin, nen iren he inomame asimbik inagaiyegen inane a'mit suphogo hilingiti logogun, iluk hombuk palhe.

Wuniba Allah faget fogeratarek wene

¹⁵ Tuhan nen he At omameba kweang elalhikhe, Endawinggen wenggelek oba re kweangma mondogat pugunhogo fesikhe, At hebelek oba pogot tiaganhogo fesikhe.

¹⁶ Aren aneba amin iluk ugu kwelek, i huli-huli warek mene a'nogo abolok founak lenggak isikhe. Kweang wurep-wurep andoma nen he ohena lakfei wagik, nen meiso anggele'ma nen eilabut yegelogo lakfigik, nen o sogoi re obalik warogo fisogoba nen lakfei wagik, isikhe.

¹⁷ A'nogo hilingitikhe mene andoma haluk he afuni nen, an nebe re kembu higi, nen wenggelek mene welagi le'ma o, iluk fut fili'lagwi. Ap emas elalharek inelu mene re iren tugwi kembu alik hilingiri'lagwi mene omanogo re ebe mene re fuk, nen eluk ogo werek legaren he inelokhe longgo ugun.

¹⁸ Tugwi kembu andoma re ebe mene re lek andi nen he puliaphogo seramet fisogoin halok fano. Inenggi ekhe wesigin meneba re it inebe mondogat legasugun.

¹⁹ Yakub eisena Allah andi re kembu andoma higit he fuk. At andi re yi mene ti mene elalhikhe agun. At enu re Tuhan, Omame Mondok Hokho mene. Aren he Israel At onggwarek againafuri mene logouwageluk wenagaisogo fakhasikhe.

Babel he louk hangge isikhe wene

²⁰ Tuhan nen ikhi logolik,” Babel ao, hat he, louk hangge welagen, An nasikhe weim yafu mene re hat welagen. An nen hat hebene nen he yi afuni ti afuni inunggulenu lombok welagaikharek mene inom, kerajaan omanogo inom, inoasuageluk hat hebe wokhafi lagi.

²¹ Hat he An nen ap kuda ba lagaluk lagaikharek mene inom, kuda ebe inom, ap kereta ba lagagarek mene inom, kereta ebe inom haren wolelenggen isoageluk hayonggo figirik wokhafi lagi.

²² Haren ap inom, hemi inom, ap ebendek mene inom, yaman mene inom, helime tugum, ap souge mondogat inoasuageluk an nen wokhafi lagi.

²³ Haren ap domba halharek mene inom, domba ebe inom, ap yabu wanharek mene inom, angge lembu kweang mogoli'lagongge a'nogo inom, ap inomame werek mene inom, sikhe fisogo inap inogogwi perwira lego mene inom leget fisoageluk wokhafi lagi o,” ikhe.

Babel oba unggum fesikhe wene

²⁴ Tuhan nen ikhi logolik,” An nen Babel inom afuni andoma werek mene inomen o Yerusalem inaniniba hilingfisikhi lagaikha mene a'nogore ambisangma yogondak it inoba hilingfisikhi lagi mene andi hineilenggen tomok hili'lagwi o.

²⁵ Babel hat hebe re tom eil nagulogo waga logolik o kweangma mondogat wolelenggenhogo fikherek hak hilingik welagen. Oba nen hat he, An Tuhan nemberek walhogoin. An nen he, nenggi pisarogo lithea wesimbik he, tom helep unggul oba nen limbil habi wesumo re endu nen nambik wul asuageluk herakhobagagin.

²⁶ Hat hoba helep fano wurikweak mene logogin mene andoma ekhe o tik wasuogeluk wanugun mondok lek. Oba nen hat he inenggi mondok-mondok faget o lei esi le'ma hakhogo asimbik logogin. Iluk An Tuhan nen nane mondogat igi,” iluk ikhe.

²⁷ Hat raja utara fikhit mene yi re! Weim sineli kwikhi logolik enenggetan o! Ap inunggulenu mene nen holouwageluk trompet ane fusin! Yi afuni ti afuni inunggulenu lombok lirinabimbik he Babel hinom weim yabini. Ap kerajaan Ararat mene inom, Mini mene inom, Askenas mene inom ogore, tok sineli wesuageluk yagaisan. Pin kugun mene andi faget melalinafu mene ap misik ekhe inoe panglima logouwageluk menfein o. Kuda re pulue esa hangge omanogo abologetan o.

