YEREMIA 4 - Allah Wene Fano Wene Hupla Inane

Inobabut hebeluageluk wolinaferek wene

¹ Tuhan nen ikhi logolik, ”Afuni Israel mene yi sani, hiren hinambotkwe sugulogo wesugun hinamolo welagep halok he An nambit sugulogo we'ni o. Hiren hinandugwi kembu An nen nabit higirek mene andoma tak hugisaluk he An noba tiphogo hilingiti logoino o.

² Hiren a'nogo hilingiti logogun iluk An nenuba hombuk palimbik, hineluk higithogo welagik, katokhogo hilingitik, eberogo mene nek hilingitik, hilingiti logogun halok he yi afuni ti afuni inunggulenu lombogen he An nen it fanoabet fisoageluk kino yaganeti logogun o, nen iren he An foget nobagakhi logogun aro,” Iluk ikhe isikhe.

³ Tuhan nen afuni Yerusalem werek mene inom Yehuda werek mene inom inoba yagaisikhi logolik he, ”Hiren awingge feik foluogeluk halok he yabu panggi aikwe andoma feik folhi logou fugo, Hinanggweang anuetkwe andoma yabu helikhi logoni o.

⁴ Hit An hineisena Tuhan ninom wene wat-wat agagu mene a'nogo pukhogo fisogo logoni o, nen hit afuni Yehuda mene inom Yerusalem mene inom he hinebe An nobaget enogo fakhaluk logoni o. A'nogo hilingiti logogun lek halok he An nanini endu wabunak ninggerek higit hilingi'mo, ap sa nen ogo nagulu mondok elo'lek a'nogo higit hinoba lakfei wesigin o. Mondogat andoma re hiren hina'mageba nek hilingiti logolik weak mondok hilingiti lagep andiba re enggin mene hinoba asi wesigin andi,” iluk ikhe isikhe.

Yehuda mene inoba pin kwi wesuogeluk ili'lagwi iluk isukwa wene

⁵ O kweang mondogat andoma bene trompet ane futhani! Hinane hokhorogo kwe'ni. Afuni Yehuda mene inom Yerusalem mene inom he, weak-weakhogo o kota agap telogo helep leget omamerogo waganek oba omanogo loageluk yagaisani,

⁶ An Tuhan nen enggin hokho mene weagerinabigiluk abel utara fikhit andoma nen lakfisa wesigin enggere. ebekwe Tuhan andom Sion oba lagaikharekwe yagaisani o, Hinafe morogo were'lek weak-weakhogo lani.

⁷ Mene singga hou salek oba nen wulibi wagarek hak, it afuni inunggulenu lombok weaget inafarek inap a'nogo it Yehuda mene leget fisogoin iluk arat wulibi wagaikhasik weri'lagwi. O kota-kota it Yehuda nen mene andoma re mondogat sinukhogo lobaget fisamo afuni werek lek oba asigin.

⁸ Nen At Tuhan a'mage it Yehuda mene inoba fili'lago mene a'nogo oan legari'lago lek enggere, wene andi faget hit he, le agik, fong watik, ikhi logoni. Fong warogo welago iluk enegenggere hinasu karung mene puge'ni.

⁹ Tuhan nen ikhi logolik, ”Linggene andi sambul he it ap raja-raja inom, afuni yabu legoma hilingitarek mene inom he, inendawinggen weak asigin, nen imam mene re inoak elekwe leigesugun, nen it nabi re youk logoin o,” iluk ikhe o, isikhe.

¹⁰ A'nogo ikhemo an nen ikhi logolik, ”Tuhan Lego Mondok welagen mene neisena, Haren he afuni Yehuda mene inom, Yerusalem mene inom heranhogo wene yagaisegen o! Haren ikhi logolik hinendawinggen serogo nek logogun isigin oba nen, yogondak he nit ninebe karok enggat oba asuogeluk welago andiri! neisena,” iluk yagati.

¹¹ Inenggi ekhe higit asi wesigin oba afuni Yehuda mene inom Yerusalem mene inom inoba yagaisikhi logolik sogoi aganhan mene o leikwe nen hit hinebikhit funha wesigin, iluk ugun oba arat horogasi waga o. O sogoi andi ebere sogoi weba funhugunem alalengge funhogo waluk lagarek mene andi hak he fuk,

¹² athe sogoi omame mondok hokho mene Tuhan nen againafuri inoba unggum fisoageluk mimingitemo weri'logo.

Selei mene nen Yehuda mene hukhogo kwelaginafukwa wene

¹³ Yethani, ninaselei mene re ohena hakhogo weinam agaikha a'li. It inangge kereta weim yabuogeluk lagunem he sogoi sielu nen hilingiterek hangge, nen inangge kuda ba lagunem he sue ikwesahop he aninurogo tarogo lagarek oba nen mondok furungwarogo lagarek. Ariginik hilingi'mo re, eigei, nit he alomat ninabugun higi! Nit leget ninabuogeluk werego!

¹⁴ Yerusalem, hat hagap telhabuakhogore hendawimo weak welagen mene ari horogo wulakfisan o. Ki huli nen hat hendawimo wene weak mene wenggelhu welagen mene andi fisogo logogin nogo?

¹⁵ O kota Dan oba nen inom punu Efraim oba nen inom ap yonggo wene weak mene waluk wagaikha o.

