YEREMIA 42 - Allah Wene Fano Wene Hupla Inane

Afuni nen he Yeremia ba ninobaget samban in iluk isukwa wene

¹ A'nogo hilinglagaikhemo re afuni mondogat he, yenggerugwi mene inom, inaluendek mene inom, ap sikhe fisogo mene inogogwi perwira inom, at Yohanan hun Kareah amlogo a'nogo inom, Azarya hun Hosaya amlogo a'nogo inom,

² an nambit wagaukwasik inane ikhi logolik, ”Nineisena haren heilenggen nisikhi lagen hakhogo re nit attak he ninebe hokhorogo welagagu, nen yogondak he ninebe endebengge nek welago. Ma re nit ninobaget nineisena haren heisena Tuhan Allah fogerati lagen mene andiba samban inogen iluk kino yagaheti lago o. Nit ninebe we endebat agosik welago mene ya ninobaget samban i'ninobagagain o,

³ samban i'ninobagaumo re, Tuhan Allah nen he kwe koma kwe logoin, nen niren ninggi'nogo hilingisugun iluk yaganisoakhogo,” iluk yaganeta.

⁴ A'nogo agama an nen onggo ikhi logolik, ”Ariginik halok he fano egebo, hiren kino yaganetep mene andi an arat wanhi o. An nen he nit nineisena Tuhan Allah a'nogoba samban igin, nen Aren onggo yi'nogo iluk yaganetu halok he an nen mondogat yagahisagain o, we misikhogoluk ekhe an nen hinasigin lek!” iluk yagaisigi.

^5-6 A'nogo igi'mo nen iren an noba ikhi logolik, ”Haren he nit nineisena Tuhan Allah a'nogoba samban in, nit ninebe fanorogo logogun nen he niren At ane hologo nek hilingiti logogun o. Enggere Aren onggo weak mene igin halok ogo nen fano mene igin halok ogo nit At ane igin mene andi higithogo hilingisugun enego. Niren ambi nineisena hat hebene nen Tuhan awene melalek wokhesigin mene andoma hilingisugun a, lega andi re, we Tuhan At eberogo nek igik, tiphogo nek hilingitik, ikherek mene andi nen eilenggen nisikhi logouwago,” iluk yaganeta.

Yeremia nen samban isikhemo Tuhan nen onggo yagatikhe wene

⁷ A'nogo isukwama ninenggi nomolo nen welagagusik, Tuhan ane an noba ikhe.

⁸ Andiba re an nen at Yohanan inom agoromi perwira inom, nen ap fena amu mene at inom wagaukwa mene omanogo inom wesuageluk wolinafi.

⁹ Wolinafimo wagaikhama re an nen yagaisikhi logolik, ”Hiren an noba kino yaganeti logolik An nen Tuhan Allah Israel mene ineisena andiba yagasuageluk yaganetep a'nogo re, Tuhan nen yi'nogo ikhe o,

¹⁰ ”Hiren ambi o kweang yiba femhogo logogun halok he wene hit hinoba hilinglari'lago mene andoma faget An nen nendawinggen warikhi lagi hilingi'mo re, An nen hit sebelogo hinobagakhi logogin lego oba nen legeisogo hinobagakhi logogin. Nen An nen hit pelakhinobagakhi logogin lek oba nen he menegaisogo hinobagakhi logogin o.

¹¹ Hiren raja Babel mene andiba hinailoti logou fugo. An nen he at omameba nen hit lebethisigik, fikhalogo hinobagagik hilingiti logogiluk he hit hinanggele'ma andoma logogin o.

¹² An nen hit hinoba nendawit hinafi lagimo re An nen he raja Babel mene andi nen hit hinelagaik hisaluk endawit hinabimbik, hinaiba lani o, iluk yagahisoageluk hilingisigin o. Iluk An Tuhan nen nane mondogat igi o ikhe,” iluk yagaisigi.

^13-15 Oba nen he hit o Yehuda ba welagep mene oma nen he hineisena Tuhan Allah ba nen hinot amukwe kwani-kwani laga logolik, ”Nit he o kweang yiba logou re ninabiro. Nit he o Mesir Kweang oba andoma lambik logogun. Andoma nen he nit weim yafik, weim yabuogeluk trompet ane futhigik, nen sumburu ouwak weak higik, ikhi logogun lego iluk hinane u fugo. Hiren ambi hinonggwaregen ninghogo o Mesir laluk andoma logogun iluk hilingisugun halok he, At Tuhan Omame Mondok Hokho mene, Allah Israel mene ineisena a'nogo nen hit hinoba yagaisano ikhe mene re yi:

¹⁶ ’Hiren weim awene inom, sumburu ouwak faget inom, hinailoti lagep mene andi re mukhinarek he o Mesir oba andoma wesigin aro, nen hit hinebe re o kweang andiba nen wa'lasugun.

¹⁷ Nen afuni inebe mondogat o Mesir laluk andoma logogun iluk hilingiti logogun mene re weim oba nen hea, athe sumburu ouwagen hea, athe ou amben weak mene nen hea, An nen lakfei wesigin mene andiba nen inebe mondogat wa'lasugun.

¹⁸ An Tuhan, afuni Israel mene ineisena Allah a'nogo nen na'mage lagagunem, nanini hokho mene aga lagaikhe mene a'nogoba afuni Yerusalem mene inoba fesigi hak, hit o Mesir logoin mene hinoba ogore An nen andi higirat hinoba fagain o. Afuni nen inamel-melhogo nek kwelakhisikhi logogun. Hit he litnot hinobagakhi logolik, hinenu re afuni homan ikfisagarek mene iluk salogo yagahisikhi logogun. Hit he hinanggweang hinamep pisikheba yoma ekhe hogoin lek ikhe o,’ iluk yagaisigi.

¹⁹ Andi nen an nen nane ekhe ikhi logolik, ’Tuhan nen hit yagahisikhi logolik he hit fena o Yerusalem hineluk welagep mene oma re o Mesir la fugo,’ ikhe. Andiba re an nen yogondak hit wenggeluageluk

²⁰ hineluet fikhi lagi yi o, nen hiren wene hokho mene kwanirek awene misik ekhe hilingitep. Hiren an noba kino yaganeti logolik, nit nineisena Tuhan Allah a'nogoba hit hinobaget samban uageluk yaganetep, nen hiren wene wati logolik, Tuhan nen ane igin mene andoma niren higithogo hilingisugun enego iluk egep.

²¹ Nen yogondak he an nen nit nineisena Tuhan Allah a'nogo ane ikhe mene mondogat yagahisigi, oba nen hit he wene yagahisigi mene a'nogo higithogo hilingiti logou hinabit mondok welagep.

²² Andiba re, futfeni o! O kweang hiren femhogo logogun nen logoin anggikhi lagep oba andi nen he, hit hinebe weim oba nen hea, sumburu ouwagen hea, athe ou amben weak mene nen hea, mondogat wa'lasugun o,” iluk yagaisigi.