YEREMIA 5 - Allah Wene Fano Wene Hupla Inane

Afuni Yerusalem mene inaweak faget yagaisasikhe wene

¹ Yago hit Yerusalem mene yi sani, hinawi kota andiba nen ebekhe kwe andoma hineilenggen kogolik lani o! Fanoro kogolik laluk hineilenggen nen fanorogo fut feino. O kota ebekhe kwe andoma nen ap misik ogo ekhe eberogo anggikhi logolik Allahba tiphogo hilingiri'lago mene ekhe werega, lega, iluk hera'no. Nen werek halok he An Tuhan nen o Yerusalem andi weaget fagain lego.

² Iren ikhi logolik nit he Tuhan obaget apne wanhi lago iluk ili'lagwi, oba nen iren a'nogo hilingiti logoligen he fuk.

³ Ibi eberogo nen he Tuhan neisena, Haren it higithogo hilingiti logouwageluk yagaisugu le'ma hangge hilingiri'lagwi. Haren it fut fouwageluk inoati lagen oba nen he iren inobakhe nene hilingiri'lagwi. Haren it lombukhogo hilingiti logouwageluk sebelogo fisikhi lagen, oba nen he iren yanggulninabuak anggili'lagwi lek. It he inendawinggen mondok omamerek logolik inaweak oba nen agam esure inabit mondok werek.

⁴ Arigini'lagwi andiba re an nen anggikhi logolik, ”It andi re afuni yugunat mene yi'nogo ti'nogo hilingisu re mondogat inonggot. Iren he ineisena Tuhan Allah nen wene it inendawimo anggili'lagwi mene inom wene inoba werek mene inom An yaganesuak anggili'lago mene a'nogo futfili'lagwi lek andi nen he, it inobabut kemburogo hilingiri'lagwi andi o.

⁵ Arigini'mo re Tuhan Allah nen wene ikherek mene inom, At amolo anggikherek mene inom andoma re it ap inogogwi kaindek andoma nek he inelu werek enggere an nebe it inoba lambik nane masi layok. A'nogoba nen it mondogat he Tuhan nen yagaisikherek mene faget inabit welagik, nen iren Tuhan ane hologo hilingisu inabit welagik agaregat andi.

⁶ Andiba it inebe re mene singa enggama nen senggelinafik, nen olomene serigala o leimo nen senggel fogat inafik, igin o. No macan tutul he it inawi kota horok-horokwe andoma lagik wagik hilingiti logolik senggelinabigiluk heraginafi logogin, nen afuni wulibi lagu mene omanogo re senggelinafi logogin. Andoma mondogat he iren inaweak hokho pokhorogo hilingik welagik, nen hundik-handik Allah inambot woge'luk welagik, hilingiri'lagwi andiba hilinglasigin andi.

⁷ Tuhan nen ikhi logolik, ”Nenahalok An nen nagainafuri inaweak lek hilingisogo fisagain nogo? Iren he An oboget nealuk allah eberogo lek mene omanogo apne wili'lagwi andi. An nen it inamburu nunggu mene wogisugunem it inoba homorogo ninggi logolik meneat he, iren babi hilingitik, nen uang saburouwogeluk hesangge yanani hilingirik nikharek mene omanogo inambit lagik, hilingiri'lagwi andi.

⁸ It he wam kuda ai mene asei hokho logolik omameba amol-mol elo'lekhogo hilingitunen hilingiterek andi higit werek. Nen it inebe lombogen he inagaila'lak inagagwi faget inendawinggen nili'lagwi.

⁹ A'nogo hilingitu kwelek andoma re An nen inunggulenu ariginik mene andi re unggum wogisigik, iren hilingitu onggo inoba figik, hilingisumo re elo'lek nogo a?

¹⁰ An nen he ap selei mene nen it inangge anggur yabu weagerogo fouwageluk lakfisa wesigin o, oba nen mondogat leget fisoageluk he fuk. E anggur enggi andoma re An mene werek lek andi nen he, An nen ap it inom weim palek mene andoma nen lebegesuageluk inayonggo fagain.

¹¹ Afuni Yehuda mene inom Israel mene inomen he ibi-eberogo nenat An henarogo lalnafa, iluk An Tuhan nane mondogat igi o,” ikhe isikhe.

Tuhan nen he Israel mene filikhogo herakfisagain isikhe wene

¹² Tuhan againafuri nen he Tuhan ebe faget wene eberogo lek mene ili'lagwi. Iren ikhi logolik, ”Ah, Aren he yi'nogo ti'nogo hilingisu lek hak. Nen, nit he enggin mene ninoba asigin lek, weim aleik inom, sumburu ouwak inom andoma re hogoin legat.

¹³ Tuhan nen yagaisano iluk ikherek mene re it nabi inoba werek lek enggere, it andoma re we sogoi higit werek anggani o,” iluk agarek.

¹⁴ A'nogo ugunem Tuhan yi'nogo ti'nogo hilingisu hagenek mene a'nogo nen he an noba ikhi logolik, ”Yeremia, afuni andoma a'nogo ugunem he, wene obabut weak mene iren asigin lek anggogoin mene a'nogoat inoba asi wesigin o. An nen he An nane andi re hat hambelema endu higit hilingfagain. Nen, inunggulenu andoma re e nolhu mene hak hilingfisamo re endu andi nen inebe mondogat nolinabigin o ikhe.

