YEREMIA 3 - Allah Wene Fano Wene Hupla Inane

Israel he An noba lomborogo werek lego iluk isikhe wene

¹ Tuhan nen ikhi logolik, ”He ekhe agun nen herakfikhemo were'ma nen, he a'nogo ap amu mene helugu halok he, agun attak mene a'nogo nen he andi nekhengge helagain mondok lek, andi re it a'nogo hilingisugun andiba re o kweang yiba elokhe weagerogo fogoin hanogo. Hat Israel he hendawi hundik mene hinom mondok hokhorogo hilingiti logoligenat he, An nambit sugulogo wesigin iluk hilingiti lagen andiri!

² Punu unggulkwe andoma heilenggen liakhan! Haren pailak hilingirageluk lagalagen lekwe re koma nogo? Ap Arab mene lei pirim se'ma welagaikharek higit, haren ebekhalem inendawi nunggunem hilingitarek engge a'nogo hilingisugun iluk ap nenangorinafu welagen. Haren he o kweang yi re babi lagik, hanini mene hilingitik, hilingitu logolik he mondogat emetfikhi lagen.

³ Andiba re i pogoroba nen pelabi wagi'lek, meiso e ilit sabelherek oba weak-weak wagi'lek werek andi o. Hat he henggali lek logolik, hambenan hilingirik nikharek mene andoma hinom higitsek welagen.

⁴ Hat hoba enggin were'ma aremnogo haren An noba ikhi logolik, ”Hat he an neisena o, nebe yenggerek oba nenat Haren hendawi hundik hilingnafi lagen mene,” iluk ikhi lagen.

⁵ Ekhe haren ikhi logolik, ”Hat a'mage nit ninoba fugu mondok logogin nogo a, iluk ikhi lagen andi. Ariginik oba nen he Israel ao, haren hilingisigin iluk anggegendek mene omanogo obogisaluk he ha'mage lagaikherek mene a'nogo hilingiti lagenat andi,” iluk ikhe isikhe.

Israel inom Yehuda inom he inobabut hebeluak isikhe wene

⁶ Yosia raja logolik ferinarek welagaikhe andem oba re Tuhan ane an noba yi'nogo isikhe, ”He ekhe agun inom lomborogo werek lek mene Israel andi nen hilingiri'lago mene andoma hat he heilenggen mondogat hegen a? At he An oboget nealuk punu unggulkwe andoma inom, e engga hikhogo wilibik mene erokwe andoma inom, hambenan hilingirik nikho a'naga o.

^7-8 An nen ebeti logolik he, at mondogat a'nogo hilingirik nikhi logombik he sugulogo ambotkwe An noba wesigin iluk ebeti. Oba nen he at a'nogo sugulogo An nambit wagi'lek hambenan hilingirik nugu nen he, An nen at a'nogo herakfisigirik mugusogo wulakfisigi andi. A'nogo hilingitunem at Yehuda, agailak Israel en kwanirogo hilingiri'lago mene omanogo mondogat eilenggen hikherek oba nen he, andi faget aren ailo ekhe aga mondok lek. We aren enggali endephogo ekhe higi'legat he,

⁹ hambenan hilingisigin mene a'nogo murok lagaat andi. Aren helep meneba inom e meneba inom apne wanhunem babi hilingiri'lago andiba o kweang yi emetfili'lago.

¹⁰ Andoma mondogat a'nogo hilingiti la'luk Yehuda tiphogo hilingiterek lek mene andi re endawinggen amurek logoligen yamdalonhogo sugulogo An nambit weri'logo o. Iluk An Tuhan nen nane arat igi andi,” iluk yaganete isikhe.

¹¹ Andi nen Tuhan nen an yaganeti logolik he, ”Israel mene nen At inambot wogotaba nen he, it Yehuda mene nen lomborogo hilingiri'lagwi lek andem hakhogo hilingik fuk, it Israel mene re endep fano hago,” iluk ikhe.

¹² Tuhan nen wene yi afuni Israel mene inoba yagaisalan iluk an la'nobagakhi logolik yi'nogo ikhe, ”Hat Israel tiphogo hilingiti lagen lek mene yi re, An nambit sugulogo eme o! An he nendawi hundik mondok hilinginafirek mene welagimo re, wene palhirek mene andi re mondok-mondok faget igirek lego.