²⁸ Babel inom weim yabugun mene re it inunggulenu inap omanogo mene sani nogo? Ap raja Media inap inom, inogogwi kaindek bupati omanogo inom, ap hokho-hokho inap andoma inom, tentara inogogwi o kweang ariba sebelek mene andoma mondogat wesuakhogo wolinabin o.

²⁹ An nen Babel a'nogo mondogat ungguloak enek hilingfuluk afuni werek lek oba hilingfagain iluk wenggelek welagi mene a'nogo hilingitunem he, kweang he mondogat leigeti logolik milesigin.

³⁰ Tantara Babel mene re weim yafu aple herakfisagasik he o inamu tegele'ma inalele himbirik oba omanogo kwagasik werek. It he, inailo lek hilingitarek mene a'nogo longgo ikhemo re inoak nonggok ikhemo werek. O kota bene kwe hokho ambe palek mene omanogo re afuni nen langguk isaluk kwi wagaikha, nen o wurik he mondogat endu faga.

³¹ O kota a'nogo unggut fena-fena pin kwi wagaikha o, iluk inoe raja Babel mene a'nogo yagasuogeluk he, ap yonggo hobugalep lagik wagik hilingiri'lagwi.

³² Kwe fena fikhit lagunem he ap selei mene nen kwe pale'ma, nen nit ninalong pale'ma iluk wurik oba omanogo lagunem he mondogat endu fagoma. Tentara Babel mene re inoba fokhogo kumuti logolik werek.

³³ It he, no gandum enggen sagalhuba nen hilingitarek hakhogo we welagi'legat ap selei mene nen inomame leget fisaluk al perelogo fisouwogeluk werek. Iluk An Tuhan Nomame Mondok Hokho mene, Israel mene ineisena Allah a'nogo nen nane mondogat igi o,” ikhe.

³⁴ Yerusalem raja Babel mene nen wolelenggenhogo fikhesik mondogat ningge, kota andi re i oak oba hinagongge were'ma afuni nen leget fagarek hak hilingisogo fikhe. Kisu menawe hokho mene nen hakhogo aren Yerusalem pilisikhesik he, o kota andiba nen fano mene omanogo re, alabutmo kwalikhi logolik weak mene re hugisikhe.

³⁵ Afuni Sion mene yi re,” Babel andi re, aren anini nit ninoba fikhi lagaikhe hak he at oba ogo inanini oba fikhi logouwak!” Afuni Yerusalem mene yi re, ”Babel andi re aren nit ninoba ou pou ninobagaikhi lagaikhe hak he at oba ogo ou pou mene oba fei wesuak!” ikhi logoino.

Tuhan nen Israel mene leberisagain isikhe wene

³⁶ Andiba re, Tuhan nen afuni Yerusalem werek mene inoba ikhi logolik,” An nen he, hit hinawene andi faget ero herasimbik he, it hinaselei mene nen hit hinoba hilingfesukwa mene andoma An nen ogo it inoba ambisangma hilingfisagain aro. It inagai lagarek mene inom, inagai elesi wuliferek mene inom o Babel oba andoma An nen mondogat firitokhogo hilingfagain,

³⁷ O kweang andi re, o meisalegen enek kabok lagagu mene asumo re, mene olomene andoma hina'laguba logogin. Aben he, inamel melhogo nek kwelakhikhi logogun, nen, afuni o andoma werek mene faget ekhe inendawirek logogin lek.

³⁸ Afuni Babel mene re mene singa ane hakhogo inane kouwati logogun, nen mene singa eagen hakhogo inane ngologeti logogun.

³⁹ Ariginhi logolik iren inamburu nele mene inoba horogat asi wagunem he, An nen it nunggu mene isagaisogo inelokhoma foumo re, lugul-lugwi palogo, inafe mosimbik, nogogun mene re menlagi'lek logogun.

