YEREMIA 44 - Allah Wene Fano Wene Hupla Inane

Tuhan nen afuni Israel mene o Mesir werek mene yagaisoageluk isikhe wene

¹ Tuhan nen an noba afuni Israel mene inebe mondogat o Mesir werek mene yagaisoageluk ikhe mene andi re, o kota Migdol inom, Tahpanhhes inom, Memfis inom, daerah selatan fikhit werek mene faget yaganete.

² At Tuhan Omame Mondok Hokho mene, Israel mene ineisena Allah a'nogo nen it faget ikhe mene re yi, ”An nen afuni Yerusalem mene inom Yehuda ba nen o kota-kota amukwe omanogo inom oba enggin mene lakfei wagi aple andi re hiren ogo hineilenggen enek hegebat. Yogondak huli nen ogo o kota andoma mondok wolelenggen tagalogo hilingi'mo re afuni welagaikharek legat.

³ Andi re afuni andoma werek mene nen weak mondok hilingitunem An na'mage kwelafi lagaukwaba wene andi hilinglaga. Iren he wam warogo figik, dewa iren ogo nen it inombawi nen ogo, hiren ogo, obaget hilingitu aple hinonggot mene a'nogo obaget hilingiti lagaikha.

⁴ An nen he, hit hinoba hundik-handik ap An namingmingengge nabi omanogo inayonggo fuluk lakfisa wagunem, iren hit hinaniniba mondok hilingiti lagep mene An nabit anggigirek mene andoma a'nogo hilingitu lego, iluk yagahisikhi lagaukwa.

⁵ Oba nen hiren he inane holhik, futfigik, ikhi lagagip lek. Hiren he weak hilingisugun mene omanogo nek palfigi'lek hilingitik, wam warogo dewa obaget wogotik, hilingitu mondok welagep.

⁶ Andiba re, An na'mage a'nogo o kota Yehuda ba inom o Yerusalem oba ebekhe kwe andoma inom inoba figi andi. Andoma mondogat he An nen endu nolhimo re, mondogat endu hali nonggo nek kabok lagagunem yogondak hiren ogo hineil hikhi lagep aro.

⁷ Nen, yogondak he An Tuhan Nomame Mondok Hokho mene, Allah Israel mene ineisena a'nogo nen hit heinok wokhisak. Nenahalok hit hinonggwaregen mondok hokhorogo alomarogo fakha hak mene andi hilingiti lagep? Hiren he, ap hit hinunggulenu ari mene inom, hemi inom, yenggerugwi inom, omalik fou inom mondogat legethinobagalik lagunem, hit hinunggulenu ari mene ekhe logogun lek iluk hilingiti lageba?

⁸ Nenahalok hiren he, An na'mage lagau hak mene andoma nek hilingiti lagep nogo? Hit wagagip he, o Mesir hinonggotma omanogo logolik, hiren kembu wutik, o kweang andiba kembu dewa omanogoba yi mene ti mene fuluk wogotik, hilingiti lagep andi! Hiren he hinonggwaregen weagerogo fakhikhi lagep oba it afuni inunggulenu ekhe mene ekhe mene kweangma yoma werek mene mondogaren li'not hinafi logolik, hit hinenu re, ap homan fisagarek mene ikhi logouwageluk hilingiti lageba?

⁹ O Yehuda kweang oba nen inom, o Yerusalem ebekhe kwe nen inom hit hinombawi lagen inom, raja Yehuda mene inagagwi nen inom, hit hinagagwi nen inom, hina'mageba hilingiti lagagip omanogo re, hinonggot ageba?

¹⁰ A'nogo hilingiti lagagip oba nen, yogondak yi huli nen enggere hit hinendawinggen sebelfakhikhi lagep lek. Hiren he, An esinet nobagaluk legeisogo nobagagik, nen Nawene melalek hit hinoba inom, it hinombawi inoba inom, wogisasigi mene a'nogo higithogo hilingiti lagep legat.

¹¹ Andiba re, An Tuhan Nomame Mondok Hokho mene, Israel mene ineisena Allah a'nogo nen he hit eil hinabimbik he, Yehuda mene mondogat alperelogo fisagain o.

¹² Nen, afuni Yehuda mene fena ineluk werek mene nen o Mesir andoma femhogo logogun anggili'lagwi mene re o andoma nen inebe mondogat legasugun. It inebe mondogat yenggerugwi inom, inaluendek inom he sumburu ouwagen inom, weim oba nen inom, wa'lasugun. Nen afuni homan fisouwogeluk he it inenu igisogo fisikhi logogun.

¹³ An nen o Yerusalem unggum wogetigi hakhogo re, o Mesir logogun mene ogo unggum wogisagainat. It he weim en inom, sumburu ouwagen inom, ou amben weak mene nen inom wa'lasugun.

¹⁴ Afuni Yehuda mene fena ineluk werek mene o Mesir logogun iluk lagaikha mene andoma re ap misik iluk ogo ekhe linet lasimbik eluk logogin mondok lek. It mene nen ap misik ogo ekhe sugulogo Yehuda ba lelo e, iluk anggogoin oba nen he, ekhe wesugun legat. Eberogo ekhe wesugun lek, meneba nen he it ekhe miren mene hakhogo ekhema higilogo lagaikha mene andoma nek he inambotkwe sugulogo wesugun o,” ikhe.

¹⁵ A'nogo ikhemo re afuni hokhorogo an nambit wagaikha, it andoma re ap inagagwi nen kembu dewa obaget yi mene ti mene wogotarek inelu mene inom, it hemi andoma andogosi wagaukwa mene inebe mondogat inom, afuni Israel mene o Patros Mesir abel selatan fikhit andoma welagaukwa mene inom wagaukwa. Wagaukwasik he, iren an noba ikhi logolik:

¹⁶ ”Nit he haren Tuhan enu igisogo nit yaganisikhi lagen mene andoma ninesanggo holugun lego.

