YEREMIA 48 - Allah Wene Fano Wene Hupla Inane

O Moab kweang oba nen hilinglasigin mene iluk isikhe wene

¹ At Tuhan Omame Mondok Hokho mene, Israel mene ineisena Allah a'nogo nen Moab faget ikhe mene re yi, ”Afuni o Nebo werek mene inawi kota re arat sinukhogo pikhe andi nen he alomat lakhoak! Kiryataim he aben telagasik he o andiba inalong palogo omamerogo wurik mene omanogo re mondok halik halokhogo hilingfagama re afuni andoma werek mene re inenggali agaikha.

² Moab en wonoget fakhikherek mene a'nogo re mondogat lek aga. Ap selei mene nen he o Hesybon sebeli kwagasik he andoma nen afuni leget fisogoin iluk inane mari'lagwi. Kota Madmen andi re ap tentara nen pin kumo re o andoma ap inane mondogat tiring tereng igin.

³ Holini! Afuni o Horonaim mene re inane hum ngai eti logolik he, ”Ap he legasugun a, o mondogat wolelenggenhogo legasigin a,” iluk ili'lagwi andi.

⁴ Moab he wolelenggenhogo lek aga! Yenggerugwi magendek mene inane kweri'lagwi mene re o Zoar huli andomaba holi'lagwi.

⁵ O Luhit lagali'lagwi kwe andoma nen le arik lagali'lagwi mene andoma inom, o Horonaim pi lagaikharekwe andoma nen weagerinafunem yiyi yeye ili'lagwi mene andoma inom holini!.

⁶ Iren ikhi logolik, ”Hit he hinagap telobagaigen he weak-weakhogo lani! No keledai eil polok mene o leikwe nen lagarek higit lani!” ili'lagwi.

⁷ Hat Moab he hebelek welagen mene inom, henggi werek welagen mene inom, oba hendawinggen himbirik welagen. Oba nen yogondak he hat hebe mabenet hobagagun. Hanggembu Kamos andi inom, hareise inap andoma inom, hat hobaget yabu hilingitarek mene inom he felelenghogo huginabi logoin.

⁸ O kota andoma mondogat he wolelenggenhogo legasigin, misik iluk ekhe linet lasigin lek. Tonggokwe inom, fanggongkwe inom he mondogat legasigin. Iluk An Tuhan nen nane mondogat igi.

⁹ At Moab awi kota-kota omanogo re mondogat legasumo ap misik iluk ogo andoma ekhe logogin lek enggere, at ebe tarogo hela loakhogore ogolabi woge'ni, iluk ikhe.

¹⁰ Ap Tuhan nen yabu hilingisuageluk wogisugunemen furogo hilingiri'lagwi lek mene andoma re homan ugu logouwak. Nen, ap enggarok fangsek logoligen ap waterek lek mene re homan uguat logouwak.

O Moab kota omanogo wolelenggenhogo fogoin isikhe wene

¹¹ Tuhan ane ikhi logolik, ”O attagen engge Moab he aselei mene nen ane yingiti'legengge fanorogo nek werek. Athe hele warogo huginabi lagaikharek oba andoma ekhe waluk lagaikharek lek. At he, i anggur agai elesophogo hinago fuluk i oak amu meneba keralhi'lek were'ma anggur agai a'nogo amben sang-pang eti logolik enduk fano welagarek andi hangge werek.

¹² Oba nen he inenggi ekhe wesigin meneba re An nen Moab he anggur agai kweisalharek hak kweisalisageluk i oak he ling leng isambik halokhogo lakfisoageluk yagaisagain.

¹³ Afuni Israel mene nen Betel oba inendawinggen himbirik welagaukwa mene a'nogo faget inendawimo weak agaikhe hak, Moab he it mene Dewa Kamos andi faget inendawinggen weak asigin.

¹⁴ Ap Moab mene nen ikhi logolik, ”Nit he, weim yaforek ninap, tentara sikhe inenggi puk mene weim oba nen wil wal haluk welago ninabo, iluk he, ninggi'nogo u hak nogo?

¹⁵ Moab inom awi kota sili inom he mondogat wolelenggen isaga, nen aren mene ap souge ebendek mene re mondogat inoata. Iluk An nane mondogat igi. An nebe re Raja, Tuhan Nomame Mondok Hokho mene a'nogo.

