YEREMIA 34 - Allah Wene Fano Wene Hupla Inane

Zedekia faget wene warek lakfesikhe wene

¹ Nebukadnezar raja Babel mene a'nogo agoromi tentara esa re it ap inunggulenu amu mene inom o negara amu mene inom at a'ma sebe iluk welagaukwa mene omanogo inom mangotukwasik iren o kota Yerusalem inom kota era'lukwe maserogo werek mene omanogo inom pin kwi wagaukwa sambul a'nogo re Tuhan ane an noba ikhe.

² Aren an noba ikhi logolik raja Yehuda mene Zedekia ambit laluk he wene yi'nogo yagasi lan o, iluk la'nobagaikhe, ”An Tuhan Allah afuni Israel mene ineisena a'nogo nen he, kota yi raja Babel mene enggiba foumo re aren endu fagain o.

³ Nen hat hebe re heise polokhogo wulibigin lek oba nen fakhobagambik raja enggiba fogoin. Hat he at hinom ambi asimbik hinom wene ane masimbigen he wokharek o Babel logoin.

⁴ Oba nen Zedekia, An nen hat hobaget nane ikhi lagi mene yi hesanggo holin o! Hat hebe re sikhe ambisangma asimbik wa'lasigin lego,

⁵ oba nen he fini-fanorogo wa'lasigin. Nen afuni nen hat hombawi attak wa'lagaukwa mene salinafi logolik amben fanongge kemenyan nolhi lagaukwa hak, hat hobaget ogo afuni nen a'nogoat nolugun. Iren fong warogo inane ikhi logolik, ’Eige! ninoe raja a'nogo re arat lek akhikhe o, ikhi logogun!’ iluk An Tuhan nen nane mondogat igi,” ikhe.

⁶ A'nogo ikhemo re Tuhan nen ikhe mene a'nogo an nen raja Yehuda mene Zedekia a'nogo o Yerusalem were'ma,

⁷ yagasi lagain iluk lagagi sambul andi re at raja Babel mene a'nogo agoromi inom he o kota Yerusalem a'nogo pin kuogeluk ugunem. Nen kota Lakhis inom, Aseka inom, o kota Yehuda ba andoma kota pire andem he weaget figi'lek mene leget omamerogo wagane'ma omanogo pin kuogeluk ugu kwelek andem wene andi yagasi lagi.

Inamingmingengge onggo palinafi lagaukwa mene inoba henarogo hilingfisikhi lagaukwa wene

⁸ Raja Zedekia inom, afuni Yerusalem mene inomen inebe misik seberogo nen he,

⁹ afuni Ibrani mene inamingmingengge a'luk werek mene andoma re it inunggulenu Israel mene misigen ogo ekhe it inunggulenu mene ap ogo helime ogo ekhe inamingming enggerogo hilingfisikhi logogun lego, we it hele fikhalek logouwak, iluk wene homatukwa.

¹⁰ A'nogo homatukwasik he afuni inom, pemerintah ba yabu legoma hilingitarek mene omanogo inomen wene homati logolik inamingmingengge mondogat fikhalogo fisogoin, nen ekhe ferinarek logogun lek iluk wene wata inap omanogo nen he ibi-eberogo nen lologo fisasukwa.

¹¹ Oba nen hobugen he it inendawinggen agamerik laga logolik iren inamingmingengge omanogo nekhengge woginafasik he inane ninghogo ninamingmingengge logoni iluk yagahisikhi lagaukwa.

^12-13 Andiba re Tuhan, Israel mene ineisena Allah a'nogo nen he an nen yi'nogo afuni andoma yagaisoageluk yaganete, ”An nen hit hinombawi o Mesir en woginarek wulibi wagik, ap Mesir mene inamingmingengge were'ma nen lologo fisigik, hilingitigi sambul he An nen it ninom wene watugu.

¹⁴ An nen ikhi logolik it Ibrani mene nen inamingmingengge a'luk were'ma nen he tahun sabit mene asigin huliba andem he fikhalogo wulak fisagain o isigi. Oba nen he hit hinombawi nen An nane ugu mene omanogo futfigik, holfigik, ikhi lagaukwa lek.

¹⁵ Linggene welagagu mene horok a'lem nogoba re hiren hinobabut agametepsik An nendawimo nagaiyek mene hilingiti lagagip. Hiren he, it hit hinunggulenu mene inamingmingengge a'luk werek mene lologo wulak fisogoin iluk An ninom An nailoba omanogo nen wene watugu.

^16-19 A'nogo hilingitigipmo re it pemerintah Yehuda ba nen inom Yerusalem oba nen inom, raja were'ma pegawai werek mene omanogo inom, imam inom, hit hinanggweang halharek inap inom, nen hiren wene watigip mene a'nogo eberogo iluk hilingiti logolik, wam sapi warogo senggelogo pire hibit fagasik he it inebe tulem kwe a'nogo soganeta. Oba nen hiren hobugen hinendawinggen agametepsik An li'norogo nobagakhi lagep. Nen it hinamingmingengge inendawimo anggili'lagwi mene higithogo lologo wulaginabi wagagip mene omanogo hiren nekhengge hinomameba hinamingmingengge mene asuageluk woginafi lagep. Andiba re An Tuhan nen nane ikhi logolik, hit he An nawene melalek a'nogo taganhogo hilingiti logolik An nen yi'nogo hilingisigin iluk isigi mene a'nogo hologo hilingiti lagep lek. Andi erore hiren An ap hit hinunggulenu Israel mene andoma lologo fisikhi lagep lek andiba o. Ma re yogondak he An nen hit hinoba hinonggwaregen wenakhobagaigeluk yagahisikhi lagi andi. Hiren weim ambisangma nen wa'lagu mene hinendawi a, athe sumburu nele nen hea, athe ou amben weak mene nen hea, An nen he hiren sapi andiba hilingitep andep hakhogo hilinghinobagagin andi. An nen he it afuni inunggulenu kweangma yoma nen inamel-melhogo kwelagisagarek mene andi hit hinoba hilingfagain o.

²⁰ An nen he hit hinaselei mene it hinoasuogeluk hilingiri'lagwi mene omanogo inoba wogisagain. Ma re hit hinebe warek he sue nen inom mene olomene nen inom nogoin o.

²¹ Zedekia raja Yehuda mene andi inom, pemerintah mene inobaget yabu legoma hilingiri'lagwi mene andoma inom he, An nen it ap hinoasugun iluk hilingiri'lagwi mene andoma inenggiba fagain. An nen he ap tentara Babel mene yogondak hit herakhinobagaluk lagaikha mene andoma inoba wogisagain o.

²² An nen he it hinaselei mene we'luk o kota yi pin kwi wagik, teligik, endu fatik, uageluk inayonggo fagain o. O Yehuda ba kota-kota omanogo re An nen o leimo afuni le'ma hak hilingisogo fagain, iluk An Tuhan nen nane mondogat igi o,” ikhe.