¹⁷ Niren wene wato mene andoma re ekhe inom hilingiti logogun aro. Niren he ninagaisa Ratu Surga andi obaget wam warogo figik, nen o kota Yehuda ba oma nen inom, o Yerusalem kwe bene omanogo nen inom, nit ninombawi nen ogo, raja-raja lagen ogo, ap pemerintah ba yabu legoma hilingitarek inaben ogo, nit ninonggwaregen ogo ninetokhogo ninagaisa andiba anggur agai hilingisogo obaget fikhi lagagu hagat, hilingiti logogun o. A'nogo hilingiti lagagu sambul andem he, nit he yi mene ti mene ninenggim sikhogo nek logolik ninamburu werekhogo nek mondok welagagu, nen niren enggen mene ekhe hikhi lagagu lek.

¹⁸ Oba nen niren Ratu Surga andi obaget fikhi lago mene a'nogo palfigik, nen anggur at obaget fuluk wogeti lago mene a'nogo herak figik, iluk welagoba aremnogo re, nit ninangge yi mene ti mene mondogat ninelagaikhogo nek welagik, nen ap nit mene re weim oba nen inom, sumburu ouwagen inom wa'lagik, hilingiri'lagwi o,” iluk andi aga.

¹⁹ Andi nen it hemi andoma nen ikhi logolik, ”Nit ninaguni nen he, niren roti he Ratu Surga andi alik waganogo weratik, obaget warogo nolhik, dewa andi faget anggur fisigik, hilingiti logouwageluk yaganisagama hilingiti lago o,” iluk aga.

²⁰ Ap inom, hemi inomen, wene onggo a'nogo aga mene andomaba an nen ikhi logolik,

²¹ ”O kota Yehuda bene inom, Yerusalem kwe bene inom, it inombawi nen ogo, inogogwi raja nen ogo, hit hinombawi yabu legoma hilingitarek mene nen ogo, afuni o yoma mene nen ogo, hiren ogo, yi mene ti mene kembu obaget fuluk, wogeti lagep mene omanogo re, Tuhan he onggot logolik eberek werek lek iluk ikhi lageba?

^22-23 Hiren tugwi kembu obaget yi mene ti mene fuluk wogoti lagep mene andoma re Tuhan nen kwelakhinarek logou re abit mondok hisili'lago, hiren hilingiti lagep mene andoma re, mondok hineloukhogo hinali'norek mene nek hilingiti lagep. Hiren he, Aren yi'nogo hilingi'no ti'nogo hilingi'no iluk yagahisikhe mene omanogo hologo hilingitep lek andiba re Tuhan oba weak hilingiti lagep. Ma re, yogondak ari hit hinanggweang mondogat weaget fisikhemo re afuni ekhe logou re elo'lek ari o, nen aben homan fisouwogeluk he o andi enu igisogo agarek. Nen, ap ineilenggen hagarek mene nen he, inamelmel inaferek,” iluk yagaisigi.

^24-25 A'nogo igirik he an nen afuni andoma werek mene inoba yagaisikhi logolik, nen ebe tukumhogore it hemi omanogo inoba Tuhan Omame Mondok Hokho mene a'nogo nen he, afuni Yehuda mene o Mesir welagaikharek mene inoba re yi'nogo ikhe, ”Hit inom, hit hinagagwi inomen he, he Ratu Surga a'nogoba wam warogo noletik, anggur obaget fuluk wogetik, hilingiti logogun iluk hinane hombuk palhigip. Nen, hiren wene isigip mene a'nogo tiphogo nek hilingiti lagep. Enggere, andi re fano! Hiren hilingisugun iluk wene isigip mene andoma hilingitu mondok logoino o!

²⁶ Andi faget he yogondak An nen hit afuni Israel mene o Mesir welagep mene hinoba ikhi lagi yi holini o: An Tuhan Nenupogot nonggwarek nenu igisogo hombuk palhi lagi enggere, hiren amu mene hinom wene wasuogeluk An nenu uluk wene wati logogun mondok lego. Hiren wene wati logolik, ’An he Allah eluk mondok welagarek mene enuba ikhi lagi,’ iluk ikhi logogun legaro.

²⁷ An nen he hit hinebeba alomat fakhigik, weakhogo logouwageluk hilinghinobagagik umore hilingik werek kwelek enek he weim en ogo, ou amben weak mene nen ogo, hinebe mondogat leget hinobagauwageluk hilinghinobagagin o.

²⁸ We, ap inebe wenagaisogo miren mene hakhogo nek he, linet lasimbik sugulogo o Mesir en Yehuda ba andoma logoin. Andiba re, ap Yehuda mene o Mesir logogun mene nen he, iren inane aga mene andi higit asigin a? Athe an nen igi mene higit asigin a? Iluk inelu asugun o.

²⁹ An nen hit hinoba unggum wokhisagain iluk wenggelogo figi mene andi eberogo asuageluk he, An nen hit hinoba alomat lagu mene o yoma lakfei wesigin.

³⁰ An nen at Zedekia raja Yehuda mene a'nogo at aselei mene Nebukadnezar raja Babel mene nen wasigin iluk anggikhi lagaikhe mene a'nogo enggiba fesigi hak, hun Hofra raja Mesir mene andi ogore An nen at aselei mene nen wasugun iluk hilingiri'lagwi mene andoma inenggiba fagain ikhe o,” iluk yagaisigi.