¹⁶ Iren he yi afuni ti afuni inunggulenu lombok omanogo eberisigik, afuni Yerusalem mene ineluet fisigik ikhi logolik he, selei mene o kweang yatma andoma werek mene weri'lagwi o, iluk i wagaikha. Iren he o Yehuda ba kota-kota werek mene andoma weim kwikhi logolik abologet houwogeluk werek,

¹⁷ nen o Yerusalem he ap yabu yagoma kagalek werek higit maserogo kwelabuogeluk werek. Andoma mondogat hilinglasigin andi re it inunggulenu Yehuda mene nen Tuhan ane sagalfuluk hilingiti lagaikha andiba hilinglasigin o. Iluk Tuhan ane mondogat ikhe.

¹⁸ Yehuda ahwi, hat honggwaregenat enggin hokho mene andi hoba fakhegen o. Hat hobaburigiba inom, hobabut hilingiti lagen oba inom yi enggin ti enggin hikhi lagen andiba re hendawinggenma taunget hiili'lago andi o.

Yeremia nen Allah againafuri faget ebeti logolik endawimo heiselhikhe wene

¹⁹ Eige, an nendawimo ou mondok hikhi logolik he, enggin ikhi logolik logou re elo'lek nabi'lago o. Trompet futhugunem ane ugu mene inom weim abolok ugunem inom nesanggo holhaluk he an nendawinggenma mondogat abolok ugunem, an nebe hambuget haluk logou re elo'lek agunem welagi andi.

²⁰ Enggin mene ekhe wagik ekhe wagik hilingiti logolik o kweang yi nogoba mondogat wolelenggenhogo weaget lari'logo. An nawi wurik a'nogo ferekhogoat weaget figik, su kain omanogo tilip talaphogo figik, hilingfisili'logo andi.

²¹ Ap weim inaninirogo yafu mondok were'ma kwelaginarek werek kwelek enek he ki huli logogin nogo? No trompet ane futhili'lagwi mene andoma nesanggo holek werek kwelek enek he ki huliba asigin?

²² Tuhan nen ikhi logolik, ”An nagainafuri andoma re mondogat kemburego, iren An fut nobagali'lagwi lek. It he omalik kembu mene hak hilingik logolik, wenggelhu mene endebat iluk ogo werek lek, inaniniba hilingisugun mene a'nogo faget enek he hibil-hebelhogo hilingiti logolik, fanorogo hilingisu mene omanogore mondogat nonghong sego,” iluk ikhe o, isikhe.

Enggin fenggin asi wesigin mene faget abikanggoba hasikhe wene

²³ Kweangma andoma neilenggen hugunem, yi mene ti mene mondogat le'ma pirimhogo hilingi'mo higi, nen pogoroba neilenggen liakhigi re, egi, selegeratu mene ekhe welaga mondok lek.

²⁴ O tom-tom uandek omanogo inom punu punukwe omanogo inom neilenggen yethugunem he, mondok wesa polanhogo yelandi-kwelandit hugunem higi.

²⁵ An nen afuni ekhe were'ma isigi lek, nen sue ogo mondogat tarogo lagama welaga.

²⁶ Kweang elokhe fano heiselek oba omanogore mondogat ungguloa'ma hilinglagama welaga, kota-kota omanogo re wolelenggen tagalogo hilingi'mo higi, andi re At Tuhan nen againafuri inoba anini fikhesik hilingite.

²⁷ (Tuhan nen ikhi logolik o kweangma mondogat he lei pirimhogo taik igin o, oba nen he Aren abirengge legetfagain mondok lek.)

²⁸ Kweang he fong wasigin, pogot he hik-kiruang teng igin. Tuhan ane mondogat ikhemo re hilingisigin anggikhe mene andi sugi asigin lek. Aren wene mondogat tegetemo re endebat iluk ogo taganet fagain mondok lek.

²⁹ Ap esa kuda ba lagaluk wagu mene inom, sikhe inenggi puk mene wagu mene inom, inane ami-mit lagagunem he, afuni inebe lombok pugulik-pagalik u hagaro. It inogoi enggakwe kwi lagik, tom eilkwe hambo-hambo lagagik, hilingitunem o kota mondogat areng tiring-tereng ugunem, afuni o andoma logou re inaberali asu hago.

³⁰ Yerusalem yi hat he mondogat oboget heagamanggere, haren yi'nogo ti'nogo ekhe hilingisu lek hago! Nenahalok haren hasu jubah eil mep mene labetik, halilingge emas, perak mene liakhigik, nen heil alili pugun erigik, ikhi lagen nogo? It haren hendawi hundik hilinginafi lagen mene omanogo nen he hat mondogat inabiret hobagagasik, hebe hoasugun iluk hilingitu kwelek andoma re we alomarogo hilingiti lagen o.

³¹ An nesanggo holhugunemen he, he mene eak takhageluk heinet watunem hilingiterek hak hilingitunem holhi, he tugum mene nen omalik manggusa malik tasigiluk hilingiterek hak, Yerusalem he set hoporogo le ari'logo. Enggi langhogo heinet wati logolik, ”Eige, an mondogat alomat lasigiluk welagi o, an naselei mene nen noasuogeluk hilingiri'lagwi!” ili'logo.