¹⁵ Hit afuni Israel mene yi sani, Tuhan nen he unggulenu misik mene ekhe o yatma nen hit hinoasi wesuageluk lakfei waga. Unggulenu andi re o attagat andoma welagaukwa inap, inane re hit hinonggot mene, nen inebe re mondok inomame werek inap weri'lagwi,

¹⁶ nen ap iren mene sikhe anini inap andoma re inambong mondok si-serogo inelouk pinelouk inap logolik, iren he inendawi isigi'legengge inoatarek inap.

¹⁷ Iren hit hinanggweang oba nen enggen ugu andoma inom, hit hinangge nunggu mene inom legetfuluk he hinagainafuri pinggi inoasugunat. Hinanggo sapi, domba inom he iren warogoinat, hit hinagayo anggur yabu inom, arah yabu inom he iren wolelenggen isogoin. Hit hinaiba leget pa'leget omamerogo waganek mene re iren meisak langgukhogo lakfisogoin.

¹⁸ Tuhan nen ikhi logolik he, ”A'nogo hilingisugun oba nen he andem sambul An nen nagainafuri leget fisagain lego.

¹⁹ Oba nen, iren heinok wokhiikhi logolik, nenahalok Aren a'nogo hilingninabi'logo iluk ugu halok he hat Yeremia nen yi'nogo yagaisano, iren inanggweang oba nen An nobagaluk dewa inunggulenu amu mene inanggeba obaget hilingiti lagaukwa andi hak he, it ogo ap pok o kweang amu meneba werek mene inamingmingengge asimbik logogun o,” ikhe iluk yagaisano isikhe.

Allah nen againafuri futfuluk eberek logouwageluk yagaisasikhe wene

²⁰ Tuhan nen wene yi it afuni Yakub ambisangma mene o Yehudaba werek mene andoma yagaisoageluk mimingnafi logolik yi'nogo ikhe,

²¹ ”Yago, hit ap hinobabut mondok hebelek lek morue mene yoma sani, hinesanggo fanorogo holini o! Hit he hineilenggen werek oba nen he hikhi lagep mondok lek, nen hinesanggo werek oba nen he holhi lagep he legat!

²² An nebere Tuhan, nenahalok hiren An noba hinailo welagep lek nogo? Eberogo nenat he hiren An nobaget hinoak leigeti logou meneba nen o! An nenat i laut huli warek logouwageluk kar waganogo mondok-mondok faget hilingisogo fesigi. I laut agum founalhik, esinggen lenggalhik, hilingiterek oba nen he huli warek mene andi taganhogo lagaikherek mondok lek.

²³ Oba nen hit he hinendawinggen omamerek logolik hundik-handik wene sagalhi lagep. Hiren he taganhogo hilingiti logolik An herak nobagegep.

²⁴ An nen meiso noageluk eroraterek oba andoma ogo, ambisangma palasi lagarek huli ogo halogo figirek. Nen An nenat tahun hundik-hundik andomaba hit nunggu mene faget enggen isuageluk wokhisikhi lagiba nen he hiren An esinet nobagaluk fogetnafu aple faget ebethikhi lagep legat andi o.

²⁵ Ma re, hit hinonggwarek hinaweak oba fano mene a'nogo kwe palfikhi lagepma re hit ninggi'legengge welagep andi o.

²⁶ Yago nagainafuri, hinanggelekwe re ap inobaharo weak mene werek. Aben sue yebetfuluk, kwigin a, lega iluk nenangot hikhi logolik welagaikharek hak, iren ogo hit faget a'nogo hele yebet hinobagaluk nenangot hinafi logolik werego.

²⁷ Ap sue senetarek inaben, sue tarogo wagunem senfuluk kwalagarek a'nogo hak he, it ap andoma nen ogore hit mene hinangge yi mene ti mene omanogo inane nen lalhigik helagaresikhe, inailokwe hopot fakhaluk werek andi. A'nogo hilingfakhaluk he it a'nogo ap inenuwerek mene hilinglagik, inenggi werek mene agik,

²⁸ inebe figilhik, inenggi werekhogo nek welagik agarek andi. It inaniniba hilingirik lagaikharek mene andoma re huli-huli werek mondok lek. Iren he yenggerugwi suarek mene inawene faget katokhogo inili woginafik, nen afuni sebelogo fisagarek mene inangge mene faget ili woginafik, agarek mondok lek.

²⁹ Oba nen An Tuhan nen andoma mondogat he unggum wogisagain. An nen he it inunggulenu ari nen inobabut hilingiri'lagwi mene andoma faget ambisangma hilinginabigin.

³⁰ Mondok fulu polan mene inom inamel-mel mene inom he o kweang yiba ekhe hilinglasigin o.

³¹ Andi re it ap nabi nen he ineranhogo wene igik, nen it imam en he inendawimo nen anggaluk hilingisugun mene nek hilingitik ugunem, hit An nagainafuri nen ogore ariginik mene andoma faget hinagaiyekhogo nek hilingiti lagep. Oba nen he hobuk wurep kobok i wesigin oba re hiren ninggi'nogo mene ekhe hilingisugun nogo?” iluk ikhe o,