¹³ We haren fageti logolik, An neisena Tuhan Allahba weak hilingitik, Ane sagalogo figik, ikhi lagi iluk fagesigin andi fano o. Nen, haren fageti logolik he, An he e engga hikhogo wilibik mene a'makwe andoma nen tugwi kembu it inunggulenu amu mene nen obaget hilingitarek mene omanogo ninom pailak hilingiti lagi o, nen neisena Tuhan ane hologo hilingiti lagagi lego, iluk fage'no. Nen An Tuhan nane mondogat igi o,” iluk yagaisalan ikhemo yagahisa wagi o, isikhe.

¹⁴ Tuhan nen ikhi logolik, ”Yago hit An nagainafuri tiphogo hilingiti lagep lek mene andoma re, An nambit hinambotkwe sugulogo we'ni o! Hit hinebe re An nonggwarek mene. An nen he ap hit mene o kota misik oba nen he ap inebe misik higik, nen inunggulenu misik oba nen he inebe lombok pirendek higik woginarek nekhengge Punu Sion oba lagain o.

¹⁵ An nen he hit hinogogwi fethinarek logolik yagahisugu mene faget An nane hologo hilingitu mene wokhisagain o. Iren he inobabut mondok higit oba wene fanorogo wenggel haluk yagahisikhi logolik fethinarek logogun.

¹⁶ Nen, hit hinebe o kweang yiba sik-pik imbik he afuni nen peti Wene Warek a'nogo faget awene ekhe ikhi logogun mondok lego. Iren he andi faget ekhe wenggelhik, ebetik, hilingiti logogun lek, athe iren andi faget ninendawi agik, nen peti Wene Warek kwalek mene andi amu mene ekhe wusugun iluk ikhi logogun legat.

¹⁷ Andem sambul o Yerusalem faget he, ”Takhta Tuhan,” ebe werek oba iluk ikhi logogun, nen yi afuni ti afuni inunggulenu lombok he o kota andiba An napne wanuogeluk kabogesi waga logogun. Iren he it inendawimo nonghonghogo wenggelharek mene inom, inaniniba hilingitarek mene andoma inom murok lagik, ikhi logogun mondok lek.

¹⁸ Israel he Yehuda inom sebesimbik he it inebe ambine o sabu huginibi logoin oba andoma abel utara fikhiren wesugun. It he o kweang An nen it inombawi inoba it eise asuageluk wogisasigiba andoma sugulogo wesugun o,” ikhe isikhe.

Allah againafuri mene nen babi hilingitukwa mene faget isikhe wene

¹⁹ Tuhan nen ikhi logolik, ”Israel, hat he An nen nomalik tago logoinogeluk wokhabimbik he, kweang hat hamolore'ma hat eise asimbik logogin oba o kweangma mondogat oma nen he mondok fani fanore'ma wokhesigin o. Haren An faget. hunai ilen, nen An were'ma nen heise lelen lek iluk nendawimo anggikhi lagi o,” ikhe isikhe.

²⁰ Oba nen he afuni inagagwi nen tiphogo hilingiri'lagwi lek andi hak, haren ogo An noba tiphogo hilingiti lagen legat. An Tuhan nen nane mondogat igi o,” ikhe.

²¹ Tom unggulkwe andoma nen ap inane lenggu lengga ili'lagwi andi re afuni Israel mene weak hilingitik, it ineisena Tuhan Allah oba inonggot agik, aga mene a'nogo oba ebetasik lebetninabuageluk kinoti logolik le ari'lagwi o.

²² Yago hit mondogat Tuhan herakfisasigip mene yoma sani, hinambotkwe sugulogo we'ni o! Aren hit higithinafik, hit hinebe tiphogo hilingiti logobagaigeluk hilinghinobagagik igin werego. Hiren ikhi logolik, ”Yogo o yogondak he At andi nit nineisena Allah hilingi'mo re nit At ambit waga lago.

²³ Niren ninagaiyekhogo tom unggulkwe tugwi kembu wuti lago mene andoma re we alomarogo hilingiti lago! Nit Israel mene lebetninisikherek mene andi re we Tuhan Allah amu nen aro.

²⁴ Baal mondok enggali weak mene andiba apne wanhi lagaguba re nit ninagainafuri longgo igik, nit ninanggo sapi, domba inom o attagaren engge ninombawi nen halhi lagaukwa mene omanogo mondogat lek agik, ikhe.

²⁵ Enggere nit hilingito mene andi faget ninenggali agik, inal ngesukum wat ninobagagik, ugun andi re fano aro. Andi re niren inom nit ninombawi lagen inom nineisena Tuhan Allah a'nogoba weak hilingiti logolik, At awene melalek omanogo hologo hilingiti lago lek andiba ikhi lagebo,” Iluk ikhe.