⁴⁰ An nen, it he wam domba, kambing eagwi inom domba ai mene inom wasuogeluk waluk lagaikharek hak, woginarek lagain o. Iluk An, Tuhan nen nane mondogat igi,”? ikhe.

Babel ambisangma asigin mene faget isikhe wene

⁴¹ Tuhan ane ikhi logolik,” Babel o kweangma mondogaren foget fagarek mene a'nogo re, aben telagasik sebel fakhagasik werek! O kweang andiba hilinglaga mene andi re, it ap inunggulenu ekhema-ekhema werek mene nen he mondok inamel melhogo hili'lagwi.

⁴² I laut kerak-kerak he o Babel huli lagai waga, i agum fonyak lenggak hikhi logolik he o kweang andiba sebeli laga.

⁴³ At awi kota-kota omanogo re mondok inamel melhogo o lei pirimse'ma hangge hilingik. Aben andoma inamolorogo ekhe welagik, kwe andi kwe lagik agarek mondok lek.

⁴⁴ O Babel kweang oba andoma kembu dewa Bel a'nogo An nen unggum wogosigin. Aren telasikhe mene omanogo re nekhengge obali'mo fei wesuageluk hilingfagain. Yi afuni ti afuni nen at faget ekhe apne wanhi logogun lek. O Babel pa'leget omanogo mondogat langgukhogo pikhe.

⁴⁵ Ariginik enggere yago hit afuni Israel mene re, andoma nen heise lani o! An na'mage mondok lagaikhemo hilingitinggere hit hinebe ogal fakhani.

⁴⁶ Hiren ap inane iluk waluk ugu mene faget hinailorogo hinendawinggen fisu fuk. Tahun hundik-hundik oba re, wene o kweang nit welago mene yiba nen lalfalhogo hilinginafarek awene omanogo inom, nen ap raja-raja nen weim it ekhe nen it ekhe inom yafu awene inom omanogo nek sagari'lagwi.

⁴⁷ Inenggi ekhe wesigin meneba re, An nen Babel oba kembu andoma mondogat unggum wogisagain enggere eberogo nen anggani. O kweang andiba re, mondogat puliarogo pelak fisogoin, afuni werek mene re mondogat inoasugun.

⁴⁸ Unggulenu utara fikhiren wesimbik Babel wolelenggenhogo fugunem andi re. Pogoroba inom kweangma inom werek mene omanogo nen he, Babel a'nogo ap selei mene enggimo aga o, iluk inagaiyegen a'mit suphogo hilingiti logogun.

⁴⁹ At Babel en hilingiteba re, afuni o kweangma hokhorogo inoatama wa'lagaikha, oba nen yogondak he ap Israel mene inoatemo wa'lagaikha mene andiba re Babel mondogat sebelogo pelabugun. Iluk An Tuhan nen nane mondogat igi,” ikhe.

Tuhan nen ap Israel mene o Babel werek mene faget isikhe wene

⁵⁰ Tuhan nen afuni Israel mene o Babel werek mene inoba ikhi logolik,” Hit he ap inoati lagep meneba nen wulifep mene andi re, nenangorogo welagi'lek weak-weak wulibi lani o! Hit hinawi hinebe welagep oba andoma nen eil uanhogo welagep oba nen he An hineisena Tuhan nebe faget inom o Yerusalem faget inom wenggel hano,” ikhe.

⁵¹ Hiren ikhi logolik,” Nit he afuni nen wena'nisikhi logolik, ninenggali warogo hilingninabi'lagwi o. Nit he Tuhan awi wuri'mo senggelek horek meneba omanogo re ap pok mene hu'lasi kwagama re ninelokhe enggali aga o,” iluk ikhi lagep.

⁵² Yogondak he, An nane ikhi lagi mene yi fut feni, hinenggi ekhe wesigin meneba re, An nen Babel mene inandugwi kembu andoma wene inoba fagain. O kweang andi mondogaren he afuni tok warogo ou engginsek logolik heinet watunem he, inane holhi logogun.

⁵³ At Babel ebe pogoroba lagai laluk at along pale'ma aben fakfei lagau elo'lek oba lagoumo nen ogore, An nen he aben meisalogo weaget fisoageluk lakfisamo re higit aro. Iluk An Tuhan nen nane mondogat igi.

