YEREMIA 43 - Allah Wene Fano Wene Hupla Inane

Yeremia waluk o Mesir lagaukwa wene

¹ Tuhan Allah Israel mene ineisena a'nogo nen wene afuni inoba yagaisano iluk ikhe mene an nen mondogat yagaisigi.

² A'nogo yagaisigimo nen at Azarya hun Hosaya amlogo a'nogo inom, Honan hun Kareya amlogo a'nogo inom, nen ap amu mene mondok winik-wonok agarek mene omanogo inomen an noba ikhi logolik, ”Hat he heranhogo wene ikhi lagen o. Nit nineisena Tuhan Allah nen he o Mesir laluk andoma logou fuk, iluk ili ikhe lek oba nen ikhi lagen.

³ Hat he hun Neria amlogo Barukh andi nen hendawimo kagalhemo nit ninebe ap Babel mene nen sebelninarek welagik, ninoatik, athe o Babel felelenghogo wo'ninarek lagik, uak anggikhi logolik wene nit ninom eilsek aple andoma ikhi lagen o,” iluk aga.

⁴ At Yohanan ogo nen it ap perwira omanogo nen ogore Tuhan ane ikhe mene a'nogo higithogo o Yerusalem werek aplere inabirat welagaukwa.

⁵ At Yohanan inom ap perwira omanogo inomen he afuni o Yehuda ba werek mene inom, nen o amukwe nalek-falek isukwasigen nekhengge wagaukwasik welagaukwa mene omanogo inom he o Mesir woginarek logoin aga.

⁶ Iren he ap inom, hemi inom, yenggerugwi inom, raja a'logomi hun Nebuzaradan nen hun Gedalya nen halinafi logouwageluk wogetikhe mene omanogo inom an inom Barukh inom mondogat wo'ninarek o Mesir lagaikha.

⁷ Iren he Tuhan ane sagal fuluk o Mesir lagaikhasik he o kota Tahpanhes huli andoma asi lagaikha.

⁸ Andoma nen he Tuhan ane an noba ikhi logolik,

⁹ ”Haren he helep hokho mene nek wanimbik he o pemerintah e andi mene inawi kota andiba kwe kwi lagaikharek oba andoma kweangma salfein o. Hat a'nogo hilingitunem andi re ap Yehuda mene nen ineilenggen heoakhogo hilingi'no.

¹⁰ Andi nen it inoba re, An Tuhan Nomame Mondok Hokho welagi mene Allah Israel mene ineisena a'nogo nen he An namingmingengge Nebukadnezar raja Babel mene a'nogo o andoma lakfei wesigin. Ma re haren helep salhen mene andem amboloba re aren kemah kerajaan a'nogo wut fei wesimbik he at ebe hurek logogin oba ogo wusiginat.

¹¹ Nebukadnezar ebe wesimbik he, o Mesir mabenet fei wesigin. Nen, afuni ou amben weak mene nen wa'lasuageluk enogo werek mene re ou amben weak meneba nen wa'lasugun. Nen, it hele warogo woginarek logoin iluk enogo werek mene re hele warinarek logoin, nen it weim ambisangma nen wa'lasugun iluk enogo werek mene re weim oba nenat wa'lasugun.

¹² An nen he, it Mesir inaben tugwi kembu helep elekwe inawi wurik mene andoma bene endu fisagaisogo kwelabik lagain, nen raja Babel mene nen he kembu agut hilinghigik helep a'makwe werek omanogo nolhik, athe at aiba anggweangma omanogo helaluk lagik igin. Ap wam domba konharek mene nen asubene pisang lelherek hak, at raja Babel mene nen o Mesir mene felelenghogo lakfisambik he, nekhengge aiba lageluk lagunem afuni nen ekhe anggwe palu re elo'lek asigin.

¹³ Kembu wurik o Heliopolis Mesir oba andoma werek mene re wolelenggenhogo legetfisagain, nen Mesir mene nen dewa apne wanharekwe andoma re endu nen mondogat nolugun o,” iluk yaganete.