YEREMIA 41 - Allah Wene Fano Wene Hupla Inane

¹ Tahun andi tugi sabit meneba werek kwelek at Ismael hun Netanya amlogo hun Elisama omba a'nogore ap nomolo nen mene inom mangorogo re hun Gedalya ambit o Mizpa lagaukwa. (Ismael ebere ap raja inambisangma mene ap sikhe fisogo inap inoe welagaikhe agun.) Lagaukwama re, it inebe seberogo sumburu ninggi logolik he,

² at Ismael inom ap inebe nomolo nen aremnogo inomen he it inenggarok lilisa re hun Gedalya at gubernur logouwageluk ap Babel mene nen menfesukwa mene a'nogo watfesukwa.

³ At Ismael en ap Yehuda mene hun Gedalya inom welagaukwa mene ogo mondogat inoati logolik he, it ap tentara Babel mene oba nen wagaukwasik andoma welagaukwa mene ogo inebe mondogat inoatukwaat.

⁴ Inenggi ekhe ombo'ne meneba re at Gedalya wata mene a'nogo afuni nen inelu agi'lek werek kwelek he,

⁵ ap inebe delapan puluh nen engge o Sikhem inom, Silo inom, Samaria inom oba mene wagaukwa. Iren he, inomborosi palhik inasu tilip-talaphogo lakfigik, inagap paligik, hilingitukwasik waga logolik, iren gandum inom, kemenyan amben fanongge Tuhan Awi wuri'mo fogoin nen iluk waluk wagaukwa.

⁶ A'nogo hilingitukwama re, at Ismael a'nogo o Mizpa nen wulibi lagaikhesik it inelokhoma lagaikhe. Lagaikhesik he le aga logolik, ”Gedalya a'nogo hineilenggen hobagaigen we'ni o,” iluk yagaisasikhemo re,

^7-8 it a'nogo weak-weak o kota tulem omanogo asi lagaukwasik he, at Ismael inom agaila'lak omanogo inomen he, it omanogo pinggi inoatukwa. Oba nen, it inanggele'ma inebe nomolo nen mene re hun Ismael oba yagati logolik, ”Haren nit ninoatu lego! Nit he ninangge gandum ogo zaitun ogo, kin amusu ogore pirethigik fisogo welago. Andi nen mondogat andoma re, niren o kota endakwe fikhit hinakfogongge werego,” iluk yagatukwa. Andi yagatukwama at Ismael en it omanogo inoati'lek herakfisikhi logolik, it ekhe amu mene omanogo nek he inoatikhesik inebe warek he pogolema pelakfisa lagaikhe.

⁹ Pogole andi re, ele hokho mene hun raja Asa nen he, raja Israel mene Baesa a'nogo nen weim sineli kwi wagu nen habulhikhe meneba pelaginabi lagaikhe.

¹⁰ Andi nen at Ismael en he raja a'logomi omanogo inom ap o Mizpa werek mene Nebuzaradan nen he Gedalya nen halinafi logouwageluk wogetikhe mene omanogo inom fakfisasikhesik he at Ismael en hele warogo lirinarek he o wilayah Amon fikhit andoma lagaikhe.

¹¹ At Yohanan hun Kareah amlogo a'nogo inom ap sikhe fisogo mene inogogwi at inom werek mene andoma inomen holhugunem en he at Ismael a'mageba hilingitikhe mene a'nogo holhukwa.

¹² Andiba re, it inagoromi inom at Ismael murok lagaukwasik he, at ebe i mogo hokho mene enu Gibeon mogoma era'lu andem lagunem fakha lagaukwa.

¹³ A'nogo lagunem he at Ismael en hele warinarek laga lagaikhe mene omanogo nen ineilenggen isasukwasik he, it inagaiyek agaikhe,

¹⁴ ma re it a'nogo sugulogo heise at Yohanan inom esa logalogo weri'lagwi fikhit a'nogo inoba sebesi lagaukwa.

¹⁵ Oba nen at Ismael inom agoromi inebe siregen aremnogo inom he longgo isukwasik heise re o Amon kweang oba andoma lagaukwa.

¹⁶ A'nogo hilingitukwama it Yohanan inom ap sikhe fisogo mene omanogo inomen he, ap sikhe fisogo inap inom hemi inom, yenggerugwi magendek mene inom, nen ap raja were'ma yabu hilingitarek inap at Ismael en Gedalya watfuluk hele warinapluk laga lagaikhe mene omanogo inom, andogorogo fisasukwa.

^17-18 It mondogat he, at Ismael en Gedalya watikhe mene a'nogo faget he, ap Babel mene inoba inailo agaikhe. Andi re, at Gedalya ebe re, o kweang andi faget gubernur logouwageluk raja Babel mene nen menfesikhe andiba hilingitukwa. Andiba re, it omanogo heise re, o Mesir lagaukwa. Laga logolik, ebekhe tulem andoma nen he, it o Kimham o Betlehem horokhogo andoma kamo i lagaukwa.