Wene Babel wolelenggenhogo fagain mene andi ane wurep lisogo re yi'nogo palek werek

⁵⁴ Tuhan ane ikhi logolik,” O Babel kweang andiba mondogat wolelenggenhogo hilinglaga mene andi faget heinet watik, le agik, ili'lagwi mene andi re hinesanggo holini o!.

⁵⁵ An nen he Babel wolelenggenhogo fikhi logolik inane anggilukhogo ili'lagwi mene omanogo palfisikhi lagi. Ap selei menere i laut agum founyak lenggak hikherek hak hilingirik weri'lagwi, nen tentara re weim eindep ane firirip-farap kwili'lagwi.

⁵⁶ It he Babel weaget fisigik, ap sikhe fisogo inap omanogo senfisigik, nen it mene sige sikhe omanogo wolelenggen isigik uwogoluk weri'lagwi. An Tuhan nenat at a'mageba hilingiri'lago mene andoma faget unggum wogosigin, nen Babel he aren hilingiti lagaikhe higithogo An nen ogo hilingfagain aro.

⁵⁷ An nen he ap pemerintah Babel mene inobaget yabu hilingiri'lagwi mene andoma inom, ap Babel mene inendawinggen wenggelek inap andoma inom, inogogwi ferinarek mene inom, inasikhe fisogo mene inom he lugu-lugwit fisagain. Andiba re it ekhe menlagi'lek mondok mondogat nogokhi logolik logogun o, iluk An nen mondogat igi. An nebe re Raja, Tuhan Nomame Mondok Hokho welagi mene a'nogo.

⁵⁸ O Babel oba pak leget mondok omamerogo waganek mene andoma re An nen meisalogo lakfisamo re kweang inom higirasigin. Kwe ambe palek hokho mene uanhogo wurogo liabek mene andoma re An nen mondogat endu noligin. It afuni andi mene nen yi yabu ti yabu hokhorogo hilingiri'lagwi mene andoma re endu nen nagain andi nen he alomarogo hilingiri'lagwi, iluk An Tuhan Nomame Mondok Hokho mene a'nogo nen nane mondogat igi,” ikhe.

Yeremia nen isikhe mene re Babel mene inoba yagaisasikhe wene.

⁵⁹ Raja Zedekia a'nogo onggwarek ebe faget kagalek nugu mene iluk he at Seraya hun Neria amlogo hun Mahseya omba a'nogo welagaikhe. At Zedekia raja Yehudaba werek kwelek enek tahun enggaminogonek mene were'ma re at Seraya a'nogo Zedekia inom o Babel lagaukwa. Ma re an nen at oba yabu hilingisigin mene iluk ekhe wogoti.

⁶⁰ Babel oba enggin-fenggin asigin mene iluk inom, o kweang andi faget hilingik aple inom he an nen buku yinggilik mene misik ekheba mondogat palogo figi.

⁶¹ A'nogo hilingfigirik an nen at Seraya ba ikhi logolik, ”Hat hebe o Babel mondogat asi lambik he buku ariba lisu palek werek mene oma mondogat afuni andoma werek mene inoba pilingisogo enu salino.

⁶² A'nogo enu salogo yagaisegen halok he samban yi'nogo ino,” Tuhan, neisema Haren ikhi logolik o kota yi re wolelenggenhogo hilingfoumo re, afuni inom, wam yi mene ti mene inom mondogat he legasigin o, nen obalik yoma re mondok-mondok faget o lei pirim se'ma hilingisogo foumo logogin,” isigin a'nogo iluk samban ino.

⁶³ Nen, haren ambi buku ari afuni andoma werek mene inoba mondogat enu salogo yagaisegen halok he buku ariba helep ekhe puget fembik i Efrat agum oba hukhikhi logolik he,

⁶⁴ hane yi'nogo ino, ’Babel oba re yi'nogo nek hilinglasigin. O kweang yi re Tuhan nen enggin-fenggin oba fei wesigin mene andiba re mondogat ubukhogo pumo re ekhe weinam asigin lego,’ ” iluk ikhi logolik hukhano yagati. Nen at Yeremia nen ane isikhe mene elugun warogo re huli yiba.