¹⁶ Moab oba enggin-fenggin fagain mene andi re arat horogasi waganggere, we eil misik wela'luk wolelenggenhogo feigiluk werek.

¹⁷ Yago, hit hinunggulenu Moab hinom horok-horokwe welagep mene nen at ebe kain lego were'ma hinelu welagep mene a'nogo nen he, at faget fong wati logoni o! Hiren ikhi logolik, ”Moab enu hokho inom, omame werek a'nogo inom, mondogat lek aga o!” iluk ikhi logoni.

¹⁸ Yago, hit afuni Dibon hinap femhogo welagep mene yi sani, hit hinanggweang Moab oba weaget fagain mene a'nogo arat asi waga o. Nen aren he hit hinawi leget omamerogo waganogo kwelabek mene a'nogo mondogat wolelenggen isagain enggere, hit he hinebe hinobalik fanoma hurek welagep oba oma nen pi wesimbik he kweangma wul oba hurek logoni o.

¹⁹ Hit afuni o Aroer welagep mene re kwe esanggoma mendek logolik hineil furati logoni! It ap longgo iluk heise lagu mene andomaba re, ”Ninggi'nogo hilinglagama?” iluk heinok woginafi logoino.

²⁰ A'nogo ugunem iren onggo ikhi logolik, ”Moab he, mondogat ap inenggiba agasik enggali warogo fagama re at obaget le yaginafi logoni o. Hiren i Arnon som werek mene andoma inoba yagaisikhi logolik Moab he eberogo nenat wolelenggenhogo faga o, iluk yagaisilik lano,” ikhe.

²¹ Tuhan nen ikhi logolik, ”Unggum he, o kota lego kwe werek mene, o Holon inom, Yahas, Mefaat inom,

²² o Dibon, Nebo, Bet-Diblataim inom,

²³ o Kiryataim, Bet-Gamul, Bet-Meon inom,

²⁴ o Keriot inom, Bozra inom ebene mondogat pikhe. O Moab oba kota-kota andoma yatkwe mene inom, horokwe mene inom he unggum oba mondogat fikhe.

²⁵ Moab omame werek mene a'nogo re omame leget fikhe, nen along werek mene re wolelenggenhogo legetfikhe. Iluk An Tuhan nen nane mondogat igi,” ikhe.

Moab sebelogo fagain isikhe wene

²⁶ Tuhan nen ikhi logolik, ”Moab he, An neilhanem legetfakhugu nen he, at ebere lugulugwi palik higit hilinglasuago. At ebe re, onggwaregen hebak wurik meneba limbil-lambelengge lagunem afuni nen endo yati logogun.

²⁷ O attak he, Moab en Israel faget he, ap hinaginaferek mene inom ap inangge wanhunem fakfisagarek mene inom higit endo yatik, hinunggul halhigik, hilingiti lagagip lek nogo?

²⁸ Yago, hit afuni Moab mene re, hinawi kota-kota andoma herakfisaluk he, sue pim en awi wusigiluk helep eil pulerekwe wuterek hangge andoma wurogo logoni.

²⁹ Hit he, mondok winik-wonok ikhi lagep! Hiren wonoget fakhigik, hinendawimo leget fakhigik, hinane elabin polok igik, ikhi lagep mene andoma re An mondogat nelu welagi o!

³⁰ An Tuhan nen he, hiren wonoget fakhikhi lagep mene andoma futhinobagakhi lagi o. Hinane we hesanggeat mati lagebo, nen hiren hilingiti lagep mene andoma ambisangma ekhe tibikherek lek.

³¹ Andiba re, An nen hit faget inom, afuni o Kir-Heres hit hinawi eroma andi faget inom, le nane hokhorogo kwi kwerogo yakhinafi logogin o.

³² O kota Sibma andi re e anggur yagoma enggi omolore talogo i Laut Mati were'ma nen o Yaezer huli andomaba hilingik mene hak werek. Oba nen yogondak he enggen hibi lagaguba iterek mene inom, nen anggur enggen inom he mondogat leget faga. Andiba re an nen Sibma faget he le hokhorogo asigin oba nen Yaezer obaget he le we endebat asigin.

