YEREMIA 45 - Allah Wene Fano Wene Hupla Inane

Allah nen Barukh oba wene waretikhe wene

¹ Hun Yosia amlogo Yoyakim a'nogo Yehuda ba melalinafu were'ma nen enek he tahun enggaminogonek meneba were'ma, at Barukh en he an nen naneba yagatu kwelek lisu palhikhe. Andi nen he, an nen at oba wene

² Tuhan Allah Israel mene ineisena a'nogo nen ikhe mene faget yagatigi. Tuhan nen ikhi logolik, ”Barukh,

³ haren he yi'nogo limamit falhi lagen ikhe, ’An yi re alomat lasigiluk welagi o! An nen enggin fenggin hokhorogo hugu were'ma re, Tuhan nen an noba ou ekhe inom to'mot fili'lago. An nen limamit falhu mondok were'ma nen enek he nobalele mondok agunem he, an noba hambukhogo logou mene ekhe werek lego,’ ikhi lagen.

⁴ Barukh ahwi! An Tuhan nen wutirek mene andoma re An nenat molulukhogo lakfisigirego, nen, An nen yatirek mene andoma re An nenat henetirego. O kweangma mondogat he An nen a'nogo nek hilingiti lagi.

⁵ Nenahalok halok hat honggwaregen wene engginhogo hoba asu hak mene herarik laga lagen nogo? A'nogo hilingitu lego, Barukh nagailak! Afuni mondogat he An nen enggin mene inoba fagain, oba nen he hat enek he hagap telogo hobagaumo hebe heluk logogin o. Hat hebe yikwe tikwe lagunem he, An nen fetharek mondok logogin. Iluk An Tuhan nen nane mondogat igi o,” iluk ikhe yagati.