³³ O Moab yi mene ti mene muli fanore'ma a'nogo nen inagaiyegen inanggilugetu werek mene omanogo re inane mondogat tereng ikhe. An nen he anggur agai perelhunggeba perelhunem amusu waga logoinogo iluk firitoget figik, aben anggur agai hilingitik, inagaiyegetik, ugu mene ekhe werek lek.

³⁴ Afuni Hesybon mene inom, Eleale inomen le agu mene re o Yahas huli andoma holi'lagwi, nen afuni Zoar mene inom o Horonaim mene inom, Eglat-Selisia mene inom werek huli andoma nen holi'lagwiat. It inagai Nimrim a'nogoba nen obawarek mene omanogo mondogat firok ikhemo re le ari'lagwi.

³⁵ An he, afuni Moab mene nen iren yi mene ti mene fuluk nolhukwe andoma leget figik, nen iren kembu dewa faget wam warogo wogeri'lagwi mene andoma leget figik, igin. Iluk An Tuhan nen nane mondogat igi.

³⁶ Afuni Kir-Heres inangge mondogat inom, o Moab kwe inangge mondogat inom he lek aga. An he it inoba neilenggen logolik nendawimo weak ari'logo. Afuni fong watu logolik pinggong aneba le wuni ikhi logolik kong etarek hak hilingik welagi.

³⁷ It inebe mondogat he inesi hogolhik, inomboro felelengetik, inenggi palhik, inendawinggen warikhi logolik su karung mene labetik ili'lagwi.

³⁸ An nen o Moab he iwak kweang mene inabiren halokhogo herakfisagarek hak hilingisogo figi andi nen he, O tum talekwe nen inom, kweang waganekwe nen inom he le nek agunem holi'lagwi.

³⁹ Moab he mondogat wolelenggenhogo hilinglaga! Moab mondogat enggali aga! Athe ap unggulenu mene at era'lukwe werek mene andoma nen inali'noratik, endo yatik, hilingiri'lagwi andi nen he le ari'lago. Iluk An Tuhan nen nane mondogat igi,” ikhe.

Moab mene ebekhe wulifu kwe werek lek isikhe wene

⁴⁰ Tuhan nen ikhi logolik, ”Sue kuri nen ogolabi langhogo sebeli wagarek hak, unggulenu misik ekhe nen Moab sebeligiluk wesigin.

⁴¹ At awi kota inom, along palogo leget omamerogo waganek mene omanogo inom he aben hugul kugun, at agoromi tentara mene re hemi ineagwi takhouwogeluk hilingitarek hak inailo nen hilingiti logogun.

⁴² Moab he, An nelokhoma nen winik wonok ugu nen he, mondogat wololenggenhogo legasumo, it inunggulenu salogo werek mene andi re legasigin.

⁴³ It inoba re, kweang habulik meneba inom, sabna lego meneba nen inom, sikhenggela abologen inom, inafekwe sagal pagal isili'lagwi.

⁴⁴ Ap sikhenggela abologen heise logoin mene re kweang habuli'mo pugun, nen kweang habuli'mo andi nen wulibugun mene re sabnaba ke'nok ugun. Andoma mondogat he An nen Moab wolelenggenhogo fagain iluk hilingfigi sambul andiba hilinglasigin.

⁴⁵ Ap heise o ekhema lambik logogun iluk logoin mene re it inomame mondogat legasumo inagap telinabuageluk o Hesybon logoin, oba nen he o kota andi re endu nunggunem logoin, nen ap raja Sihon ebe were'ma a'nogo ogo re endu nen ninggi logoginat. Nen o kweang huli-hulimo werek mene andoma inom, o Moab oba tomkwe werek inap weim yafu inamolo mene omanogo ogore endu andi nen mondogat nagain.

⁴⁶ Moab hat he, mondogat alomat lagen o! Afuni Dewa Kamos apne wanharek mene re mondogat lek agaikha, nen it inagainafuri re hele warogo woginarek lagaikha.

⁴⁷ Oba nen hobugen he An nen o Moab kweang oba andoma halogo fisagain o. Iluk An Tuhan nen nane mondogat igi!” ikhe. At Tuhan nen Moab oba hilingfagain mene re a'nogo andi.